នេះរបៀបប្រើថ្នាំព្យាបាលកូវីដ Molnupiravir និងថ្នាំរបស់ក្រុមហ៊ុន Pfizer

ក្រសួងសុខភាពសាធារណៈថៃបានពន្យល់ពីភាពខុសគ្នារវាងថ្នាំ Molnupiravir របស់ក្រុមហ៊ុន Merck និងថ្នាំ Paxilvid របស់ក្រុមហ៊ុន Pfizer ដែលថ្នាំទាំងពីរនេះជួយកាត់បន្ថយរោគសញ្ញាធ្ងន់ធ្ងរ និងការស្លាប់ពីជំងឺកូវីដ ១៩ ។

ទន្ទឹមនោះលោកវេជ្ជបណ្ឌិត Atthasit Srisubat អ្នកប្រឹក្សាជាមួយនាយកដ្ឋានវេជ្ជសាស្ត្ររបស់ក្រសួងបាននិយាយថា ថ្នាំទាំងពីរនេះមានប្រសិទ្ធភាពក្នុងការកាត់បន្ថយការផ្ទុកមេរោគនៅក្នុងខ្លួនអ្នកជំងឺ ទោះបីជាថ្នាំ Paxilvid ត្រូវប្រើរួមគ្នាជាមួយថ្នាំប្រឆាំងមេរោគមួយផ្សេងទៀតគឺ Ritonavir ដើម្បីឲ្យមានប្រសិទ្ធភាពកាន់តែខ្លាំងក៏ដោយ ។

នេះជាព័ត៌មានលម្អិតខ្លះៗអំពីថ្នាំព្យាបាលកូវីដទាំងពីរ ៖

ថ្នាំ Molnupiravir

• លេបតាមមាត់ ដើម្បីព្យាបាលរោគសញ្ញាគ្រុនផ្តាសាយ
• មានប្រសិទ្ធភាពប្រឆាំងនឹងមេរោគជាច្រើនប្រភេទ
• ការ​ស្រាវជ្រាវ​បង្ហាញ​ថា ថ្នាំ​នេះ​កាត់​បន្ថយ​ហានិភ័យ​នៃ​ការ​ចូល​មន្ទីរពេទ្យ​បាន ៥០ ភាគរយ និង​ការ​ស្លាប់​បាន ១០០ ភាគរយ
• កម្រិតប្រើគឺ ៤ គ្រាប់ ២០០ មីលីក្រាម ។ ថ្នាំ Molnupiravir លេប ២ ដងក្នុងមួយថ្ងៃ (រៀងរាល់ ១២ ម៉ោងម្ដង) រយៈពេល ៥ ថ្ងៃ

ថ្នាំ Paxilovid

• ក្រុមហ៊ុន Pfizer បានប្រកាសថា ថ្នាំដែលប្រើរួមគ្នាជាមួយថ្នាំ Ritonavir គឺមានប្រសិទ្ធភាពដល់ទៅ ៨៩ ភាគរយក្នុងការកាត់បន្ថយហានិភ័យនៃការចូលមន្ទីរពេទ្យ និងការស្លាប់ ។
• លេប ២ ដងក្នុងមួយថ្ងៃរយៈពេល ៥ ថ្ងៃដូចគ្នា
• ថ្នាំ Paxilvid រារាំងសកម្មភាពនៃអង់ស៊ីម Protease និងរារាំងការបង្កើតប្រូតេអ៊ីន

គួរបញ្ជាក់ថា ថ្នាំគ្រាប់របស់ក្រុមហ៊ុន Pfizer អាចនឹងមានលក់នៅលើទីផ្សារក្នុងរយៈពេលពីរបីខែខាងមុខ ខណៈថ្នាំ Molnupiravir របស់ក្រុមហ៊ុន Merck អាចនឹងមានលក់លើទីផ្សារនៅចុងឆ្នាំនេះ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation

ចុចអាន ៖ នេះតម្លៃលេប ៥ ថ្ងៃនៃថ្នាំគ្រាប់កូវីដ Molnupiravir