ព័ត៌មានអន្ដរជាតិ

លោក បៃដិន ប្រាប់លោក Boric ថា ការបោះឆ្នោតនៅឈីលីជាគំរូដ៏មានឥទ្ធិពល

បានផុស

៥ years មុន

នៅ

ថ្ងៃសុក្រ ៣១ ធ្នូ ២០២១

ដោយ

ប្រធានាធិបតីសហរដ្ឋអាមេរិក លោក ចូ បៃដិន បានប្រាប់បុរសឆ្វេងនិយមលោក Gabriel Boric ដែលទើបឈ្នះឆ្នោតក្លាយជាប្រធានាធិបតីឈីលីវ័យក្មេងបំផុតថា ការបោះឆ្នោតដោយសេរី និងយុត្តិធម៌របស់ឈីលីបង្កើតបានជាគំរូដ៏មានឥទ្ធិពលមួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីសារព័ត៌មាននៅសេតវិមាន លោកស្រី Jen Psaki និយាយក្នុងសេចក្តីថ្លែងការណ៍មួយថា លោក បៃដិន ហៅទូរសព្ទទៅលោក Boric កាលពីថ្ងៃព្រហស្បតិ៍ដើម្បីអបអរសាទរ ហើយមេដឹកនាំទាំងពីរបានពិភាក្សាគ្នាពីការប្តេជ្ញាចិត្តដើម្បីលើកកម្ពស់យុត្តិធម៌សង្គម ប្រជាធិបតេយ្យ សិទ្ធិមនុស្ស និងកំណើនរួម។

លោកស្រីថា ៖«លោកប្រធានាធិបតីបានចាត់ទុកការបោះឆ្នោតដោយសេរី និងយុត្តិធម៌របស់ឈីលីគឺជាគំរូដ៏មានឥទ្ធិពលមួយនៅក្នុងតំបន់ និងពិភពលោក»។

ជ័យជម្នះរបស់លោក Boric បានក្លាយជាការកត់សំគាល់នៃការឈានទៅមុខមួយកម្រិតទៀតសម្រាប់មេដឹកនាំឆ្វេងនិយមរបស់ប្រទេសអាមេរិកឡាទីន ដែលជំរុញពីកិច្ចពិភាក្សានៃជំនោរពណ៌ផ្កាឈូកថ្មីនៅក្នុងតំបន់ ដោយសារតែភាពក្រីក្រខ្លាំងពីវិបត្តិកូវីដ-១៩បានទាក់ទាញអ្នកបោះឆ្នោតឲ្យផ្តោតលើអ្នកសន្យាដើម្បីលើកកម្ពស់សេដ្ឋកិច្ចដើម្បីអនុគ្រោះដល់រដ្ឋាភិបាលធំជាង និងការចំណាយលើសង្គមច្រើនជាង។

លោកស្រីបន្តថា លោក បៃដិន បានគូសបញ្ជាក់ពីសារសំខាន់នៃកិច្ចសហប្រតិបត្តិការអាមេរិក-ឈីលីដើម្បីផ្សព្វផ្សាយចំពោះការងើបឡើងវិញប្រកបដោយបៃតង និងសមធម៌ពីវិបត្តិកូវីដ ហើយដោះស្រាយការគំរាមកំហែងអត្ថិភាពដែលបង្កឡើងដោយការប្រែប្រួលអាកាសធាតុ។

ការបោះឆ្នោតកាលពីថ្ងៃអាទិត្យ ទី១៩ ខែធ្នូ លោក Gabriel Boric អាយុ៣៥ឆ្នាំទទួលបានសំឡេងគាំទ្រ៥៥.៨%ដែលនាំមុខ១២%លើគូប្រជែងស្តាំនិយម Jose Antonio Kast អាយុ៥៥ឆ្នាំ។ លោកបានក្លាយជាប្រធានាធិបតីវ័យក្មេងបំផុត និងឆ្វេងនិយមបំផុតនៅក្នុងប្រវត្តិសាស្ត្រនាសម័យកាលទំនើបរបស់ឈីលី៕

ប្រែសម្រួល៖ វីរបុត្រ
ប្រភព៖ reuters

Related Topics:ប្រទេសឈីលី