សុខភាព

ឱ្យកូនក្មេងញ៉ាំបួស ប៉ះពាល់សុខភាពដែរអត់?

បានផុស

៤ years មុន

នៅ

ថ្ងៃចន្ទ ១៣ ធ្នូ ២០២១

ដោយ

Sonya

ក្មេងត្រូវការជីវជាតិច្រើន ដើម្បីការលូតលាស់ធំធាត់។ ចុះបើក្មេងញ៉ាំបួសតាមអ្នកផ្ទះ មានបញ្ហាអីអត់? អាចធ្វើឲ្យក្មេងមានសុខភាពល្អ ឬខ្វះអាហារូបត្ថម្ភ? អត្ថបទនេះនឹងបកស្រាយលម្អិត។

១- អ្វីជាអាហារបួស?

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាហារបួស មានភាពខុសៗគ្នា អាស្រ័យលើវប្បធម៌ តំបន់ និងគោលការណ៍ញ៉ាំបួសរបស់យើងម្នាក់ៗ ប៉ុន្តែអាហារបួស ត្រូវគេចែកចេញជា ៣ ប្រភេទធំៗ៖

– អាហារបួស Lacto-ovo៖ អាហារបួសប្រភេទ Lacto-ovo សំដៅលើអាហារបួស ដែលយើងមិនញ៉ាំសាច់សត្វ សាច់ត្រី និងសាច់សត្វស្លាបទេ គឺញ៉ាំប្រូតេអ៊ីនបានពីទឹកដោះគោស្រស់ ទឹកដោះគោជូរ ឬឈីស ស៊ុត សណ្តែក គ្រាប់ធញ្ញជាតិ និងបន្លែ។

– អាហារបួស Lacto៖ អាហារបួសប្រភេទ Lacto គឺមិនញ៉ាំសាច់ សាច់ត្រី សាច់សត្វស្លាប និងស៊ុតទេ ជំនួសមកវិញដោយញ៉ាំប្រូតេអ៊ីនបានពីទឹកដោះគោស្រស់ ទឹកដោះគោជូរ ឬឈីស សណ្តែក គ្រាប់ធញ្ញជាតិ និងបន្លែ។

– អាហារបួស Vegans៖ អាហារបួសប្រភេទនេះ គឺមិនញ៉ាំសាច់ក្រហម សាច់សត្វស្លាប សាច់ត្រី ស៊ុត និងផលិតផលចេញពីទឹកដោះគោទេ គឺត្រូវញ៉ាំប្រូតេអ៊ីនបានពីសណ្តែក បន្លែ គ្រាប់ធញ្ញជាតិ និងផលិតផលពីសណ្តែកសៀង។ យ៉ាងណា អាហារបួសប្រភេទ Vegans មិនសមស្របសម្រាប់កុមារទេ ដោយសារនឹងនាំឲ្យក្មេងមានបញ្ហាកង្វះអាហារូបត្ថម្ភធ្ងន់ធ្ងរ។

២- អាហារបួសសម្រាប់ក្មេង

ក្មេងអាចញ៉ាំបួសបាន លុះត្រាតែអាហារទាំងនោះមានសារធាតុចិញ្ចឹមគ្រប់គ្រាន់ដូចជា៖

– សារធាតុប្រូតេអ៊ីនជំនួសផ្សេងៗ មានផលិតផលទឹកដោះគោ គ្រាប់ធញ្ញជាតិ ស៊ុត ស្រូវ ឬផលិតផលពីសណ្តែក
– ខ្លាញ់បានពីប្រភពផ្សេងៗ
– អាហារអាចបង្កើនថាមពលសម្រាប់សកម្មភាពប្រចាំថ្ងៃ
– វីតាមីន និងសារធាតុរ៉ែពិសេស ដូចជា វីតាមីន B12 វីតាមីន D និងកាល់ស្យូម។ ជាតិដែកក៏ត្រូវការជាចាំបាច់សម្រាប់ក្មេងៗដូចគ្នា ដើម្បីការពារពីជំងឺទាក់ទងនឹងឈាម ដូចជា ជំងឺស្លេកស្លាំង ជាដើម។
– ផ្សំអាហារឲ្យបានត្រឹមត្រូវ ព្រោះបើអាហារមិនបានត្រូវផ្សំគ្នាបានត្រឹមត្រូវ សារធាតុចិញ្ចឹមក៏មិនត្រូវបានស្រូបយកបាននោះដែរ។

