ព័ត៌មានអន្ដរជាតិ

រុស្ស៊ីព្រមានថា ការលូកដៃដោយផ្ទាល់ពីលោកខាងលិច នឹងធ្វើឱ្យសង្រ្គាមអ៊ុយក្រែនរាលដាលកាន់តែធំ

បានផុស

១៧ វិនាទី មុន

នៅ

ថ្ងៃពុធ ៨ កក្កដា ២០២៦

ដោយ

អ្នកនាំពាក្យវិមានក្រឹមឡាំង លោក Dmitry Peskov លើកឡើងកាលពីថ្ងៃអង្គារ ថា ប្រតិបត្តិការយោធាពិសេសរបស់រុស្ស៊ីជាមួយអ៊ុយក្រែន បានវិវត្តទៅជាសង្គ្រាមទ្រង់ទ្រាយធំ ដោយសារតែការចូលរួមដោយផ្ទាល់ពីបណ្តាប្រទេសលោកខាងលិច។

ថ្លែងក្នុងបទសម្ភាសន៍ជាមួយទស្សនាវដ្តីស្វីស Die Weltwoche នៅថ្ងៃទី៧ ខែកក្កដា ឆ្នាំ២០២៦ លោក Peskov និយាយថា រដ្ឋាភិបាលអឺរ៉ុបកំពុងសាងកំហុសដ៏ធំបំផុត ដោយជឿថា រុស្ស៊ីអាចនឹងត្រូវបរាជ័យជាយុទ្ធសាស្ត្រ។

អ្នកនាំពាក្យវិមានក្រឹមឡាំង លោក Dmitry Peskov ។ រូបភាព៖ AA

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រុស្ស៊ីក៏ព្រមានថា ការគាំទ្រផ្នែកយោធាជាបន្តបន្ទាប់សម្រាប់អ៊ុយក្រែន ប្រឈមនឹងហានិភ័យនៃការពន្យារពេលសង្គ្រាមជាជាងការនាំមកនូវសន្តិភាព។

លោកលើកឡើងថា៖ « រុស្ស៊ីមានតែម្នាក់ឯង ចំណែករបបក្រុងកៀវបូករួមទាំងប្រទេសអឺរ៉ុបមួយចំនួន ថែមទាំងសហរដ្ឋអាមេរិកទៀត កំពុងផ្គត់ផ្គង់អាវុធរាប់លានតោនដល់អ៊ុយក្រែន។ តើវាជាអ្វី? វាលែងជាប្រតិបត្តិការធម្មតាទៀតហើយ។ វាជាសង្គ្រាម។ វាជាសង្គ្រាមទ្រង់ទ្រាយធំ»។

លោក Peskov ក៏បានចោទប្រកាន់សហភាពអឺរ៉ុបថាបានផ្លាស់ប្តូរពីប្លុកសេដ្ឋកិច្ចទៅជាប្លុកយោធា ដោយនិយាយថា រុស្ស៊ីនឹងចាត់វិធានការបន្ថែម ដើម្បីការពារសន្តិសុខជាតិរបស់ខ្លួនជាការឆ្លើយតប។

លោកក៏បានបដិសេធដែរថា រុស្ស៊ីនឹងមិនទៅបង្កើតសង្គ្រាមលោកលើកទី៣ នោះទេ ដោយសារតែរុស្ស៊ីជាប្រទេសធំ ហើយមានការទទួលខុសត្រូវខ្ពស់ មិនមែនចេះតែទៅបង្កសង្គ្រាមមុននោះឡើយ។

លោកបន្ថែមថា៖ « យើងនឹងធានាសន្តិសុខរបស់យើង។ ប៉ុន្តែយើងនឹងមិនចាប់ផ្តើមសង្គ្រាមលោកលើកទីបីឡើយ»។

ពេលសួរអំពីលទ្ធភាពនៃការកើនឡើងនៃអាវុធនុយក្លេអ៊ែរ លោក Peskov និយាយថា គោលលទ្ធិនុយក្លេអ៊ែររបស់រុស្ស៊ីនៅតែមិនផ្លាស់ប្តូរ ហើយអាវុធនុយក្លេអ៊ែរនឹងត្រូវបានប្រើប្រាស់លុះត្រាតែប្រទេសរុស្ស៊ីពិតជា ត្រូវបានគំរាមកំហែង។

លោកបន្តថា៖ « ប្រសិនបើមានអ្វីមួយ ពិតជាធ្វើឱ្យប៉ះពាល់ដល់រដ្ឋរុស្ស៊ី នោះអាវុធនុយក្លេអ៊ែរនឹងត្រូវបានប្រើប្រាស់។ បើមិនមានអ្វីទេ ក៏មិនប្រើប្រាស់ដែរ»៕

សម្រួល៖ ណឺ មិនា

Related Topics:សង្គ្រាមរុស្ស៊ី-អ៊ុយក្រែន