មេដឹកនាំហ្វាំងឡង់ ចេញមុខគាំទ្រឲ្យប្រទេសចូល ណាតូ

ប្រធានាធិបតីហ្វាំងឡង់លោក Sauli Niinisto និងនាយករដ្ឋមន្ត្រីលោកស្រី Sanna Marin បានចេញសេចក្តីថ្លែងការណ៍រួមថា ពួកគេគាំទ្រឲ្យប្រទេសនេះ ចូលជាសមាជិករបស់អង្គការណាតូ។

សេចក្តីថ្លែងការណ៍និយាយថា “ហ្វាំងឡង់ គួរតែដាក់ពាក្យដោយមិនបង្អង់យូរ ដើម្បីចូលរួមជាមួយណាតូ។ យើងសង្ឃឹមថា វិធានការក្នុងប្រទេស ដែលនៅតែចាំបាច់ដើម្បីធ្វើការសម្រេចចិត្តនេះ នឹងធ្វលឡើងយ៉ាងឆាប់រហ័សក្នុងរយៈពេលពីរបីថ្ងៃខាងមុខ”។

សេចក្តីថ្លែងការណ៍ដដែលនិយាយថា សមាជិកភាពរបស់អង្គការណាតូ នឹងពង្រឹងសន្តិសុខរបស់ប្រទេសហ្វាំងឡង់។

ស្របពេលជាមួយគ្នានោះ សហរដ្ឋអាមេរិករំពឹងថា ប្រទេសស៊ុយអែតនឹងដាក់ពាក្យសុំជាផ្លូវការរបស់ខ្លួន ដើម្បីក្លាយជាសមាជិកពេញសិទ្ធិរបស់អង្គការណាតូ នៅត្រឹមចុងខែមិថុនា ចំណែកហ្វាំងឡង់អាចប្រកាសជាផ្លូវការនូវសេចក្តីសម្រេចចិត្តរបស់ខ្លួន លើការចូលជាសមាជិកក្នុងខែនេះ។

យោងតាមរបាយការណ៍របស់ប្រព័ន្ធផ្សព្វផ្សាយកាលពីថ្ងៃព្រហស្បតិ៍, ប្រទេសស៊ុយអែតគ្រោងនឹងដាក់ពាក្យសុំចូលជាសមាជិក ណាតូ នៅថ្ងៃទី ១៦ ខែឧសភា។

គួរបញ្ជាក់ថា ហ្វាំងឡង់ និងស៊ុយអែត បានចាប់ផ្តើមពិភាក្សាគ្នាអំពីលទ្ធភាពនៃការបោះបង់ចោលអព្យាក្រឹតភាពយូរអង្វែង ហើយចូលរួមជាមួយអង្គការណាតូ ចំពេលប្រតិបត្តិការយោធារុស្ស៊ីនៅអ៊ុយក្រែន។

ប្រមុខអង្គការណាតូលោក Jens Stoltenberg បាននិយាយកាលពីខែមីនាថា ណាតូ នឹងស្វាគមន៍ដោយរីករាយជាមួយហ្វាំងឡង់ និងស៊ុយអែត ហើយនឹងផ្តល់ឲ្យពួកគេនូវឱកាសដើម្បីចូលរួមសម្ព័ន្ធភាពនេះយ៉ាងឆាប់រហ័ស៕

ប្រែសម្រួល៖ Vann Vann

ប្រភព៖ Sputnik

ចុចអាន៖ អង់គ្លេស ហ្វាំងឡង់ និងស៊ុយអែត ចុះកិច្ចព្រមព្រៀងសន្តិសុខជួយគ្នា បើប្រទេសណារងការវាយប្រហារ