៣- អាហារត្រូវមានក្នុងអាហារបួសក្មេង

– ទឹកដោះគោ៖ ចំពោះក្មេងមានអាយុក្រោម ១២ ខែ ត្រូវបន្តការបៅដោយទឹកដោះ។
– អាហាររឹង៖ ពិភាក្សាជាមួយវេជ្ជបណ្ឌិតពីពេលវេលាត្រឹមត្រូវ ដើម្បីផ្តល់អាហាររឹងដល់កូន។
– អាហារជាតិសរសៃ៖ ត្រូវយកចិត្តទុកដាក់លើការញ៉ាំអាហារសរសៃ ព្រោះបើញ៉ាំជាតិសរសៃច្រើនពេក អាចធ្វើឲ្យរាងកាយពិបាកស្រូបយកសារធាតុរ៉ែ ដូចជា ស័ង្កសី ដែក ឬកាល់ស្យូម។ អាហារសរសៃ អាចធ្វើឲ្យក្មេងមានអារម្មណ៍ថាឆ្អែតបានយូរ នាំឲ្យរារាំងពួកគេញ៉ាំចំណីអាហារចាំបាច់ផ្សេងទៀត។
– ផ្លែឈើ និងបន្លែ៖ ត្រូវព្យាយាមឲ្យកូនញ៉ាំផ្លែឈើ និងបន្លែផ្សេងៗឲ្យបានច្រើនរៀងរាល់ថ្ងៃ។ គួរញ៉ាំផ្លែឈើល្មមៗ ២ ដង/ថ្ងៃ និងបន្លែល្មម ៣ ដង/ថ្ងៃ តាមការណែនាំ។
– ប្រេង៖ ប្រេងសណ្តែក និងប្រេង Canola ជាអាហារដែលល្អមានផ្ទុកអាស៊ីដ Linolenic ដែលមាននាទីយ៉ាងសំខាន់សម្រាប់មុខងារខួរក្បាល និងជាលិកាសរសៃប្រសាទ។ ប្រេង ក៏ជាប្រភពល្អនៃថាមពលផងដែរ។

៤- ចំណុចត្រូវចងចាំ ពេលឲ្យក្មេងញ៉ាំបួស

– ត្រូវមានចំណេះដឹងពីជម្រើសការញ៉ាំអាហារបំប៉ន
– ឲ្យកូនរីករាយជាមួយមុខម្ហូបខុសៗគ្នា
– ចម្អិនអាហារឲ្យបានត្រឹមត្រូវ
– បង្កើនអាហារមានផ្ទុកថាមពល ដូចជា គ្រាប់ធញ្ញជាតិ ផ្លែប៊ើរ ឬផលិតផលទឹកដោះគោ សម្រាប់អាហារសម្រន់
– ក្មេងតូចមិនគួរញ៉ាំរបបអាហារបួសបែបតឹងតែងពេកទេ
– អាចប្រើប្រាស់អាហារជំនួយបន្ថែមបើចាំបាច់ ឬក្រោមការណែនាំពីគ្រូពេទ្យ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ វិធីសាស្ត្រពិសេសសម្រាប់ញ៉ាំបួសបញ្ចុះជាតិខ្លាញ់

ចុចអាន៖ វិធីហូបអាហារបួស ឲ្យមានសុខភាពល្អ ដើម្បីទទួលបានសារធាតុចិញ្ចឹមទាំងអស់