ថៃ រឹតបន្តឹងសន្តិសុខ​​នៅ​ស្ថានទូត​អ៊ុយក្រែន និង​រុស្ស៊ី​ ក្នុង​ទីក្រុង ​បាងកក

ប៉ូលិសក្រុងបាងកក បានបង្កើនសន្តិសុខនៅក្នុងតំបន់ជុំវិញស្ថានទូតអ៊ុយក្រែននិងរុស្ស៊ី ខណៈភាពតានតឹងរវាងប្រទេសទាំងពីរ កំពុងកើនឡើងខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Kritsana Patanacharoen មក​ពី​នគរបាលជាតិថៃបាន​និយាយ​ថា សន្តិសុខ​ទាំង​នៅ​ស្ថានទូត និង​តំបន់​ជុំវិញ​ត្រូវ​បាន​រឹត​បន្តឹង​ដោយសារ​ស្ថានភាព​នេះ។ ប៉ូលិសនៅតែបន្តតាមដានការវិវត្តនានាយ៉ាងយកចិត្តទុកដាក់ ប៉ុន្តែមកទល់ពេលនេះ មិនមានការព្រួយបារម្ភចំពោះសន្តិសុខរបស់ប្រទេសថៃនោះទេ។

យ៉ាងណាក្តី លោក Kritsana និយាយថា ពួកគេនៅតែមានការប្រុងប្រយ័ត្នខ្ពស់ចំពោះឧប្បត្តិហេតុសន្តិសុខណាមួយដែលអាចកើតមានឡើង។

ថ្វីបើជម្លោះមិនមានជាប់ពាក់ព័ន្ធជាមួយប្រទេសថៃក៏ដោយ ប៉ុន្តែប៉ូលិសសាខាពិសេស, ការិយាល័យប៉ូលិសទេសចរណ៍, ការិយាល័យស៊ើបអង្កេតកណ្តាល និងការិយាល័យស៊ើបអង្កេតឧក្រិដ្ឋកម្មតាមអ៊ីនធើណិត មានការប្រុងប្រយ័ត្នជានិច្ចដើម្បីការពារឧប្បត្តិហេតុណាមួយ។

លោក Kritsana បន្ថែមថា សាធារណជនរូបណា ដែលមានព័ត៌មានទាក់ទងនឹងជម្លោះរវាងជនជាតិអ៊ុយក្រែន និងរុស្ស៊ីដែលរស់នៅក្នុងប្រទេសថៃ គួរតែជូនដំណឹងដល់អាជ្ញាធរ។

ស្របពេលជាមួយគ្នានោះដែរ លោក Jirasan Kaewsaeng-ek មកពីការិយាល័យប៉ូលិសក្រុង បាននិយាយថា មន្ត្រីសាខាពិសេស មន្ត្រីល្បាត និងភ្នាក់ងារសន្តិសុខផ្សេងទៀត កំពុងត្រួតពិនិត្យស្ថានទូតទាំងពីរ។ 

ទោះបីជាយ៉ាងណាក៏ដោយ ស្ថាប័នទាំងពីរមិនបានស្នើសុំជំនួយពីប៉ូលិសថៃនៅឡើយទេ៕

ប្រែសម្រួល៖ Vann Vann

ប្រភព៖ Thaiger

ចុចអាន៖ រាជធានីថៃ នឹងប្តូរទៅឈ្មោះផ្លូវការ វែងជាងគេបំផុតលើពិភពលោក