មកមើលកម្លាំងទ័ពប្រទេសទាំង២ តើរុស្ស៊ី ខ្លាំងជាងអ៊ុយក្រែន ប៉ុនណា?

ប្រទេសរុស្សី មានកម្លាំងយោធាច្រើនជាងអ៊ុយក្រែនដោយគ្របដណ្តប់ទាំងលើដីគោក អាកាស និងសមុទ្រ។

រុស្ស៊ីមានយោធាសកម្មចំនួន ៩០០ ០០០នាក់នៅក្នុងកងកម្លាំងរបស់ខ្លួន បើធៀបនឹងចំនួន ១៩៦ ៦០០នាក់របស់អ៊ុយក្រែន។

អ្វីដែលខុសគ្នាខ្លាំងបំផុតនោះគឺដែនសមុទ្រ ដោយរុស្ស៊ីមានទាហានជើងទឹក លើសអ៊ុយក្រែនដល់ទៅ ១០ដងឯណោះ។

កងទ័ពជើងទឹករុស្ស៊ីប្រតិបត្តិការនាវាចម្បាំងចំនួន៧៤គ្រឿង និងនាវាមុជទឹកចំនួន៥១គ្រឿង បើធៀបនឹងនាវាចម្បាំងត្រឹមតែពីរគ្រឿងប៉ុណ្ណោះរបស់អ៊ុយក្រែន។

ទោះបីជាយ៉ាងណាក៏ដោយ សមត្ថភាពនៅលើដីគោក ហាក់ដូចជាមានគម្លាតមិនសូវឆ្ងាយពីគ្នាប៉ុន្មានទេ។ រុស្ស៊ីមានទាហាន ១៨០ ០០០នាក់ បើធៀបនឹងអ៊ុយក្រែនមាន ១២៥ ៦០០នាក់។

អ៊ុយក្រែនក៏មានទាហានបម្រុងចំនួន៩០០ ០០០នាក់ផងដែរ ដែលទាហានទាំងនោះបានទទួលការហ្វឹកហ្វឺនក្នុងរយៈពេល៥ឆ្នាំចុងក្រោយ បើធៀបនឹងចំនួន ២លាននាក់របស់រុស្ស៊ី។

លើសពីនេះ រុស្ស៊ីមានកាំភ្លើងធំច្រើនជាងអ៊ុយក្រែន៣ដង រថក្រោះច្រើនជាង៦ដង និងរថពាសដែកច្រើនជាងជិត៧ដង។

នៅលើអាកាស រុស្ស៊ីមានយន្តហោះវាយប្រហារនិងឧទ្ធម្ភាគចក្រ ច្រើនជាង អ៊ុយក្រែន ១០ដង។ អ៊ុយក្រែន ​មានមីស៊ីល​បាញ់​ពី​ដីទៅ​អាកាស​ជាង ៤០០ គ្រាប់​ ដែល​អាច​បាញ់ទម្លាក់​យន្តហោះ​បាន ថ្វីបើ​ចំនួននេះស្មើនឹង​ ​មួយ​ភាគ​ដប់​នៃ​ចំនួន​ដែល​រុស្សី​មាន​ក៏​ដោយ។

រុស្សីក៏ខ្លាំងផងដែរជាមួយនឹងសព្វាវុធរយៈចម្ងាយឆ្ងាយ ពោលគឺមានមីស៊ីលផ្លោងបាញ់ចេញពីលើដីជាង៥០០គ្រាប់៕

ប្រែសម្រួល៖ Vann Vann

ប្រភព៖ Sky

ចុចអាន៖ ប្រជាជនអ៊ុយក្រែន សម្រុកចាកចេញពីទីក្រុង គៀវ និងដកលុយពីទូ ATM (មានវីដេអូ)