ព័ត៌មានជាតិ

៦ខែឆ្នាំនេះ គ្រោះថ្នាក់ចរាចរណ៍នៅរាជធានីភ្នំពេញបណ្តាលឱ្យមនុស្សស្លាប់ជាង១០០នាក់ ថយចុះ៣០ភាគរយ

បានផុស

៥ years មុន

នៅ

ថ្ងៃអង្គារ ៦ កក្កដា ២០២១

ដោយ

នៅក្នុងរយៈពេល៦ខែ ឆ្នាំ២០២១នេះ គ្រោះថ្នាក់ចរាចរណ៍នៅរាជធានីភ្នំពេញបានបណ្តាលឱ្យមនុស្សស្លាប់ប្រមាណជាង១០០នាក់មានការថយចុះ៣០ភាគរយ បើធៀបទៅនឹងរយៈបេល៦ខែដូចគ្នាឆ្នាំ២០២០កន្លងទៅ។

បើតាមលោកវរសេនីយ៍ឯក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញបានមានប្រសាសន៍នៅរសៀលថ្ងៃទី៦ ខែកក្កដានេះថា ចាប់ពីខែមករារហូតមកដល់ខែមិថុនា ឆ្នាំ២០២១នេះ គ្រោះថ្នាក់ចរាចរណ៍នៅរាជធានីភ្នំពេញបានកើតឡើងចំនួន៣៤៧លើក បណ្តាលឱ្យមនុស្សស្លាប់ចំនួន១០១នាក់និងរបួស៤៤២នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា តួលេខនេះបើធៀបទៅនឹងរយៈបេល៦ខែដូចគ្នាឆ្នាំ២០២០កន្លងទៅឃើញថា មានការថយចុះគួរឱ្យកត់សម្គាល់ ដោយឆ្នាំ២០២០មានគ្រោះថ្នាក់ចរាចរណ៍កើតឡើងដល់ទៅ៥២៩លើក ថយចុះ១៨២លើក ស្មើនឹង៣៤ភាគរយ បណ្តាលឱ្យមនុស្សស្លាប់ចំនួន១៤៤នាក់ថយ៤៣នាក់ស្មើនឹង៣០ភាគរយនិងរបួសចំនួន៧០៨នាក់ ថយចុះ២៦៦នាក់ស្មើនឹង៣៨ភាគរយ។

លោកបានពន្យល់ថា មូលហេតុដែលបណ្តាលឱ្យមានករណីគ្រោះថ្នាក់ចរាចរណ៍នៅលើដងផ្លូវរួមមាន ការបើកបើកហួសល្បឿនកំណត់ ធ្វើឲ្យយើងបាត់បង់ម្ចាស់ការនៅពេលដែលមានឧបសគ្គ ដោយចៃដន្យ បើកបរនៅក្រោមឥទ្ធិពលនៃគ្រឿងស្រវឹង និងគ្រឿងញៀន នៅពេលអត់ងងុយខ្លាំងហេវហត់ខ្លាំង ការមិនគោរពសិទ្ធិអាទិភាពនៅកន្លែងផ្លូវប្រសព្វ ឬនៅលើផ្លូវដែលមានសិទ្ធិអាទិភាពបើកជែងគ្នា ដោយខ្វះការប្រុងប្រយ័ត្ន ការមិនគោរពច្បាប់ចរាចរណ៍ និងភ្លើងសញ្ញាចរាចរណ៍និងការបត់ឆ្វេង ឬថយក្រោយគ្មានការប្រុងប្រយ័ត្នជាដើម៕

អត្ថបទ ៖ សំអឿន