ព័ត៌មានជាតិ

ពលករខ្មែរជាប់គាំងនៅព្រំដែនរាប់រយនាក់ ត្រូវអាជ្ញាធរឃាត់ ដើម្បីយកសំណាកតេស្ត ទើបអាចឆ្លងចូលខ្មែរបាន

បានផុស

៥ years មុន

នៅ

ថ្ងៃសៅរ៍ ១៤ សីហា ២០២១

ដោយ

បន្ទាយមានជ័យ ៖ នៅវេលាម៉ោង១២យប់ឈានចូល ថ្ងៃទី១៤ ខែសីហា ឆ្នាំ២០២១ នេះមានពលករខ្មែរជាប់គាំងនៅព្រំដែនរាប់រយនាក់ ត្រូវបានអាជ្ញាធរនិងកងកម្លាំងប្រដាប់អាវុធទាំង៣ ធ្វើការទប់ស្កាត់១យប់យកសំណាកទៅពិនិត្យនិងតេស្តរហ័ស រកពលករណាមានវិជ្ជមាន កូវីដ១៩ ដើម្បីមានសិទ្ធិឆ្លងចូលមកស្រុកខ្មែរវិញ បន្ទាប់ពីពួកគេត្រូវដាក់ឲ្យស្នាក់នៅនិងធ្វើចត្តាឡីស័ករយៈពេល១៤ថ្ងៃនៅព្រំដែនហើយ ទើបក្រុមគ្រូពេទ្យនិងក្រុមការងារដឹកជញ្ជូនទៅកាន់មណ្ឌលព្យាបាលនិងមណ្ឌលចត្តាឡីស័កបន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្តមសេនីយ៍ទោ ឈុន ម៉ៅ មេបញ្ជាការទិសទី១បន្ទាយមានជ័យ នៃយោធភូមិភាគទី៥បានប្រាប់អ្នកយកព័ត៌មានឲ្យដឹងថា ការបើកព្រំដែននេះឡើងវិញអាចមានពលករខ្មែរក្នុង១ថ្ងៃស្ទើររាប់ពាន់នាក់បានវិលត្រឡប់ពីថៃ ចូលមកកម្ពុជាវិញ។ ក្នុងនោះកងកម្លាំង ដែលឈរជើងតាមបន្ទាត់ព្រំដែនក្នុងខេត្តបន្ទាយមានជ័យ កំពុងធ្វើការទប់ស្កាត់ឲ្យបានជាដាច់ការលួចឆ្លងដែនតាមច្រករបៀង ឬឆ្លងដែនដោយមិនបានត្រួតពិនិត្យនិងយកសំណាក។

លោកឧត្តមសេនីយ៍ទោ ឈុន ម៉ៅ បានបញ្ជាក់ឲ្យដឹងបន្តទៀតថា ក្នុងអំឡុងពេលបិទខ្ទប់ព្រំដែនរយៈពេល១៤ថ្ងៃកន្លងទៅនេះ កងកម្លាំងនៅព្រំដែនបានឃាត់ពលករឲ្យនៅសម្រាកបណ្តោះអាសន្ននៅព្រំដែនក្នុងភូមិសាស្ត្រស្រុកគោកធ្យូង ខេត្តស្រះកែវថៃនិងស្រុកអូរជ្រៅខេត្តបន្ទាយមានជ័យកម្ពុជា មានចំនួន ១៤៧នាក់ ស្រី ៧២នាក់ និងកុមារ៤នាក់។

ពលករទាំងនោះ ត្រូវបញ្ជូនទៅត្រួតពិនិត្យសុខភាពនៅច្រកអូរបីជាន់ តាមការណែនាំរបស់ក្រសួងសុខាភិបាលអស់ហើយ។ ក្នុងនោះលោកឧត្តមសេនីយ៍ទោ ឈុន ម៉ៅបានធ្វើការអំពាវនាវដល់ពលករខ្មែរ កុំឲ្យចាញ់បោកមេខ្យល់ ឬការញុះញង់លួចឆ្លងដែនដោយខុសច្បាប់ដែលនាំឲ្យខាតបង់លុយកាក់និងអាចនាំឲ្យគ្រោះថ្នាក់ដល់អាយុជីវិតផងដែរ៕

ដោយ ៖ វ៉ាន់ ណាង