ព័ត៌មានអន្ដរជាតិ

វិស្វករកងទ័ពជើងទឹកអាមេរិកម្នាក់ព្យាយាមលក់អាថ៌កំបាំងនុយក្លេអ៊ែរទៅប្រទេសផ្សេង

បានផុស

៤ years មុន

នៅ

ថ្ងៃអង្គារ ១៥ កុម្ភៈ ២០២២

ដោយ

ក្រសួងយុត្តិធម៌អាមេរិកបាននិយាយថា វិស្វករកងទ័ពជើងទឹកអាមេរិកម្នាក់បានសារភាពនៅក្នុងតុលាការកាលពីថ្ងៃចន្ទ ទី១៤ ខែកុម្ភៈថា គាត់បានព្យាយាមលក់ជារឿងសម្ងាត់អំពីនាវាមុជទឹកនុយក្លេអ៊ែរទៅឲ្យប្រទេសផ្សេងមួយ។

បុរសឈ្មោះ Jonathan Toebbe អាយុ៤៣ឆ្នាំបានសារភាពកំហុសចំពោះមុខចៅក្រម រយៈពេលជាង៤ខែ បន្ទាប់ពីត្រូវបានចាប់ខ្លួនជាមួយប្រពន្ធឈ្មោះ Diana Toebbe។ ជាថ្នូរនឹងការសារភាពកំហុស គាត់ត្រូវបានគេរំពឹងកាត់ទោសឲ្យជាប់ពន្ធនាគារចន្លោះពី១២ឆ្នាំកន្លះទៅ១៧ឆ្នាំកន្លះ។

រហូតដល់ពេលនេះ ប្រពន្ធរបស់គាត់ដែលជាគ្រូបង្រៀនមិនមានកំហុសនៅឡើយទេ និងបានស្វែងរកការដោះលែងដើម្បីមើលថែកូនតូចពីរនាក់ ប៉ុន្តែការអង្វរដើម្បីប្តីក៏ធ្វើឲ្យនាងរងការរិះគន់ដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកសារបាននិយាយថា ៖«Diana Toebbe ដែលបានដឹង និងស្ម័គ្រចិត្តចូលរួមឃុបឃិតបានទំនាក់ទំនងទិន្នន័យកំហិតទៅបុគ្គលផ្សេងដោយចេតនាដើម្បីទទួលបានផលប្រយោជន៍ពីប្រទេសបរទេស និងបានប្រព្រឹត្តអំពើហួសហេតុជាច្រើនដើម្បីឃុបឃិត»។

ទោះបីជាយ៉ាងណា ឯកសារតុលាការមិនបាននិយាយថា តើប្រទេសណាដែលប្តីប្រពន្ធនេះព្យាយាមលក់ព័ត៌មានឲ្យ។ ឯកសារគ្រាន់តែបញ្ជាក់ថា ជាប្រទេសសម្ព័ន្ធមិត្តរបស់សហរដ្ឋអាមេរិក ដែលប្រើភាសាចម្បងមិនមែនជាភាសាអង់គ្លេស។

នាវាមុជទឹកនុយក្លេអ៊ែរអាមេរិកបានស្ថិតនៅចំកណ្តាលនៃវិបត្តិការទូតក្តៅគគុកកាលពីខែកញ្ញា ឆ្នាំមុន នៅពេលប្រទេសអូស្ត្រាលីបានលុបចោលកិច្ចព្រមព្រៀងធំមួយជាមួយប្រទេសបារាំងដើម្បីប្រកាសពីការចាប់ដៃគូយុទ្ធសាស្ត្រជាមួយសហរដ្ឋអាមេរិក និងចក្រភពអង់គ្លេស។

ក្រសួងយុត្តិធម៌អាមេរិកបាននិយាយក្នុងសេចក្តីថ្លែងការណ៍របស់ខ្លួនថា Toebbe បានធ្វើការតាំងពីឆ្នាំ២០១២ជាអ្នកឌីហ្សាញម៉ាស៊ីនរេអាក់ទ័រសម្រាប់នាវាមុជទឹកកម្រិត Virginia ដែលជានាវាមុជទឹកវាយប្រហារជំនាន់ថ្មីរបស់អាមេរិក។

ក្រសួងបាននិយាយថា ក្នុងខែមេសា ឆ្នាំ២០២០ គាត់បានបញ្ជូនកញ្ចប់ទៅប្រទេសមួយជាមួយសំណុំឯកសារដើម និងគោលការណ៍សម្រាប់ការបង្កើតទំនាក់ទំនងតាមរយៈអាសយដ្ឋានត្រឡប់មកវិញនៅ Pittsburgh ក្នុងរដ្ឋ Pennsylvania។ កញ្ចប់នោះមាន “គំរូនៃទិន្នន័យដែលបានដាក់កំហិត និងសេចក្តីណែនាំសម្រាប់បង្កើតទំនាក់ទំនងសម្ងាត់ដើម្បីទិញទិន្នន័យកំហិតបន្ថែម»៕

ប្រែសម្រួល៖ វីរបុត្រ
ប្រភព៖ AFP

Related Topics:សហរដ្ឋអាមេរិក