កីឡា

អ្នកលេងគុនខ្មែរ បឺត សង្ឃឹម អាចស្តាកិត្តិយសឡើងវិញបានទេនៅលើទឹកដីអូស្ត្រាលីជាលើកទី២ ឆ្នាំ២០២៦

បានផុស

១៦ នាទី មុន

នៅ

ថ្ងៃព្រហស្បតិ៍ ១៦ កក្កដា ២០២៦

ដោយ

ក្រុមគុនខ្មែរទាំង ៦រូប និងក្រុមការងារគ្រូបង្វឹកបានទៅដល់ប្រទេសអូស្ត្រាលីកំពុងតែធ្វើទម្ងន់ដើម្បីត្រៀមការប្រកួតនៅថ្ងៃទី១៧ ខែកក្កដា ឆ្នាំ២០២៦ ស្របពេលនេះជាលើកទី២ ហើយសម្រាប់កីឡាករ បឺត សង្ឃឹម នៅទីនោះ។

កីឡាករ បឺត សង្ឃឹម

និយាយចំពោះកីឡាករ បឺត សង្ឃឹម រូបគេបានជាន់ទឹកដីអូស្ត្រាលីជាលើកទី២ បន្ទាប់ពីលើកទី១ ប្រកួតចាញ់ក្នុងការប្រកួតដណ្ដើមខ្សែក្រវាត់ BBC ជាមួយអ្នកប្រដាល់សៀម។ ការប្រកួតដណ្ដើមខ្សែក្រវាត់លើកទី១ នោះគឺបានធ្វើឲ្យគាំទ្រនៅកម្ពុជា និងឯអូស្ត្រាលីមានការខកចិត្តជាខ្លាំងដោយការទន្ទឹងរង់ចាំទស្សនាជាយូរសប្ដាហ៍ ប៉ុន្តែលទ្ធផលបែរជាចាញ់ត្រឹមទឹកទី១ ទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ បឺត សង្ឃឹម

ស្អែកនេះកីឡាករ បឺត សង្ឃឺម នឹងត្រូវប៉ះជើងខ្លាំង Sulaiman Hashemi លើប្រភេទទម្ងន់ ៦០គីឡូក្រាម។ ការប្រកួតលើកទី២ នេះច្បាស់ណាស់ពិតជាសំខាន់ខ្លាំងចំពោះ បឺត សង្ឃឹម ដើម្បីស្តាកិត្តិយសឡើងវិញពិសេសស្វែងរកជ័យជម្នះជូនអ្នកគាំទ្រនៅអូស្ត្រាលី និងកម្ពុជាវិញ។ គេឃើញកូនសិស្សលោក សេន ប៊ុនថេន រូបគេមិនទទួលការប្រកួតផ្សេងៗនោះឡើយមួយរយៈពេលចុងក្រោយនេះដោយសារតែបញ្ហសុខភាពផង និងអាចជាការថែរក្សាខ្លួន ឬត្រៀមខ្លួនឲ្យបានល្អផងសម្រាប់ការប្រកួតសំខាន់នៅឯអូស្ត្រាលីលើកទី២ នេះ។

បឺត សង្ឃឹម ប្រកួតកន្លងទៅ

បញ្ជាក់ដែរថា កីឡាករ បឺត សង្ឃឹម ទៅប្រកួតលើកទី១ កាលពីថ្ងៃទី១៧ ខែកុម្ភៈ ឆ្នាំ២០២៤ នៅពេលនោះចាញ់កីឡាករសៀម យូ ធិន ក្នុងទឹកទី១ ដោយគ្រូពេទ្យបញ្ឈប់ការប្រកួតព្រោះរបួសបែកធំពេក។ ស្អែកនេះរូបគេនិងក្រុមគុនខ្មែរ ៥រូបផ្សេងទៀតនឹងប្រកួតជាថ្មីនៅលើទឹកដីអូស្ត្រលី។ រង់ចាំមើលកីឡាករគុនខ្មែររូបណាខ្លះរួមទាំង បឺត សង្ឃឺម អាចដណ្ដើមជ័យជម្នះបានទេ៕