លោក បៃដិន ថាឲ្យមេដឹកនាំចិន និងរុស្ស៊ីចំៗ ចំពោះការខកខាន កិច្ចប្រជុំកំពូលស្ដីពីអាកាសធាតុ

ប្រធានាធិបតី​អាមេរិក​លោក ចូ បៃដិន បាន​រិះគន់​មេដឹកនាំ​ចិន និង​រុស្ស៊ី ដែល​មិន​ងាក​មក​ចូលរួម​កិច្ចប្រជុំ​កំពូល​ស្តីពី​អាកាសធាតុ COP26 ខណៈមេដឹកនាំជាង ១២០ នាក់បានបង្ហាញខ្លួននៅក្នុងសន្និសីទនៅទីក្រុងធំបំផុតរបស់ប្រទេសស្កុតឡេន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសុន្ទរកថាមួយកាលពីយប់ថ្ងៃអង្គារលោក បៃដិន បាននិយាយថា អាកាសធាតុគឺជាបញ្ហាដ៏ធំ ហើយប្រទេសចិនបានដើរចេញ ហើយបន្ថែមថា វាគឺជា “រឿងដូចគ្នាជាមួយរុស្ស៊ី និងលោក ពូទីន” ខណៈទាំងប្រធានាធិបតីរុស្ស៊ីលោក វ្ល៉ាឌីមៀ ពូទីន និងប្រធានាធិបតីចិនលោក ស៊ី ជីនពីង សុទ្ធតែមិនមានវត្តមាននៅក្នុងកិច្ចប្រជុំកំពូលនោះ ។

ទោះបីជាយ៉ាងណាក៏ដោយ ប្រទេសទាំងពីរបានបញ្ជូនគណៈប្រតិភូទៅកាន់កិច្ចចរចានោះ ដែលគ្រោងនឹងដំណើរការរយៈពេល ២ សប្តាហ៍រហូតដល់ថ្ងៃទី ១៤ ខែវិច្ឆិកា ។

លោក បៃដិន បាននិយាយថា “អវត្តមានរបស់លោក ស៊ី ជីនពីង គឺជាកំហុសដ៏ធំមួយ ។ ទន្ទឹមនោះ លោកក៏បាននិយាយដូចគ្នាបែបនេះទៅកាន់លោក ពូទីន ផងដែរ ដោយនិយាយថា វាលរហោស្ថានរបស់រុស្ស៊ីកំពុងឆេះ ហើយប្រធានាធិបតីរបស់ពួកគេគ្មានភាពជាម្តាយអំពីបញ្ហានេះឡើយ ។

កន្លងមកកាលពីខែកញ្ញា លោក ស៊ី បានប្រកាសថា ប្រទេសចិននឹងមានបំណងសម្រាប់អព្យាក្រឹតកាបូននៅឆ្នាំ ២០៦០ ជាមួយនឹងផែនការដើម្បីឈានដល់ការបំភាយឧស្ម័នខ្ពស់បំផុត មុនឆ្នាំ ២០៣០ ។

ចំណែកលោកប្រធានាធិបតី ពូទីន បាននិយាយនៅក្នុងសុន្ទរកថាវេទិកាថាមពលអន្តរជាតិកាលពីថ្ងៃទី ១៣ ខែតុលាថា ប្រទេសរុស្ស៊ីក៏នឹងខិតខំដើម្បីឈានដល់អព្យាក្រឹតកាបូនផងដែរ ពោលមិនឲ្យលើសពីឆ្នាំ ២០៦០ ឡើយ ។

គួរបញ្ជាក់ថា ចិន​ជា​ប្រទេស​បញ្ចេញ​កាបូនឌីអុកស៊ីត​ធំ​ជាង​គេ​លើ​ពិភពលោក បន្ទាប់​មក​គឺ​អាមេរិក ខណៈរុស្ស៊ី​ជា​ប្រទេស​ធំ​ទី ៥ ​បន្ទាប់​ពីសហភាពអឺរ៉ុប EU និង​ឥណ្ឌា ៕

ប្រែសម្រួលដោយ ៖ ជីវ័ន្ត

ប្រភព ៖ BBC