គម្រោងទឹកស្អាត និងអនាម័យ ដោះស្រាយកង្វះទឹកស្អាត និងបង្គន់អនាម័យ តាមសាលាជនបទ

អង្គការជឿជាក់លើសិស្សជនបទកម្ពុជា (CRST) មានគម្រោងទឹកស្អាត និងអនាម័យ (Project W) ក្នុងគោលបំណងផ្តល់ដំណោះស្រាយចំពោះបញ្ហាកង្វះទឹកស្អាត និងបង្គន់អនាម័យនៅតាមសាលារៀនជនបទ។

ក្នុងឱកាសដឹកនាំក្រុមការងារចុះពិនិត្យគម្រោងទឹកស្អាត និងអនាម័យ (Project W) នៅរសៀលថ្ងៃទី ៦ ខែសីហា នៅខេត្តសៀមរាប លោក នេត្រ ភក្ត្រា រដ្ឋលេខាធិការ ក្រសួងបរិស្ថាន បានឱ្យដឹងថា គម្រោងទឹកស្អាត និងអនាម័យ (Project W) នេះមានគោលដៅចម្បងក្នុងការលើកកម្ពស់សុខភាព ការសិក្សា និងអនាម័យឱ្យមានភាពល្អប្រសើរនៅតាមសាលារៀនសាធារណៈ ព្រមទាំងជំរុញការចូលរួមថែរក្សាបរិស្ថាន និងការកាត់បន្ថយការបំពុលដោយសំណល់ប្លាស្ទិកដោយផ្ដើមចេញពីគ្រឹះសា្ថនអប់រំ តាមរយៈការផ្តល់ជូននូវប្រព័ន្ធចម្រោះទឹកស្អាត ឡដុតសំរាម និងបង្គន់អនាម័យ។

លោករដ្ឋលេខាធិការបានបន្តថា គម្រោងនេះបានកំពុងអនុវត្តគម្រោងសាកល្បងរបស់ខ្លួនចំនួន​ ៥ ​សាលាក្នុងនោះរួមមាន វិទ្យាល័យ ខ្នារសណ្តាយ វិទ្យាល័យ តេជោ ហ៊ុន សែន អង្គរធំ ​អនុវិទ្យាល័យ តាប៉ាង អនុវិទ្យាល័យខ្ចាស់ និង វិទ្យាល័យត្រពាំងប្រិយ៍។

លោកបានបន្តទៀតថា បន្ទាប់ពីវាយតម្លៃគម្រោងសាកល្បង​ គម្រោងកំពុងបន្តបេសកកម្មរបស់ខ្លួននៅក្នុងសាលារៀនសាធារណចំនួន ​៤៩ សាលា បន្ថែមទៀតនៅទូទាំងខេត្តសៀមរាប ដែលនេះគឺជាគម្រោងមួយជួយកាត់បន្ថយប្លាស្ទិក និងផ្តល់ទឹកស្អាតសម្រាប់សិស្សប្រើប្រាស់ និងផឹកដោយឥតគិតថ្លៃ៕

អត្ថបទ៖ សំអឿន