ព័ត៌មានជាតិ

រដ្ឋបាលរាជធានីស្នើឲ្យពលរដ្ឋរងគ្រោះដោយបាត់បង់យានយន្តរួសរាន់យកឯកសារ មកបង្ហាញរដ្ឋបាលរាជធានី ក្នុងរយៈពេល១៤ថ្ងៃ

បានផុស

៤ years មុន

នៅ

ថ្ងៃព្រហស្បតិ៍ ២០ តុលា ២០២២

ដោយ

ភ្នំពេញ ៖ គណៈបញ្ជាការឯកភាពរដ្ឋបាលរាជធានីភ្នំពេញ នាពេលកន្លងមកនេះ បានធ្វើការដកហូតទោចក្រយានយន្ត និងរថយន្តគ្រប់ប្រភេទ ដែលសង្ស័យថា បានពាក់ព័ន្ធនឹងបទល្មើសមួយចំនួន ពីកន្លែងកុងស៊ីបញ្ចាំ ហើយមិនទាន់ត្រូវបានប្រជាពលរដ្ឋ ទំនាក់ទំនងមកយកវិញនោះទេ ។ ដូច្នេះរដ្ឋបាលរាជធានីភ្នំពេញ បានស្នើឲ្យពលរដ្ឋរងគ្រោះ ដោយសារអំពើលួច ឬប្លន់រួសរាន់យកឯកសារពាក់ព័ន្ធ មកបង្ហាញជូនអយ្យការអមសាលាដំបូងរាជធានីភ្នំពេញ និងក្រុមការងាររដ្ឋបារាជធានីភ្នំពេញ ក្នុងរយៈពេល១៤ថ្ងៃ គិតចាប់ពីថ្ងៃទី២០នេះតទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះបើយោងតាមសេចក្តីជូនដំណឹង របស់រដ្ឋបាលរាជធានីភ្នំពេញ ផ្សព្វផ្សាយនៅថ្ងៃទី២០ ខែតុលានេះ ដែលក្នុងសេចក្តីជូនដំណឹង បានឲ្យដឹងថា តាមរយៈការផ្សព្វផ្សាយតាមបណ្តាញសារព័ត៌មាន នានា ប្រជាពលរដ្ឋមួយចំនួនជាជនរងគ្រោះ ដោយសារបទល្មើសលួច ឬប្លន់ បានយកឯកសារសក្ខីកម្ម ដែលពាក់ព័ន្ធនឹងបទល្មើសជូនតំណាងអយ្យការអមសាលាដំបូងរាជធានីភ្នំពេញ និងក្រុមការងាររដ្ឋបាលរាជធានីភ្នំពេញ ធ្វើការពិនិត្យនិងផ្ទៀងផ្ទាត់ ដើម្បីរកឲ្យឃើញនូវភាពត្រឹមត្រូវរវាងឯកសារ និងភិនភាគរបស់ទោចក្រយានយន្ត ត្រីចក្រយានយន្ត និងរថយន្តជាផលអំពីអំពើល្មើស ហើយបានសម្រេចប្រគល់ជូនម្ចាស់កម្មសិទ្ធិវិញបានមួយចំនួន។

តាមសេចក្តីជូនដំណឹងបញ្ជាក់ថា ទោចក្រយានយន្ត ត្រីចក្រយានយន្ត និងរថយន្តមានការសង្ស័យពាក់ព័ន្ធនឹងបទល្មើស ដែលគណៈបញ្ជាការឯកភាពរដ្ឋបាលរាជធានីភ្នំពេញ ធ្វើការចាប់យក ដើម្បីស្រាវជ្រាវរកបទល្មើសនោះ នៅមិនទាន់មានប្រជាពលរដ្ឋមកទំនាក់ទំនងបន្តទៀតឡើយ។

អាស្រ័យហេតុនេះ រដ្ឋបាលរាជធានីភ្នំពេញ ស្នើប្រជាពលរដ្ឋ ជាជនរងគ្រោះដោយសារអំពើលួច ឬប្លន់ ដែលមិនទាន់បានយកឯកសារសក្ខីកម្មពាក់ព័ន្ធនឹងបទល្មើស រួមមានអត្តសញ្ញាណប័ណ្ណ ប័ណ្ណសម្គាល់យានយន្ត (កាតគ្រី) ពាក្យបណ្តឹង និងឯកសារពាក់ព័ន្ធដទៃទៀត រួសរាន់មកបង្ហាញជូនតំណាងអយ្យការអមសាលាដំបូងរាជធានីភ្នំពេញ និងក្រុមការងាររដ្ឋបាលរាជធានីភ្នំពេញ ក្នុងរយៈពេល១៤ថ្ងៃ ចាប់ពីថ្ងៃចុះហត្ថលេខានេះតទៅ៕

ដោយ ៖ ស្រីរ័ត្ន