ព័ត៌មានជាតិ

សាខាកាកបាទក្រហមកម្ពុជាខេត្តប៉ៃលិន សូត្រមន្តចម្រើនព្រះជន្មថ្វាយព្រះវររាជមាតាជាតិខ្មែរ

បានផុស

៥ years មុន

នៅ

ថ្ងៃព្រហស្បតិ៍ ១៧ មិថុនា ២០២១

ដោយ

ខេត្តប៉ៃលិន៖ សាខាកាកបាទក្រហមកម្ពុជាខេត្តប៉ៃលិន ថ្ងៃទី១៧ ខែមិថុនា ឆ្នាំ២០២១នេះ បានរៀបចំពិធីថ្វាយព្រះពរ ជ័យសិរីមង្គល ក្នុងឱកាសព្រះរាជពិធីបុណ្យចម្រើនព្រះជន្មគម្រប់ ៨៥ព្រះវស្សា យាងចូល ៨៦ព្រះវស្សា អង្គសម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាទីសក្តារៈដ៏ខ្ពង់ខ្ពស់។

ពិធីបានរៀបចំនៅវត្តរតនៈសោភ័ណ្ឌ ហៅវត្តកោងកាង ក្រោមអធិបតីភាពដ៏ខ្ពង់ខ្ពស់របស់លោកស្រី បាន ស្រីមុំ អភិបាលនៃគណៈអភិបាលខេត្ត និងជា ប្រធានគណៈកម្មាធិការសាខាកាកបាទក្រហមកម្ពុជា ខេត្តប៉ៃលិន ព្រមទាំងមន្ត្រីរាជការ គ្រប់មន្ទីរអង្គភាពជុំវិញខេត្ត សមាជិក សមាជិកា សាខាកាកបាទក្រហមកម្ពុជាខេត្ត យុវជនស្ម័គ្រកាកបាទក្រហម យុវជន សហភាព សហព័ន្ធ យុវជន កម្ពុជា និងលោកយាយ លោកតា ជាច្រើនអង្គ/នាក់។

លោកស្រី បាន ស្រីមុំ តាងនាមថ្នាក់ដឹកនាំគណៈកម្មាធិការសាខាកាកបាទក្រហមកម្ពុជា ខេត្តប៉ៃលិន បានអញ្ជើញបូជាទៀន ធូប ផ្កាភ្ញី ថ្វាយព្រះពុទ្ធប្បដិមា និងនាំយកទេយ្យវត្ថុប្រគេន ព្រះសង្ឃ គង់នៅវត្តរតនៈសោភ័ណ្ឌ ហៅវត្តកោងកាង និងបានលើកហត្ថប្រណម្យបួងសួង ព្រះរតនត្រ័យកែវទាំងបី គុណបុណ្យវត្ថុស័ក្តិសិទ្ធិទាំងអស់នៅលើលោក ជាពិសេស សូមទេព្តារក្សាព្រះមហាស្វេត្រឆត្រ បារមីព្រះវិញ្ញាណក្ខន្ធនៃអតីតព្រះមហាក្សត្រ ព្រះមហាក្សត្រិយានីខ្មែរគ្រប់ព្រះអង្គ សូមឫទី្ធតេជៈបារមីខ្លាំងក្លាទាំងអស់ ជាពិសេសបារមី ព្រះវិញ្ញាណក្ខន្ធ អតីតព្រះករុណា ព្រះមហាវីរក្សត្រ ព្រះវររាជបិតា ព្រះបរមរតនកោដ្ឋ សូមប្រោសព្រះរាជប្រទាន ប្រោះព្រំនូវទឹកអម្រិតប្រសិទ្ធពរជ័យ សិរីសួស្តី ថ្វាយ និងសូមជួយបីបាច់ថែរក្សា សម្តេចព្រះមហាក្សត្រី ព្រះវររាជមាតា ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គប្រកបដោយព្រះបរមសុខគ្រប់ប្រការ មានព្រះរាជសុខភាពល្អបរិបូរណ៍ និងព្រះជន្មាយុជាងរយព្រះវស្សា ដើម្បីគង់ប្រថាប់ជាម្លប់ ដ៏ត្រជាក់ត្រជុំ នៃប្រជានុរាស្រ្ត ជាកូន ចៅ ចៅទួត របស់ព្រះអង្គទូទាំងប្រទេសយូរអង្វែងរៀងដរាបតទៅ។

ក្នុងឱកាសដ៏មហាប្រសើរ គណៈអធិបតី និងសមាជិកសាខាកាកបាទក្រហមកម្ពុជាខេត្ត ក៏បានប្រគេននូវទេយ្យទានដល់ ព្រះគ្រូចៅអធិការវត្ត និងព្រះសង្ឃក្នុងវត្ត រួមមាន៖ អង្ករ ទឹកក្រូច ទឹកសុទ្ធ មី ទឹកស៊ីអ៊ីវ ត្រីខ និងបច្ច័យមួយចំនួន ព្រមទាំងចែកថវិកាលោកតាលោកយាយផងដែរ៕

អត្ថបទ៖ សេង សុវណ្ណារិទ្ធ