បុគ្គលទាំងនេះ នឹងត្រូវបានក្រុមគ្រូពេទ្យយកវ៉ាក់សាំងកូវីដ-១៩ ទៅចាក់ជូនដល់ទីសំណាក់

ចំពោះប្រជាពលរដ្ឋណាដែលមិនអាចធ្វើដំណើរមកទទួលការចាក់វ៉ាក់សាំងកូវីដ-១៩ បាន ជាពិសេសលោកតា លោកយាយ មានអាយុច្រើន ដែលពិបាកក្នុងការធ្វើដំណើរនោះ គណៈកម្មការចំពោះកិច្ចចាត់វ៉ាក់សាំងកូវីដ-១៩ ស្នើសុំឱ្យគ្រូពេទ្យបន្តយកវ៉ាក់សាំងកូវីដ-១៩ ទៅ ចាក់ជូនដល់ទីសំណាក់របស់ពួកគាត់តែម្ដង។

នេះបើយោងតាម សេចក្ដីជូនព័ត៌មាន របស់ គណៈកម្មការចំពោះកិច្ចចាត់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) ស្ដីពី ការក្រើនរំលឹក នៃការជំរុញការចាក់វ៉ាក់សាំងបង្ការជំងឺកូវីដ-១៩ ដូសមូលដ្ឋាន និងដូសជំរុញ ជូនដល់ប្រជាពលរដ្ឋទាំងអស់នៅ តាមបណ្ដារាជធានីខេត្តទាំង ២៥ ដែល លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជា ប្រធាន គ.វ.ក-១៩ បានផ្ដល់មក “កម្ពុជាថ្មី” នៅ រសៀលថ្ងៃទី ១៦ ខែធ្នូនេះ។

ដើម្បីជំរុញឱ្យការចាក់វ៉ាក់សាំងកូវីដ-១៩ ដូសមូលដ្ឋាន ក៏ដូចជាដូសទី៣ ឬដូសជំរុញ ជូនប្រជាពលរដ្ឋ គណៈកម្មការចំពោះកិច្ចចាត់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) អំពាវនាវដល់ អភិបាលរាជធានីខេត្ត និងប្រធានអនុគណៈកម្មការចំពោះកិច្ចចាត់វ៉ាក់សាំងកូវីដ-១៩ ក្នុងក្របខណ្ឌរាជធានីខេត្ត ទាំងអស់ ធ្វើការណែនាំបន្តទៅអាជ្ញាធរមូលដ្ឋាន ឱ្យបន្តអប់រំផ្សព្វផ្សាយ ដល់ប្រជាពលរដ្ឋគ្រប់ក្រុមអាយុទាំងអស់ឱ្យយល់ពីសារប្រយោជន៍ វ៉ាក់សាំងកូវីដ-១៩ និងលើកទឹកចិត្តពួកគាត់ស្ម័គ្រចិត្តមកទទួលការចាក់វ៉ាក់សាំងកូវីដ-១៩ ឱ្យបានគ្រប់ៗគ្នា។

ជាមួយគ្នានេះ ត្រូវណែនាំដល់គ្រប់ទីតាំងចាក់វ៉ាក់សាំងកូវីដ-១៩ទាំងអស់ រៀបចំ និងបង្កលក្ខណៈងាយស្រួលដល់ប្រជាពលរដ្ឋក្នុងការមក ទទួលការចាក់វ៉ាក់សាំងកូវីដ-១៩ ឱ្យមានភាពរលូន។

គួរបញ្ជាក់ថា យោងតាមអនុសាសន៍សម្ដេចតេជោនាយករដ្ឋមន្ត្រី និងដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ ជាពិសេសវីរុសបំប្លែងថ្មីប្រភេទដែលតា និងអូមីក្រុង ដែលកំពុងចរាចរយ៉ាងសកម្មនៅ តាមប្រទេសមួយចំនួន គ.វ.ក-១៩ សូមក្រើនរំលឹកសាធារណជនដែលមានអាយុចាប់ពី ៥ ឆ្នាំឡើងទៅ មកចាក់វ៉ាក់សាំងកូវីដ-១៩ ដូសមូលដ្ឋាន និងដូសជំរុញឱ្យបានគ្រប់ៗគ្នា នៅ ទីតាំងនៅ ជិតទីសំណាក់របស់ខ្លួន។ កំណើនអត្រាចាក់វ៉ាក់សាំងកូវីដ-១៩ នៅ កម្ពុជា គិតត្រឹមថ្ងៃទី ១៥ ខែឆ្នូ ឆ្នាំ២០២១ លទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦ លាន នាក់ មានចំនួន ៨៨,៨៥%៕

អត្ថបទ៖ ច័ន្ទ វីរៈ