មន្ត្រីជាន់ខ្ពស់ធនាគារជាតិ៖ កំណើនអតិផរណាបានបង្កឱ្យប៉ះពាល់ដល់ប្រជាជនក្រីក្រខ្លាំងជាង​គេ

មន្ត្រីជាន់ខ្ពស់ធនាគារជាតិនៃកម្ពុជា បានលើកឡើងថា បញ្ហាកំណើនអតិផរណានាពេលបច្ចុប្បន្នបានបង្កឱ្យប៉ះពាល់ដល់ ប្រជាជនក្រីក្រខ្លាំងជាងគេដែលទាមទារឱ្យមានការពង្រីកការគាំពារសង្គមបន្ថែមដើម្បីជួយសម្រាលបន្ទុកដល់ប្រជាពលរដ្ឋក្រីក្រ។

ថ្លែងបើកសន្និសីទស្តីពីម៉ាក្រូសេដ្ឋកិច្ចប្រចាំឆ្នាំលើកទី៩ ស្តីពីដំណើរឆ្ពោះទៅកាន់ការស្តារសេដ្ឋកិច្ចឡើងវិញ និងភាពធន់ក្រោយវិបត្តិជំងឺកូវីដ-១៩ នៅព្រឹកថ្ងៃទី២៤ ខែវិច្ឆិកា នេះ លោកស្រី ជា សិរី ឧបការីទេសាភិបាល និងជាអគ្គនាយកបច្ចេកទេសធនាគារជាតិនៃកម្ពុជា បានបន្តថា វិបត្តិកូវីដ-១៩ បានបង្កផលប៉ះពាល់ដល់ប្រជាពលរដ្ឋក្នុងទំហំមិនដូចគ្នានោះទេ ដោយប្រជាពលរដ្ឋក្រីក្រ និងងាយរងគ្រោះទទួលរងការប៉ះទង្គិចខ្លាំងជាង។ ដូចគ្នានេះដែរ បញ្ហាកំណើនអតិផរណានាពេលបច្ចុប្បន្នក៏បានប៉ះពាល់ដល់ប្រជាជនក្រីក្រ ខ្លាំងជាងគេផងដែរ។

លោកស្រីបានបន្តថា នៅកម្ពុជា ក្រុមម្ហូបអាហារនិងថាមពលមានសមាមាត្រប្រមាណ៦០% នៃសន្ទស្សន៍ថ្លៃទំនិញប្រើប្រាស់សរុប ដូចនេះការឡើងថ្លៃនៃក្រុមម្ហូបអាហារ និងថាមពលបណ្តាលឱ្យក្រុមគ្រួសារក្រីក្រ និងងាយរងគ្រោះដែលមានប្រាក់សន្សំទាប ឬគ្មានប្រាក់សន្សំទាល់តែសោះជួបការលំបាកក្នុងការរក្សាអំណាចនៃការទិញទំនិញប្រើប្រាស់ចាំបាច់​ផ្សេងៗប្រចាំថ្ងៃ។

លោកស្រីបានបន្តទៀតថា ហេតុដូច្នេះការពង្រីកការគាំពារសង្គមពិតជាមានសារៈសំខាន់ណាស់សម្រាប់ក្រុមគ្រួសារក្រីក្រ និងងាយរងគ្រោះស្របពេលដែលការជំរុញក្រុមហ៊ុន-សហគ្រាសនិងនិយោជិតដែលស្ថិតនៅក្នុងសេដ្ឋកិច្ចក្រៅប្រព័ន្ធមកក្នុងសេដ្ឋកិច្ចក្នុងប្រព័ន្ធ មានភាពចាំបាច់ដើម្បីអាចទទួលបានការគាំពារកាន់តែប្រសើរជាងមុន។ លោកស្រីបានរំលឹកថាកន្លងមក ធនាគារ ជាតិនៃកម្ពុជា ក៏បានខិតខំសម្រាលបន្ទុកប្រជាពលរដ្ឋក្រីក្រតាមរយៈការរក្សាស្ថិរភាពអត្រា ប្ដូរប្រាក់ដែល​បានរួមចំណែកកាត់បន្ថយសម្ពាធអតិផរណា ហើយថ្មីៗនេះគ្រឹះស្ថានធនាគារនិងហិរញ្ញវត្ថុក៏ត្រូវបានលើកទឹកចិត្តឱ្យមានការរៀបចំឥណទានឡើងវិញសម្រាប់អ្នកដែល ទទួលរងផលប៉ះពាល់ពីគ្រោះទឹកជំនន់។

លោកស្រីបានបញ្ជាក់ថា ត្រង់ចំណុចនេះ ធនាគារជាតិនៃកម្ពុជាក៏បានអនុញ្ញាតឱ្យមានការរៀបចំឥណទានឡើងវិញ ក្នុងចំណោមប្រជាពលរដ្ឋនិងក្រុមហ៊ុន-សហត្រាស ដែលរងផលប៉ះពាល់ធ្ងន់ធ្ងរពីវិបត្តិកូវីដ-១៩ នាពេលកន្លងមកផងដែរ។
គួរបញ្ជាក់ថាបញ្ហាកំណើនអតិផរណានៅកម្ពុជាក៏ដូចជានៅលើសកលលោកនេះត្រូវបានគេស្តីបន្ទោសទៅលើរុស្សីឈ្លាន​ពានប្រទេសអ៊ុយក្រែនដែលធ្វើឱ្យប្រេងសាំង និងស្បៀងអាហារឡើងថ្លៃបង្កឱ្យមានអតិផរណាខ្ពស់៕

អត្ថបទ៖ សំអឿន