ព័ត៌មានជាតិ

សក្តានុពលខេត្តកំពតមានដំណាំកសិកម្ម រួមទាំងឈើហូបផ្លែពេញនិយមជាច្រើនមុខ ដាំដុះលើផ្ទៃដីរាប់ពាន់ហិកតា

បានផុស

២៦ នាទី មុន

នៅ

ថ្ងៃសុក្រ ១៧ កក្កដា ២០២៦

ដោយ

ខេត្តកំពតមានសក្តានុពលលើវិស័យកសិកម្ម រួមទាំងសំបូរដំណាំឈើហូបផ្លែជាច្រើនប្រភេទ ត្រូវបានដាំដុះនៅលើផ្ទៃដីរាប់ពាន់ហិកតា ហើយមានដំណាំខ្លះមានសក្តានុពលខ្ពស់ អាចនាំចេញទៅលក់ដល់ទីផ្សារបរទេសរហូតដល់ប្រទេសនៅអឺរ៉ុប។

លោក មឿង គង្គា អភិបាលរងខេត្តកំពតបានលើកឡើងពីសក្តានុពលនៃវិស័យកសិកម្ម និងដំណាំយុទ្ធសាស្ត្រនៅក្នុងខេត្តកំពត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក មឿង គង្គា អភិបាលរងខេត្តកំពត

លោកថា ខេត្តកំពតមានផ្ទៃដីដាំដុះដំណាំស្រូវប្រមាណជា ១៤ ម៉ឺនហិកតា ជាមួយបរិមាណផលផលិតបានមានចំនួន ៤៨ ម៉ឺនតោន ជាមួយតុល្យភាពស្បៀងគិតជាស្រូវនៅសល់ប្រមាណ ២៥ ម៉ឺនតោន។

លោកថា ខេត្តកំពតក៏មានទិសដៅពង្រីក និងបង្កើនការងារដាំដុះដំណាំស្រូវបន្ថែមទៀតទៅថ្ងៃអនាគត។

ក្រៅពីដំណាំស្រូវ ដំណាំសក្តានុពលផ្សេងទៀតក្នុងនោះ មានម្រេចកំពតដែលត្រូវបានចុះបញ្ជីម៉ាកសម្គាល់ភូមិសាស្ត្រ (GI) និងមានកេរ្តិ៍ឈ្មោះល្បីល្បាញទូទាំងពិភពលោក។

លោកថា ម្រេចកំពតត្រូវបានដាំនៅស្រុកទឹកឈូ ស្រុកដងទង់ ស្រុកឈូក និងស្រុកកំពង់ត្រាចដែលផ្ទៃដីដាំដុះមានប្រមាណ ២៨៦ ហិកតា និងទទួលបានបរិមាណផលប្រហែល ៤៤១ តោន។

ម្រេចកំពតភាគច្រើននាំចេញទៅកាន់ទីផ្សារអឺរ៉ុប ដែលជាចំណែកទីផ្សារលក់ចេញធំជាងគេ។

ប្រភេទម្រេចកំពតមាន ៣ ប្រភេទ គឺ ម្រេចខ្មៅ ម្រេចក្រហម និងម្រេចស ដែលមានតម្លៃខុសៗគ្នា។ ក្នុងនោះម្រេចសមានតម្លៃថ្លៃជាងគេបំផុតប្រមាណ ៣០ ដុល្លារក្នុងមួយគីឡូក្រាម។

ដំណាំទុរេន ក៏ជាដំណាំដ៏មានប្រជាប្រិយ ដែលក្នុងខេត្តមានផ្ទៃដីដាំដុះប្រមាណ ២,៥០០ ហិកតា និងទទួលបានបរិមាណផលប្រហែល ២ ម៉ឺនតោន សម្រាប់លក់នៅក្នុងស្រុក។

តំបន់ដែលមានការដាំដុះទុរេនច្រើនមាននៅស្រុកទឹកឈូ ស្រុកឈូក ផ្នែកខ្លះនៃស្រុកដងទង់ និងស្រុកកំពង់ត្រាច។

យ៉ាងណាមិញ ទុរេនដែលឆ្ងាញ់ប្រចាំតំបន់និងល្បីល្បាញជាងគេ គឺដាំនៅជើងភ្នំបូកគោ (ជើងភ្នំកំចាយ) ដោយមានពូជល្បីគឺប្រភេទឪខាក់។

លោក មឿង គង្គា អះអាងថា ទុរេនដែលដាំនៅកំពតមានទីផ្សារធំទូលាយ ហើយក៏មានការពេញនិយមដាំដុះច្រើន។

ដើម្បីការពារអត្តសញ្ញាណទុរេនកំពត អភិបាលខេត្តបានបញ្ជាឲ្យសមត្ថកិច្ចនិងកម្លាំងជំនាញ ចូលរួមដើម្បីទប់ស្កាត់ការនាំចូលទុរេនពីប្រទេសជិតខាង និងត្រួតពិនិត្យគោលដៅលក់ដូរដើម្បីរក្សាកេរ្តិ៍ឈ្មោះទុរេនកំពតកុំឲ្យប៉ះពាល់។

ដោយឡែក ដំណាំដូងក៏ជាដំណាំដ៏មានសក្តានុពលរបស់ខេត្តតំបន់ឆ្នេរនេះ។ ខេត្តកំពតមានផ្ទៃដីដាំដុះប្រមាណ ៥ ០០០ ហិកតា និងផ្ទៃដីប្រមូលផលមាន ៤ ០០០ ហិកតា។

កាលពីមុន ខេត្តកំពតធ្លាប់ខ្វះខាតដូងសម្រាប់ផ្គត់ផ្គង់ទេសចរ ប៉ុន្តែបច្ចុប្បន្នមានការផ្គត់ផ្គង់គ្រប់គ្រាន់ ដោយសារការជំរុញការដាំដុះពីមន្ទីរកសិកម្ម រួមផ្សំនឹងការដាំដុះលក្ខណៈគ្រួសារ សហគមន៍ និងក្រុមហ៊ុន។

ដូងខេត្តកំពតមានរសជាតិផ្អែមឆ្ងាញ់ ដោយក្រៅពីផ្គត់ផ្គង់ទេសចរណ៍ក្នុងខេត្ត ក៏មានការដឹកជញ្ជូនយកទៅលក់នៅរាជធានីភ្នំពេញ និងបណ្តាខេត្តផ្សេងៗទៀតផងដែរ។

ជាមួយគ្នានេះ ស្វាយកែវរមៀត និងចេកអំបូងលឿងក៏មានការដាំដុះបានច្រើននៅក្នុងខេត្តកំពត និងមានការនាំចេញទៅកាន់បណ្តាប្រទេសនានា ដូចជាប្រទេសចិនជាដើម។

ចេកអំបូងលឿងមានក្រុមហ៊ុនចំនួនពីរកំពុងវិនិយោគសម្រាប់លក់ក្នុងស្រុក និងនាំចេញទៅក្រៅប្រទេស។

លោក មឿង គង្គា បានគូសបញ្ជាក់ថា វិស័យកសិកម្មបានដើរតួនាទីយ៉ាងសំខាន់ក្នុងការជួយលើកកម្ពស់ជីវភាពរស់នៅរបស់ប្រជាពលរដ្ឋ ជាពិសេសគឺការផ្គត់ផ្គង់ដល់វិស័យទេសចរណ៍ជាតិ និងអន្តរជាតិដែលមកកម្សាន្តនៅខេត្តកំពត៕