លោក សុខ ទូច៖ អ្នកមានវិជ្ជាជីវផ្នែកម្ហូប​អាហារអាចមានប្រាក់ខែខ្ពស់​ជាងវេជ្ជបណ្ឌិត

ប្រធាន​រាជ​បណ្ឌិត្យ​សភា​កម្ពុជា លោក សុខ ទូច បានថ្លែងថា វេជ្ជបណ្ឌិតអាចមានប្រាក់ខែតិចជាងអ្នកមានវិជ្ជាជីវម្ហូបអាហារ។ លោកសង្កត់ធ្ងន់ថា គ្រប់មនុស្សទាំងអស់ គ្មាននរណាដែលមិនហូបនោះទេ ពោលគឺមនុស្សបរិភោគមួយថ្ងៃបីដង ដូច្នេះប្រសិនបើចេះវិជ្ជាជីវផ្នែកម្ហូបអាហារអាចរកចំណូលបានខ្ពស់បំផុត។ លោក សុខ ទូច ថ្លែងបែបនេះ នៅពិធីចុះអនុស្សរណៈយោគយល់គ្នារវាងរាជបណ្ឌិត្យសភាកម្ពុជា​ សណ្ឋាគារ និងសមាគមទេសចរណ៍កម្ពុជា នៅរសៀលថ្ងៃទី ១៣ ខែ ធ្នូ ឆ្នាំ ២០២១។

លោក សុខ ទូច ផ្តល់តម្លៃខ្ពស់ចំពោះជំនាញវិជ្ជាជី​វពិសេសផ្នែកម្ហូបអាហារនេះ។ លោកថ្លែងដូច្នេះថា« មិនសំខាន់សញ្ញាបត្របណ្ឌិត Masterទេ ឲ្យតែយើងមានវិជ្ជាជីវ ជាក់ស្តែងនៅស្រុកគេ អាចកាត់បន្ថយភាពក្រីក្របាន តែបើគ្មានអាហ្នឹង(វិជ្ជាជីវ) កុំនិយាយកាត់បន្ថយភាពក្រីក្រ កាត់បន្ថយភាពក្រីក្រទាល់មនុស្សមានជំនាញ…ឪពុករបស់យើងលក់ដីចែកឲ្យកូន តែបើមានជំនាញមិនបាច់លក់ដីទេ គេអាចយកជំនាញនឹងទៅលក់ ហើយបានលុយយ៉ាងស្រួល ហើយដីក៏នៅ ផ្ទះក៏នៅ កេរ្តិ៍ឈ្មោះក៏នៅ តំណតកូនតចៅ»។

ប្រធាន​រាជ​បណ្ឌិត្យ​សភា​កម្ពុជា បានគូសបញ្ជាក់ថា ជំនាញមានតួនាទីសំខាន់ណាស់ មានជំនាញ មានចំណេះ នឹងមានចំណូល។ «យើងមានសិទ្ធិសេចក្តីសម្រេចចិត្ត កាលណាយើងគ្មានជំនាញ គេនិយាយអ្វីក៏យើងគាំទ្រគេ តែបើយើងមានចំណេះមានជំនាញ យើងចាត់ចែងជោគវាសខ្លួនយើង យើងរកប្តីប្រពន្ធដោយខ្លួនឯង គ្មានឪពុកម្តាយគូសវាសតទៅទៀតទេ»។

លោក សុខ ទូច បានអះអាងថា ​រាជ​បណ្ឌិត្យ​សភា​កម្ពុជា នឹងឈានទៅបណ្តុះបណ្តាលជំនាញធ្វើម្ហូបអាហារ ដោយសហការជាមួយសាលារាជធានីភ្នំពេញ សាកល្បងក្នុងការធ្វើម្ហូបអាហារដែលមានស្តង់ដារ និងអនាម័យ ដើម្បីទាក់ទាញភ្ញៀវទេសចរ៕ ទួន សុផល