តារាភេទទី ៣ បើករថយន្តបុកម៉ូតូ ព្យាយាមបើករត់គេ​ចទាំងម៉ូតូជាប់ក្រោមរថយន្ត

តារាសម្តែងភេទទី៣ល្បីក្នុងបណ្តាញសង្គមហ្វេសប៊ុក ដែល​ត្រូវបានគេស្គាល់ស្ថិតក្នុងក្រុម Pey pey dy បានបើករថយន្តក្នុងល្បឿនយ៉ាងលឿនទៅបុកជាមួយម៉ូតូ ១ គ្រឿង បណ្តាលឲ្យរងរបួសធ្ងន់ ហើយព្យាយាមបើករត់គេចទាំងម៉ូតូជាប់ក្រោមរថយន្ត។

ហេតុការណ៍គ្រោះថ្នាក់ចរាចរណ៍ដ៏ភ្ញាក់ផ្អើលនេះ បានកើតឡើងកាលពីវេលាម៉ោងប្រមាណ៣ទៀប​ភ្លឺ​ឈានចូលថ្ងៃទី ០៤ខែមិថុនា ឆ្នាំ២០២២ ស្ថិតក្នុងសង្កាត់វាល់វង្សខណ្ឌ៧មករា រាជធានីភ្នំពេញ។

បើតាមប្រភពព័ត៌មានបានឲ្យដឹងថា តារាសម្ដែងក្នុងក្រុម Pey pey dy ឈ្មោះ ហ័ង បានបើករថយន្ត Mazda6 មួយគ្រឿងក្នុងល្បឿនលឿន រួចក៏ជ្រុលចង្កូតទៅបុកជាមួយម៉ូតូឌ្រីមសង់ C125 បណ្ដាលឱ្យអ្នកបើកបរម៉ូតូរងរបួសធ្ងន់។

ប្រភពបន្តថា ក្រោយបង្កហេតុរថយន្តតារាហ្វេសប៊ុកភេទទី៣រូបនេះ មិនបានឈប់ដើម្បីទទួលខុសត្រូវទេផ្ទុយទៅវិញគឺបាន​ព្យាយាមបើករត់គេចទាំងម៉ូតូជាប់ក្រោមរថយន្ត តាំងពីពេទ្យសម្ភពក្រុង​រហូតមកដល់ស្តុប​អាងទឹក​អូឡាំពិចទើបរថយន្តទៅមុខលែងរួច​ហើយក៏ត្រូវបានសមត្ថកិច្ចតាមឃាត់​ទាំងរថយន្តនិងអ្នកបើកបរដែលជាតារាភេទទី៣នេះតែម្តង។

ប្រភពបានបន្ថែមថា តារាភេទទី៣ឈ្មោះហ័ងគឺបើកបរស្ថិតក្នុងស្ថានភាពស្រវឹងផងដែរ ខណ:សាមីខ្លួនក៏បានផ្តល់សម្ភាសន៍ប្រាប់ក្រុមអ្នកសាព័ត៌មានដែរមុនពេលកើតហេតុខ្លួនបានចូលទៅផឹកស៊ីជួបជុំមិត្តភក្តិនៅក្នុងក្លឹបមួយផងដែរ

ជនបង្កភេទទី៣រូបនេះ ត្រូវបានសមត្ថកិច្ចធ្វើការឃាត់ខ្លួនយកទៅសួរនាំនៅខណ្ឌ៧មករាទាំងយប់ផងដែរ៕

អត្ថបទ៖ ចាន់រ៉ា