លោក Zelensky ឲ្យពិភពលោកដាក់ទណ្ឌកម្ម រុស្ស៊ី ២៤ ម៉ោងក្នុងមួយថ្ងៃ

ប្រធានាធិបតីអ៊ុយក្រែនលោក Volodymyr Zelensky បាននិយាយទៅកាន់និស្សិតសាកលវិទ្យាល័យកាណាដាកាលពីថ្ងៃព្រហស្បតិ៍ថា “យើងត្រូវការអាវុធ ជំនួយផ្នែកហិរញ្ញវត្ថុ ក៏ដូចជាជំនួយមនុស្សធម៌ជាដើម ហើយស្នើឲ្យពិភពលោកដាក់ទណ្ឌកម្មរុស្ស៊ី ២៤ ម៉ោងក្នុងមួយថ្ងៃជារៀងរហូត” ។

លោកបាននិយាយថា “មិនថាខ្ញុំនិយាយរឿងនេះប៉ុន្មានដងទៀតនោះទេ ខ្ញុំត្រូវការជំនួយបន្ថែមទៀតសម្រាប់ប្រទេសដែលកំពុងរងគ្រោះ ហើយខ្ញុំគិតថា ការនិយាយដដែលៗនេះវាមិនដែលច្រើនពេកទេ ខណៈពេលដែលសង្រ្គាមកំពុងបន្ត” ។

លោកប្រធានាធិបតីបានប្រាប់និស្សិតតាមវីដេអូទៅសាកលវិទ្យាល័យចំនួន ១០ នៅទូទាំងប្រទេសកាណាដាថា “យើងកំពុងប្រយុទ្ធដើម្បីសេរីភាព ដោយសារតែគោលដៅរបស់រុស្ស៊ីគឺកាន់កាប់ពេញលេញនៃទឹកដីអ៊ុយក្រែន” ។

ទន្ទឹមនោះលោក Zelensky ក៏បានលើកឡើងផងដែរថា បច្ចុប្បន្នអ៊ុយក្រែនបានធ្វើឲ្យពិភពលោកភ្ញាក់ផ្អើលរួចទៅហើយ ដោយសារការការពារដ៏រឹងមាំរបស់ខ្លួនប្រឆាំងនឹងអំណាចនៃទីក្រុងម៉ូស្គូ ខណៈលោកក៏បានប្ដេជ្ញាផងដែរថានឹងយកឈ្នះលើការប្រយុទ្ធទាំងអស់សម្រាប់អនាគត និងប្រជាធិបតេយ្យរបស់អ៊ុយក្រែន” ។

គួរបញ្ជាក់ថា រហូតមកដល់ពេលនេះសង្គ្រាមលុកលុយរបស់រុស្ស៊ីលើអ៊ុយក្រែនដែលលោក ពូទីន ចាត់ទុកជា “ប្រតិបត្តិការយោធាពិសេស” បានអូសបន្លាយពេល ៤ ខែមកហើយ ចាប់តាំងពីផ្ទុះការវាយលុយកនៅថ្ងៃទី ២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អតីតមេទ័ព អាមេរិក ប្រៀបធៀបសង្គ្រាម រុស្ស៊ី-អ៊ុយក្រែន ទៅនឹង “ការប្រកួតប្រដាល់ទម្ងន់ធ្ងន់”