អាងប្រព្រឹត្តិកម្មទឹកកខ្វក់ទី៣នៅខេត្តព្រះសីហនុ សម្រេចការសាងសង់បាន៥០ភាគរយ

អាងប្រព្រឹត្តកម្មទឹកកខ្វក់ទី៣ មានសមត្ថភាពចម្រោះទឹកកខ្វក់បាន២ម៉ឺនម៉ែត្រគូប ក្នុងមួយថ្ងៃ សម្រេចការសាងសង់​បានចំនួន ៥០ភាគរយហើយ គិតត្រឹមថ្ងៃទី ០២ ខែមិថុនា នេះ។

នៅក្នុងឱកាសចុះពិនិត្យការដ្ឋានសាងសង់អាងប្រព្រឹត្តិកម្មទឹកកខ្វក់ទី៣ នៅព្រឹកថ្ងៃទី០២មិថុនានេះ លោក គួច ចំរើន អភិបាលខេត្តព្រះសីហនុបាន​កោតសរសើរ និងវាយតម្លៃខ្ពស់ចំពោះក្រុមការងារបច្ចេកទេស ទោះបីមានភ្លៀងយ៉ាង​ណាក៏ដោយ ក៏ក្រុ​មការងារនៅ​តែបំពេញការងារយ៉ាងមមាញឹក។

ជាមួយគ្នានេះ លោកអភិបាលខេត្តបានធ្វើការណែនាំឱ្យក្រុ​មការងា​របច្ចេកទេស ត្រូវបង្កើនសកម្មភាពការងារឱ្យកាន់​តែលឿន​បន្ថែមទៀត ដើម្បីឱ្យការដ្ឋាន​អាង​ប្រព្រឹត្តិកម្មទឹកកខ្វក់ទី៣ បានឆាប់រួចរាល់តាមផែនការគ្រោងទុក ប្រកបដោយ​គុណភាព​តាម​ស្តង់ដារបច្ចេកទេស និងធានាបានការប្រើប្រាស់យូរអង្វែង សម្រាប់ជាផលប្រយោ​ជន៍រួមរបស់​យើង​ទាំង​អស់គ្នា។

លោកអភិបាលខេត្ត បានមានប្រសាសន៍ថា ការដ្ឋានអាងប្រព្រឹត្តិកម្មទឹកកខ្វក់ទី៣ បែងចែកជាពីរដំណាក់កាល ដោយដំណាក់កាលទី១-សំណង់​ទី​វាល អាចបញ្ចប់មុនចូលឆ្នាំខ្មែរ ឆ្នាំ២០២៣ខាងមុខ និងដំណាក់កាល​ទី២-ពាក់ព័ន្ធនឹងប្រព័ន្ធមេកានិក នឹងត្រូវបន្ត​ប្រហែល ៣ ទៅ ៤ខែបន្ថែមទៀត ដោយត្រូវធ្វើតេស្តលើ​ប្រព័ន្ធបច្ចេកទេសឱ្យបានរួចរាល់។

អាងប្រព្រឹត្តកម្មទី៣នេះដំណើរការដោយបច្ចេកវិទ្យាចុងក្រោយ របស់អ៊ីស្រាអែល MABR វាមានលទ្ធភាពដកអាម៉ូញាក់ កាបូនឌីអ៊ុកស៊ីត បាក់តេរី និងសារធាតុពុល ហើយទឹកដែលប្រព្រឹត្តកម្មរួច មិនមានជាតិពុលដល់បរិស្ថាន និងជីវៈចម្រុះ​ក្នុងសមុទ្រ វាមានគុណភាពប្រកបដោយស្តង់ដារខ្ពស់ ហើយស្ថានីយប្រព្រឹត្តកម្មនេះ ផ្តល់ផលប្រយោជន៍សេដ្ឋកិច្ច និងសង្គមដល់ខេត្តព្រះសីហនុធ្វើឱ្យបរិស្ថានល្អ សោភ័ណភាព និងទទួលបានភ្ញៀវទេសចរច្រើននាពេលខាងមុខ។

បច្ចុប្បន្ននេះ ខេត្តព្រះសីហនុមានអាងប្រព្រឹត្តិកម្មទឹកកខ្វក់ចំនួន៣ ក្នុងនោះអាងប្រព្រឹត្តិកម្មទឹកកខ្វក់ទី១ មានសមត្ថភាព​ប្រព្រឹត្តិកម្មទឹកកខ្វក់ក្នុងបរិមាណ ៥.២00 ម៉ែត្រគូប ក្នុងមួយថ្ងៃទទួលរងទឹកកខ្វក់ពីតំបន់ទី៣ ដែលមានផ្ទៃដី ៣៦៤ហិកតា ស្ថិតក្នុងសង្កាត់លេខ៣។

អាងប្រព្រឹត្តិកម្មទឹកកខ្វក់ទី២ មានសមត្ថភាពប្រព្រឹត្តិកម្មទឹកកខ្វក់ក្នុងបរិមាណ ៧.២00 ម៉ែត្រគូប ក្នុងមួយថ្ងៃទទួលរង​ទឹកកខ្វក់ពីតំបន់ទី៤ ដែលមានផ្ទៃដី ៤៨៦ហិកតា ស្ថិតក្នុងសង្កាត់លេខ៣។

ចំណែកឯអាងប្រព្រឹត្តិកម្មទឹកកខ្វក់ទី៣ ដែលសាងសង់បាន៥០ភាគរយនេះ មានសមត្ថភាពប្រព្រឹត្តិកម្មទឹកកខ្វក់ក្នុង​បរិមាណ ២០.០០០ម៉ែត្រគូប ក្នុងមួយថ្ងៃទទួលរងទឹកកខ្វក់ពីតំបន់ទី៥ និងតំបន់ទី៦ ដែលមានផ្ទៃដី ២.៦៩០ហិកតា ស្ថិតក្នុងសង្កាត់លេខ៤។

ក្រៅពីស្ថានីយប្រព្រឹត្តិកម្មទឹកកខ្វក់ទាំង៣ខាងលើខេត្តព្រះសីហនុ នៅមានស្ថានីយបូមទឹកកខ្វក់ចំនួន ៧ទីតាំងផ្សេងទៀត ក្នុងនោះ៤ទីតាំង ស្ថាបនាដោយគណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជា និង ៣ទីតាំងទៀតស្ថាប​នា​ដោយក្រសួងសាធារណការ និងដឹកជញ្ជូនដើម្បីបូមទឹកកខ្វក់ទម្លាក់ទៅស្ថានីយ​ច្រោះសម្អាតទឹកកាក​សំណល់ ក្រុងព្រះសីហនុចំនួន១៦ ហិកតា។

សូមរំលឹកថា អាងប្រព្រឹត្តកម្មទឹកកខ្វក់ទី៣ បានចាប់ផ្តើមសាងសង់នៅថ្ងៃទី ១៨ខែ កញ្ញាឆ្នាំ២០២១ មានតម្លៃ ២០លានដុល្លារអាមេរិក។ សំអឿន