ក្រុមឈ្មួញដឹកដីលក់កំពុងបំផ្លាញផ្លូវស្ទើរក្លាយជាប្រឡាយក្នុងក្រុងដូនកែវ

ខេត្តតាកែវ៖ ប្រជាពលរដ្ឋក្រុងដូនកែវមិនពេញចិត្តនឹងក្រុមឈ្មួញដែលធ្វើអាជីវកម្មដឹកដីលក់ដូចហែរកឋិនក្នុងក្រុង បង្កការខូចខាត់ផ្លូវខ្ទេចខ្ទីស្ទើរក្លាយជាប្រឡាយទឹកទៅហើយ។

ប្រជាពលរដ្ឋដែលមានលំនៅដ្ឋានក្បែរៗផ្លូវដែលកំពុងរងផលប៉ះពាល់ ស្ថិតនៅភូមិស្នោរ សង្កាត់រកាក្នុង ក្រុងដូនកែវ បានសំណូមពរដល់អាជ្ញាធរក្រុង និងមន្ត្រីជំនាញពាក់ព័ន្ធខេត្តពិនិត្យចំពោះករណីនេះផង ថាតើគួរបណ្តោយឱ្យក្រុមឈ្មួញធ្វើអាជីវកម្មដោយបំផ្លាញផ្លូវសាធារណៈ ហើយយកលុយចូលហោប៉ៅខ្លួន ឬយ៉ាងណា។

ប្រជាពលរដ្ឋបន្តថា ទីតាំងចេញពីភោជនីយដ្ឋានសម្ផស្សអង្គរ ទៅកើតត្រង់ មានក្រុមហ៊ុនឡានដឹកដី ឆ្លងកាត់តាមផ្លូវនេះចេញចូល ឡើងបែកខូចអស់ហើយ ពិសេសម្ចាស់ក្រុមហ៊ុនឡានដឹកដីមិនបានខ្វល់ និងមិន​ឈូស​ឆាយធ្វើឱ្យបានស្អាតឡើងវិញងាយស្រួសធ្វើដំណើរនោះទេ ដោយទុកឱ្យផ្លូវខូចពិបាកធ្វើដំណើរ ថែមទាំងតៃកុងរថយន្តដឹកដីទាំងនោះបើកបរលឿនៗមិនសំចៃដៃទៀតផង។

ពាក់ព័ន្ធនឹងករណីនេះដែរ លោក កង អាណាន់ អភិបាលក្រុងដូនកែវបានឱ្យដឹងកាលពីរសៀលថ្ងៃទី២១ ខែកក្កដា ឆ្នាំ២០២១ ថា លោកមិនទាន់ដឹងយ៉ាងម៉េចទេ ចាំលោកចុះទៅមើលសិនបានដឹង៕

អត្ថបទ៖ វីរៈ