សេដ្ឋកិច្ច

អង្ករកម្ពុជានាំចេញទៅទីផ្សារហ្វីលីពីន ហក់ឡើងខ្ពស់

បានផុស

១៨ វិនាទី មុន

នៅ

ថ្ងៃសុក្រ ២៦ មិថុនា ២០២៦

ដោយ

សហព័ន្ធស្រូវអង្ករកម្ពុជា (CRF) បានឱ្យដឹងថា ការនាំចេញអង្កររបស់កម្ពុជា ទៅកាន់ទីផ្សារហ្វីលីពីនកើនឡើង ៥០ ដង ដែលអាចនឹងហក់ឡើងដល់ ២០ ម៉ឺនតោន នៅដំណាច់ឆ្នាំ ២០២៦ ធៀបនឹងឆ្នាំមុន មានត្រឹមតែ ៣៥១០ តោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧកញ៉ា ឡាយ ឈុនហួរ ប្រធានសហព័ន្ធស្រូវអង្ករកម្ពុជា មានប្រសាសន៍ថា ទីផ្សារអង្ករកម្ពុជា មានការគាំទ្រពីសហគមន៍អឺរ៉ុប ចិន ម៉ាឡេស៊ី ខណៈមានកំណើននាំចូលទៅហ្វីលីពីនបានប្រមាណ ៦ ទៅ ៧ ម៉ឺនតោនរួចហើយ ហើយរំពឹងថា នឹងនាំចេញបានជាង ១០ ម៉ឺនតោន នៅក្នុងឆ្នាំ ២០២៦។

លោក ឃឹម ហ្វីណង់ អនុរដ្ឋលេខាធិការ និងអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ការហក់ឡើងដ៏ឆាប់រហ័សនៃការនាំចេញអង្ករកម្ពុជាទៅកាន់ហ្វីលីពីន គឺជាលទ្ធផលនៃកិច្ចសហការយ៉ាងជិតស្និទ្ធរវាង ឯកឧត្តម ឌិត ទីណា រដ្ឋមន្ត្រីក្រសួងកសិកម្មកម្ពុជា និងឯកឧត្តម Francisco P. Tiu Laurel Jr. រដ្ឋមន្ត្រីកសិកម្មហ្វីលីពីន តាមរយៈការសម្របសម្រួលយ៉ាងសកម្ម ដើម្បីភ្ជាប់ទំនាក់ទំនងទិញលក់ដោយផ្ទាល់រវាងវិស័យឯកជននៃប្រទេសទាំងពីរ។

អ្នកនាំពាក្យរូបនេះ បន្ថែមថា ជោគជ័យនេះបានផ្តល់ប្រយោជន៍ទៅវិញទៅមក ដោយជួយកម្ពុជាក្នុងការបើកទីផ្សារថ្មី បង្កើនចំណូល និងលើកស្ទួយជីវភាពកសិករខ្មែរ ស្របពេលដែលហ្វីលីពីនទទួលបានប្រភពផ្គត់ផ្គង់អង្ករដ៏គួរឱ្យជឿទុកចិត្តបាន ដើម្បីធានាសន្តិសុខស្បៀងជូនប្រជាជនរបស់ខ្លួន។

យោងតាមសហព័ន្ធស្រូវអង្ករ(CRF) កម្ពុជា សម្រេចបានការនាំចេញអង្ករចំនួនជាង ៥៦ ម៉ឺនតោន (៥៦៨ ៩១២) នៅក្នុងរយៈពេល ៥ ខែ ២០២៦ ទៅកាន់គោលដៅចំនួន ៦៣ ដែលសម្រេចបានទំហំទឹកប្រាក់ ៣២៧ លានដុល្លារ។

របាយការណ៍របស់ CRF បង្ហាញថា នៅក្នុងរយៈពេល៥ខែ ឆ្នាំ២០២៦ កម្ពុជាបាននាំចេញអង្ករបានចំនួន ៥៦៨ ៩១២តោន តាមរយៈក្រុមហ៊ុននាំចេញអង្ករចំនួន ៦១ ក្រុមហ៊ុន ទៅកាន់គោលដៅចំនួន ៦៣ ដែលក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន ៣១ បានបរិមាណអង្ករចំនួន ១៥៤ ២៥៤ តោន គិតជាទឹកប្រាក់ចំនួន ១០៥.១២ លានដុល្លារ ទៅកាន់ប្រទេសចិន និងហុងកុង ចំនួន ១៦២ ១២៥ តោន គិតជាទឹកប្រាក់ចំនួន ៩៤.៩២ លានដុល្លារ ប្រទេសក្នុងអាស៊ានចំនួន ៥ ប្រទេសបានបរិមាណចំនួន ២០៨ ៥៩៣ តោន គិតជាទឹកប្រាក់ចំនួន ៨៧.៣២ លានដុល្លារ និងទៅកាន់គោលដៅ ២៤ ប្រទេសផ្សេងទៀតមាន អាហ្វ្រិក មជ្ឈិមបូព៌ា អាមេរិក កាណាដា អូស្ត្រាលី ញូហ្សេឡេន បានចំនួន ៤៣ ៩៤០ តោន គិតជាទឹកប្រាក់ចំនួន ៤០.០៧ លានដុល្លារ៕