ក្រុមហ៊ូធី បើកការ​វាយប្រហារលើកប៉ាល់ដឹកប្រេងអារ៉ាប៊ីសាអូឌីត ២គ្រឿង នៅសមុទ្រ​ក្រហម

ក្រុមប្រដាប់អាវុធហ៊ូធី នៅប្រទេសយេម៉ែន បានប្រកាសថា ពួកគេបានបើកប្រតិបត្តិការយោធាវាយប្រហារលើកប៉ាល់​ដឹកប្រេងរបស់ប្រទេសអារ៉ាប៊ីសាអូឌីតចំនួន ២គ្រឿង ដោយប្រើប្រាស់គ្រាប់មីស៊ីល​បាលិស្ទិក មីស៊ីលគ្រូស និងដ្រូន។

តាម​ការផ្សាយរបស់ BBC នា​ថ្ងៃទី​២៣ ខែ​កក្កដា ឆ្នាំ​២០២៦ នេះ អ្នកនាំពាក្យយោធារបស់ក្រុមហ៊ូធី លោក Yahya Saree បានឱ្យដឹងថា កប៉ាល់​ដឹកប្រេងដែលរងការវាយប្រហារនោះ មានឈ្មោះថា Encelia និង Layla។ លោកអះអាងថា ការវាយប្រហារនេះ បានធ្វើឡើង​ចំគោលដៅ ដើម្បីឆ្លើយតបទៅនឹងការបំពានលើការបិទខ្ទប់ផ្លូវសមុទ្ររបស់ក្រុមខ្លួន។ លោក Saree បានបន្ថែមថា ប្រតិបត្តិការនេះ បានបង្ខំឱ្យ​កប៉ាល់​ផ្សេងទៀតជិត ១០គ្រឿងត្រូវបង្វែរក្បាលត្រឡប់ក្រោយវិញ ហើយក្រុមហ៊ូធី នឹងបន្តប្រតិបត្តិការផ្លូវទឹកនេះ ដែល​ជា​ការដាក់ទណ្ឌកម្មសេដ្ឋកិច្ចតាមផ្លូវទឹក និងហាមឃាត់ការធ្វើនាវាចរណ៍ប្រឆាំងនឹងប្រទេសអារ៉ាប៊ីសាអូឌីត ដើម្បីសងសឹកទៅនឹងការបិទខ្ទប់របស់អារ៉ាប៊ីសាអូឌីតមកលើសេដ្ឋកិច្ចយេម៉ែន អស់រយៈពេលជិត១២ឆ្នាំកន្លងមក។

ទន្ទឹមនោះ ក្រុមហ៊ូធី ក៏បានព្រមានខ្លាំងៗទៅកាន់អារ៉ាប៊ីសាអូឌីតថា ប្រសិនបើមានការវាយប្រហារណាមួយមកលើទឹកដីយេម៉ែន ពួកគេនឹងបើកការវាយប្រហារបកសងសឹកយ៉ាងធ្ងន់ធ្ងរចូលជ្រៅទៅក្នុងទឹកដីអារ៉ាប៊ីសាអូឌីតវិញ។

ខាងភាគីអារ៉ាប៊ីសាអូឌីត តាមរយៈអាជ្ញាធរដឹកជញ្ជូនផ្លូវគោកនិងផ្លូវទឹក (TGA) បានទទួលស្គាល់ថា កប៉ាល់ Encelia ពិតជាត្រូវគេប៉ងវាយប្រហារនៅក្បែរសមុទ្រក្រហមប្រាកដមែន ដោយបង្កឱ្យមានអគ្គិភ័យឆាបឆេះនៅផ្នែកខាងមុខនៃនាវា។ ទោះជាយ៉ាងណា អាជ្ញាធរបានបញ្ជាក់ថា បុគ្គលិក និងនាវិកទាំងអស់នៅលើកប៉ាល់​ មាន​សុវត្ថិភាព ហើយក្រុមការងារជំនាញ បានចុះអន្តរាគមន៍ភ្លាមៗ ដើម្បីគ្រប់គ្រងស្ថានការណ៍ ការពារបរិស្ថានសមុទ្រ និងការពារកប៉ាល់។ ភាគីអារ៉ាប៊ីសាអូឌីត បានថ្កោលទោសថា ការវាយប្រហារនេះ ជាការបំពានច្បាប់អន្តរជាតិយ៉ាងធ្ងន់ធ្ងរ ខណៈដែលសម្ព័ន្ធមិត្តដឹកនាំដោយអារ៉ាប៊ីសាអូឌីត បានប្តេជ្ញាថា នឹងមានវិធានការឆ្លើយតបវិញយ៉ាងម៉ឺងម៉ាត់បំផុត ដើម្បីការពារសុវត្ថិភាពនាវាធ្វើដំណើរឆ្លងកាត់ច្រកសមុទ្រ Bab al-Mandab ដែល​ជាច្រកសមុទ្រយុទ្ធសាស្ត្រដ៏សំខាន់មួយ តភ្ជាប់សមុទ្រក្រហម ទៅនឹង ឈូងសមុទ្រ Aden ព្រមទាំង​មហាសមុទ្រឥណ្ឌា៕

ប្រែសម្រួល៖ ឈាង