អ្នកកាសែតធ្វើដំណើរជាមួយលោក Blinken តេស្តវិជ្ជមានកូវីដ មុនទៅដល់ ថៃ

សមាជិកម្នាក់នៃអង្គភាពសារព័ត៌មាន ដែលធ្វើដំណើរជាមួយរដ្ឋមន្ត្រីការបរទេសអាមេរិកលោក Antony Blinken ក្នុងដំណើរទស្សនកិច្ចទៅកាន់តំបន់អាស៊ីអាគ្នេយ៍ បានធ្វើតេស្តវិជ្ជមានជំងឺកូវីដ១៩ នៅពេលមកដល់ទីក្រុងគូឡាឡាំពួ ហើយពេលនេះកំពុងធ្វើចត្តាឡីស័ក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការបរទេសលោក Ned Price បាននិយាយថា លោក Blinken និងបុគ្គលិកជាន់ខ្ពស់ត្រូវបានធ្វើតេស្ត រាល់ការឈប់នៃដំណើរជាអន្តរជាតិនេះ រួមទាំងពេលមកដល់ទីក្រុង គូឡាឡាំពួផងដែរ កាលពីល្ងាចថ្ងៃអង្គារ ហើយអ្នកទាំងអស់សុទ្ធតែអវិជ្ជមាន។

កាលពីថ្ងៃអង្គារ អ្នកការទូតកំពូលអាមេរិករូបនេះ ស្ថិតនៅក្នុងទីក្រុងហ្សាកាតា នៃប្រទេស ឥណ្ឌូណេស៊ី មុនពេលចេញដំណើរទៅកាន់ប្រទេសម៉ាឡេស៊ី។ លោក​ត្រូវ​បន្ត​ទៅ​ទីក្រុង​បាងកក​នៅ​ល្ងាច​ថ្ងៃ​ពុធ ​មុន​ជំនួប​ជាមួយ​មន្ត្រី​ថៃ​នៅ​ថ្ងៃ​បន្ទាប់។

លោក Blinken បានធ្វើសន្និសីទសារព័ត៌មានរួមគ្នា ជាមួយរដ្ឋមន្ត្រីការបរទេសម៉ាឡេស៊ី លោក Saifuddin Abdullah កាលពីថ្ងៃពុធ។

អ្នកនាំពាក្យក្រសួងការបរទេសម៉ាឡេស៊ី បាននិយាយថា ខ្លួនត្រូវបានជូនដំណឹងអំពីករណី កូវីដ ដោយស្ថានទូតអាមេរិកកាលពីព្រឹកថ្ងៃពុធ ហើយបុគ្គលរូបនោះត្រូវបានគេដាក់ឲ្យនៅដាច់ដោយឡែកភ្លាមៗ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ លោក Blinken ព្រមានឥតលាក់លៀម អំពីសិទ្ធិមនុស្ស និងលទ្ធិប្រជាធិបតេយ្យរបស់ ឥណ្ឌា