អាមេរិក បង្កើនប្រតិបត្តិការនៅ សមុទ្រចិនខាងត្បូង (មានវីដេអូ)

បើយោងតាមការស្រាវជ្រាវថ្មីពីប្រទេសចិនបានបង្ហាញថា នៅឆ្នាំនេះ សហរដ្ឋអាមេរិក បានបង្កើនប្រតិបត្តិការយោធារបស់ខ្លួននៅក្នុងសមុទ្រចិនខាងត្បូង ដែលមានជម្លោះ។

វិទ្យាស្ថានគំនិតផ្តួចផ្តើមស៊ើបអង្កេតសមុទ្រចិនខាងត្បូង (SCSPI) ដែលមានមូលដ្ឋាននៅទីក្រុងប៉េកាំងបាននិយាយថា យោធាអាមេរិកបានធ្វើការហោះហើរឈ្លបយកការណ៍ចំនួន ៥២ លើកនៅលើសមុទ្រចិនខាងត្បូងក្នុងខែតុលា។

យ៉ាងណាក្តី ចំនួនជើងហោះហើរឈ្លបយកការណ៍នៅក្នុងខែតុលា បានធ្លាក់ចុះពី ៦២លើកដែលបានកត់ត្រានៅក្នុងខែកញ្ញា ប៉ុន្តែវិទ្យាស្ថាននេះបាននិយាយថា ប្រតិបត្តិការយោធាអាមេរិកផ្សេងទៀតនៅក្នុងសមុទ្រចិនខាងត្បូង កំពុងកើនឡើងកាន់តែខ្លាំង។

លោក Wu Shicun ប្រធានវិទ្យាស្ថានជាតិសម្រាប់ការសិក្សាសមុទ្រចិនខាងត្បូង បាននិយាយថា សហរដ្ឋអាមេរិកបានធ្វើការហោះហើរឈ្លបយកការណ៍ជាង ៥០០លើក នៅសមុទ្រចិនខាងត្បូងក្នុងឆ្នាំនេះ ហើយចំនួនសរុបបានកើនឡើងដល់ជាង ២,០០០ លើកបើបូករួមទាំងប្រតិបត្តិការលើសមុទ្រលឿង និងសមុទ្រចិនខាងកើត។

កាលពីឆ្នាំមុន អាមេរិកបានអនុវត្តការហោះហើរតិចជាង ១,០០០លើក ប៉ុណ្ណោះ។

លោក Wu បន្តថា ហានិភ័យនៃគ្រោះថ្នាក់រវាងចិន និងអាមេរិកកំពុងកើនឡើង ហើយលោកបានអំពាវនាវឲ្យភាគីទាំងពីរ ពន្លឿនកិច្ចពិភាក្សាអំពីក្រមសីលធម៌។

បន្ថែមពីលើក្រុមវាយប្រហារនៃនាវាផ្ទុកយន្តហោះ Carl Vinson, SCSPI បាននិយាយថា សហរដ្ឋអាមេរិកបានបញ្ជូនក្រុមនាវាផ្ទុកយន្តហោះចំនួនបីគ្រឿងផ្សេងទៀតគឺ Theodore Roosevelt, Nimitz និង Ronald Reagan ទៅសមុទ្រចិនខាងត្បូងក្នុងឆ្នាំនេះ។

រួមគ្នាជាមួយនឹងនាវាចម្បាំងពីរគ្រឿងគឺ USS Makin Island និង USS Essex, នាវាកងទ័ពជើងទឹកអាមេរិក បានឆ្លងកាត់សមុទ្រចិនខាងត្បូងចំនួន ១១លើកក្នុងឆ្នាំនេះ ។

សហរដ្ឋអាមេរិក ក៏បានដាក់ពង្រាយផងដែរនូវយន្តហោះទម្លាក់គ្រាប់បែក B-52H និង B-1B លើដែនទឹកដែលមានជម្លោះចំនួន ១៤ដងក្នុងឆ្នាំនេះ រួមជាមួយនឹងនាវាមុជទឹកដើរដោយថាមពលនុយក្លេអ៊ែរ ១១ដង៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Asian One

ចុចអាន៖ ចិន ចោទ អាមេរិក ថា ឧប្បត្តិហេតុនាវាមុជទឹកនុយក្លេអ៊ែរនៅ សមុទ្រចិនខាងត្បូង ជានយោបាយរបស់ ទីក្រុងវ៉ាស៊ីនតោន