ផ្ទុះការបាញ់ប្រហាររវាងខ្មាន់កាំភ្លើង និងប៉ូលិស ម៉ិកស៊ិក ស្លាប់ ១៣ នាក់

ប៉ូលិសម៉ិកស៊ិកមួយក្រុមត្រូវបានវាយប្រហារដោយខ្មាន់កាំភ្លើងនៅរដ្ឋ San Luis Potosi ភាគកណ្តាល ដោយបណ្តាលឲ្យមនុស្ស ១៣ នាក់ត្រូវបានសម្លាប់ ។

ប៉ូលិសបាននិយាយនៅក្នុងសេចក្តីថ្លែងការណ៍មួយថា “ជាលទ្ធផលនៃការបាញ់ប្រហារតទល់គ្នានេះ ជនសង្ស័យដែលជាឧក្រិដ្ឋជនចំនួន ១៣ នាក់ត្រូវបានសម្លាប់ ហើយអ្នកវាយប្រហារ ២ នាក់ទៀតត្រូវបានឃុំខ្លួន” ។

ប៉ូលិសបាននិយាយទៀតថា អ្នកស្លាប់ទាំង ១៣ នាក់នោះរួមមានបុរស​ ១០​ នាក់ និង​ស្ត្រី​ពាក់អាវក្រោះ​ ៣​ នាក់​ ខណៈប៉ូលិស​ក៏បានរឹបអូសអាវុធ និង​រថយន្ត ៦ គ្រឿង​ក្នុង​ពេល​ប្រតិបត្តិការនោះផងដែរ ។

ប្រតិបត្តិការពិសេសនៅក្នុងទីក្រុងបានចាប់ផ្តើម បន្ទាប់ពីការឃាត់ខ្លួនស្ត្រី ២ នាក់ ក្រោយពួកគេបានចូលរួមក្នុងការបញ្ចុះសពដោយសម្ងាត់ និងបង្ហាញទីតាំងនៃអដ្ឋិធាតុដល់មន្រ្តីអនុវត្តច្បាប់ ។

ក្នុងអំឡុងពេលនៃប្រតិបត្តិការនោះ ក្រុមការងារបានរងការវាយប្រហារដោយខ្មាន់កាំភ្លើងមិនស្គាល់មុខ ដែលព្យាយាមលាក់ខ្លួននៅក្នុងផ្ទះមួយកន្លែង ទើបមានការផ្ទុះអាវុធបាញ់តបតពីសំណាក់ក្រុមប៉ូលិសបែបនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik