ចិន ផ្តល់ជំនួយគ្រាអាសន្នសរុបជាទឹកប្រាក់ ៣១ លានដុល្លារ ឲ្យអាហ្វហ្គានីស្ថាន

ប្រទេសចិន បានសន្យាផ្តល់ជំនួយសរុបជាទឹកប្រាក់ ២០០ លានយ័ន (៣១ លានដុល្លារ) ដល់ប្រទេសអាហ្វហ្គានីស្ថាន ដោយជំនួយនោះ រួមមានការផ្គត់ផ្គង់ស្បៀងអាហារនិងវ៉ាក់សាំងកូវីដ។

ជំនួយនេះកើតឡើង ចំពេលទីក្រុងប៉េកាំងនិយាយថា ខ្លួនបានត្រៀមរួចជាស្រេច ដើម្បីរក្សាទំនាក់ទំនងជាមួយរដ្ឋាភិបាលតាលីបង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុងប៉េកាំងបន្ថែមថា ការបង្កើតរដ្ឋាភិបាលបណ្តោះអាសន្នថ្មី​ គឺជាជំហានចាំបាច់ដើម្បីស្តារសណ្តាប់ធ្នាប់ឡើងវិញនៅ អាហ្វហ្គានីស្ថាន។

គណរដ្ឋមន្ត្រីបណ្តោះអាសន្នរបស់ក្រុមតាលីបង់ ត្រូវបានប្រកាសកាលពីសប្តាហ៍មុន។

ស្របពេលប្រធានាធិបតីអាមេរិកលោក Joe Biden និយាយថា ប្រទេសនេះនៅសល់ផ្លូវឆ្ងាយពីការទទួលស្គាល់រដ្ឋាភិបាលតាលីបង់នោះ ប្រទេសចិនស្រាប់បោះជំហានចូលយ៉ាងលឿន។

រដ្ឋមន្ត្រីការបរទេសចិន លោក Wang Yi បានប្រកាសពីវិធានការជំនួយសម្រាប់អាហ្វហ្គានីស្ថាន នៅក្នុងកិច្ចប្រជុំមួយកាលពីថ្ងៃពុធជាមួយសមភាគីមកពីប្រទេសជិតខាងអាហ្វហ្គានីស្ថានមួយចំនួន មានដូចជា ប៉ាគីស្ថាន អ៊ីរ៉ង់ តាជីគីស្ថាន អ៊ូបេគីស្ថាននិងតួកមេនីស្ថាន។

ស្របពេលជាមួយគ្នានោះដែរ លោកបានអំពាវនាវឲ្យប្រទេសទាំងនេះ សហការគ្នា ជួយអាហ្វហ្គានីស្ថាន។ លោកបន្ថែមថា ប្រទេសចិនក៏នឹងផ្តល់វ៉ាក់សាំងចំនួន ៣ លានដូសដល់ប្រទេសនេះផងដែរ។

គួរបញ្ជាក់ថា មន្រ្តីតាលីបង់ បានពណ៌នាប្រទេសចិន ថាជាដៃគូដ៏សំខាន់បំផុតរបស់អាហ្វហ្កានីស្ថាន និងបានដាក់ក្តីសង្ឃឹមលើការវិនិយោគនិងការគាំទ្ររបស់ចិន ដើម្បីស្តារប្រទេសដែលហែកហួរដោយសង្គ្រាមមួយនេះឡើងវិញ៕

ប្រែសម្រួល៖ Vann Vann

ប្រភព៖ BBC

ចុចអាន៖ តាលីបង់ អនុញ្ញាត ឲ្យអាមេរិក ២០០ នាក់ ចាក ចេញ ពី អាហ្វហ្គានីស្ថាន