កូវីដ-១៩

រដ្ឋបាលខេត្តសៀមរាប សម្រេចបិទផ្សារលើធំថ្មី ជាបណ្ដោះអាសន្ន ខណៈរកឃើញអ្នកវិជ្ជមានកូវីដ១៩ ជាច្រើននាក់

បានផុស

៥ years មុន

នៅ

ថ្ងៃព្រហស្បតិ៍ ២៤ មិថុនា ២០២១

ដោយ

សៀមរាប ៖ ពាក់ព័ន្ធនឹងព្រឹត្តិការណ៍ ២០ កុម្ភៈ ២០២១ នៅថ្ងៃទី២៤ ខែមិថុនា ឆ្នាំ២០២១នេះ រដ្ឋបាលខេត្តសៀមរាប បានសម្រេចបិទផ្សារលើធំថ្មី ជាបណ្ដោះអាសន្ន ខណៈរកឃើញអ្នកវិជ្ជមានកូវីដ១៩ថែមទៀត។ ផ្សារលើធំថ្មី ស្ថិតនៅក្នុងភូមិដក់ពោធិ៍ សង្កាត់ស្លក្រាម ក្រុងសៀមរាប ខេត្តសៀមរាប គឺចាប់ពីថ្ងៃទី២៤ ខែមិថុនានេះ បន្ទាប់ពីអាជ្ញាធរខេត្ដ បានរកឃើញអ្នកវិជ្ជមានកូវីដ១៩ ជាច្រើននាក់ ដែលជាអាជីវករលក់ដូរនៅក្នុងផ្សារនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្ដមវេជ្ជបណ្ឌិត ក្រុស សារ៉ាត់ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តសៀមរាប មានប្រសាសន៍ថា ក្រុមអាជីវករទាំងនោះត្រូវបានរកឃើញអ្នកវិជ្ជមានជំងឺកូវីដ-១៩ថ្មី ចំនួនជាច្រើននាក់ និង បានកំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប ហើយក្នុងចំណោមអ្នកវិជ្ជមាននោះមានម្នាក់បានស្លាប់ ទើបអាជ្ញាធរខេត្តសម្រេចបិទជាបណ្ដោះអាសន្ន ក្នុងរយៈពេល១៤ថ្ងៃចាប់ពីថ្ងៃទី២៤ ខែមិថុនានេះតទៅ។

ឯកឧត្ដមបានបន្ដថា អ្នកវិជ្ជមានកូវីដ១៩ មានខ្លះជាអ្នកលក់ចាប់ហួយ អ្នកដើរទារលុយផាស៊ី អ្នកមើលថែបន្ទប់ទឹកក្នុងផ្សារលើ និង ជាអ្នកដេរស្បែងជើងនៅខាងមុខផ្សារនេះផងដែរ។ ឯកឧត្ដម បានបញ្ជាក់ទៀតថា ផ្សារនេះអាចមានអ្នកពាក់ព័ន្ធប្រមាណជាង៤០០នាក់ឯណោះ។ ដោយឡែកចំពោះករណីអ្នកមានវិជ្ជមានជំងឺកូវីដ១៩នេះ បានដើរឆ្លងកាត់ទីតាំងជាច្រើនទៀត ព្រោះពួកគាត់ជាអ្នកសំអាតអនាម័យផង ដើរទារផាស៊ីផង ហើយអាជ្ញាធរខេត្តបានកំពុងតាមដានគ្រប់ទីតាំងដែលគាត់មានការពាក់ព័ន្ធ។

ជាមួយគ្នានេះ រដ្ឋបាលខេត្តសៀមរាប ក៏បានអំពាវនាវដល់បងប្អូនប្រជាពលរដ្ឋ អាជីវករដែលពាក់ព័ន្ធដោយផ្ទាល់ ឬដោយប្រយោលជាមួយអ្នកវិជ្ជមានខាងលើ ឬធ្លាប់ចូលទីតាំងខាងលើ ឬ ធ្លាប់បានចេញ-ចូលផ្សារលើធំថ្មី ត្រូវនាំគ្នាធ្វើចត្តាឡីស័កតាមផ្ទះ ក្នុងក្រុមគ្រួសាររៀងៗខ្លួន ដោយមិនត្រូវពាក់ព័ន្ធ និង ប៉ះពាល់ជាមួយអ្នកដទៃជាដាច់ខាត។

គួររំលឹកផងដែរថា មកទល់ពេលនេះ ខេត្តសៀមរាបក្នុងព្រឹត្តិការណ៍សហគមន៍២០កុម្ភៈ ២០២១ គឺមានអ្នកវិជ្ជមានជំងឺកូវីដ-១៩ ចំនួន៧០៣នាក់ហើយ និងបានព្យាបាលជាសះស្បើយចំនួន២០៧នាក់ ស្លាប់៨នាក់ និង ៤៤៦នាក់ បានកំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប និង វិទ្យាល័យដំដែកស្រុកសូទ្រនិគម៕

ដោយ ៖ គឿនវេត