លោក បៃដិន កំណត់លក្ខខណ្ឌ សម្រាប់ជំនួបជាមួយលោក ពូទីន ក្នុងកិច្ចប្រជុំកំពូល G20

ប្រធានាធិបតីអាមេរិកលោក ចូ បៃដិន និយាយថា គាត់គ្មានចេតនា ជួបជាមួយលោក វ្ល៉ាឌីមៀរ ពូទីន ក្នុងកិច្ចប្រជុំ G20 នាពេលខាងមុខនៅកោះបាលី ដើម្បីនិយាយអំពីបញ្ហាអ៊ុយក្រែនទេ លុះត្រាតែមេដឹកនាំរុស្ស៊ី មកជួបគាត់ជាមុន ដើម្បីពិភាក្សាអំពីបញ្ហានានាដូចជា ការដោះលែងតារា WNBA នាង Brittney Griner ដែលកំពុងជាប់ពន្ធនាគារនៅ​ក្នុង​ប្រទេស​រុស្ស៊ី ជាដើម។

ថ្លែងទៅកាន់ពិធីករ Jake Tapper របស់ទូរទស្សន៍ CNN កាលពីថ្ងៃអង្គារទី១១ខែតុលា លោក Biden បានពិភាក្សាគ្នាអំពីបញ្ហាផ្សេងៗ ដែលរំខានដល់ទំនាក់ទំនងរុស្ស៊ី-អាមេរិក ហើយបានថ្កោលទោសការគំរាមកំហែងរបស់លោកពូទីន ក្នុងការប្រើប្រាស់អាវុធនុយក្លេអ៊ែរនៅក្នុងជម្លោះយោធាជាមួយអ៊ុយក្រែន។

នៅពេលសួរថាតើគាត់សុខចិត្តជួបជាមួយមេដឹកនាំរុស្ស៊ីនៅឯកិច្ចប្រជុំកំពូល G20 ក្នុងខែវិច្ឆិកាឬអត់? លោក បៃដិន និយាយថា “ខ្ញុំគ្មានចេតនាជួបជាមួយគាត់ទេ។ ប៉ុន្តែជាឧទាហរណ៍ ប្រសិនបើគាត់មករកខ្ញុំមុននៅឯកិច្ចប្រជុំ G20 ហើយប្រាប់ថា ខ្ញុំចង់និយាយអំពីការដោះលែង Griner នោះខ្ញុំនឹងជួបជាមួយគាត់។ ខ្ញុំចង់​មាន​ន័យ​ថា វា​នឹង​អាស្រ័យលើរឿងនេះ”។

Brittney Griner គឺជាតារារបស់សហព័ន្ធកីឡាបាល់បោះជម្រើសជាតិនារី និងជាម្ចាស់មេដាយមាសអូឡាំពិក ដែលត្រូវបានឃាត់ខ្លួននៅអាកាសយានដ្ឋានទីក្រុងមូស្គូ ក្នុងខែកុម្ភៈ ពីបទកាន់កាប់បារីអគ្គិសនី ដាក់ដោយប្រេងកញ្ឆាចូល។ Griner បានសារភាពទោសកំហុសចំពោះការចោទប្រកាន់ពីបទកាន់កាប់គ្រឿងញៀន ហើយត្រូវបានកាត់ទោសឲ្យជាប់ពន្ធនាគាររយៈពេល៩ឆ្នាំ ដោយតុលាការរុស្ស៊ីកាលពីថ្ងៃទី៤ខែសីហា។

គួរបញ្ជាក់ថា លោក បៃដិន និងលោក ពូទីន មិនបាននិយាយគ្នាដោយផ្ទាល់ទេ ចាប់តាំងពីមុនពេលរុស្ស៊ីបើកប្រតិបត្តិការយោធារបស់ខ្លួន នៅក្នុងប្រទេសអ៊ុយក្រែនកាលពីចុងខែកុម្ភៈមក។ រដ្ឋមន្ត្រីការបរទេសរុស្ស៊ី លោក Sergey Lavrov បាននិយាយមុននេះថា វិមានក្រឹមឡាំងនឹងពិចារណាលើកិច្ចប្រជុំបែបនេះ ប៉ុន្តែមិនទាន់ទទួលបានសំណើពីទីក្រុងវ៉ាស៊ីនតោននៅឡើយ៕

ប្រែសម្រួល៖ Vann Vann

ប្រភព៖ RT

ចុចអាន៖ លោក Stoltenberg៖ ជ័យជម្នះរបស់រុស្ស៊ី គឺជាបរាជ័យរបស់ ណាតូ