កីឡា

គួរឲ្យសរសើរ Thiago ជួយផ្សព្វផ្សាយ«គុនខ្មែរ»បានច្រើន

បានផុស

៣ years មុន

នៅ

ថ្ងៃចន្ទ ១៣ កុម្ភៈ ២០២៣

ដោយ

កីឡាករប្រដាល់ប្រេស៊ីល Thiago Teixeira បានដើរតួនាទីដ៏សំខាន់មួយក្នុងការជួយផ្សព្វផ្សាយគុនខ្មែរទៅកាន់ពិភពខាងក្រៅឲ្យស្គាល់កីឡាអត្តសញ្ញាណជាតិរបស់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីឆ្នាំ២០២២ Thiago Teixeira បានប្រកួតឈ្នះ ឡៅ ចន្ទ្រា ដោយពិន្ទុ។ បន្ទាប់មក រូបគេតែងតែចិញ្ចឹមចិត្តចង់ជួបជាមួយអ្នកលេងគុនខ្មែរ ធឿន ធារ៉ា ដែលកំពុងឡើងជើងខ្លាំង។ ជាពិសេស បន្ទាប់ពីកីឡាករកម្ពុជារូបនេះឈ្នះខ្សែក្រវាត់ Thai Fight កីឡាករប្រេស៊ីលរូបនេះតែងតែចង់ជួបប្រកួត។ ទីបំផុត រូបគេបានជួប ធារ៉ា តាមការគ្រោងទុក ហើយរូបគេបានប្រកាសក្តែងៗពីការផ្តួលអ្នកលេងគុនខ្មែរ។ យ៉ាងណា រូបគេបានចាញ់ក្នុងទឹកទី៥ បន្ទាប់ពីបែកធំដែលមិនអាចប្រកួតបាន។

ការពិតនៅលើសង្វៀន និងតាមបណ្តាញទំនាក់ទំនងសង្គម Thiago មានកាយវិការខុសគ្នាដាច់តែម្តង។ រូបគេបានបង្កើនការចាប់អារម្មណ៍ខ្លាំងសម្រាប់អ្នកទស្សនាមុនការប្រកួត ប៉ុន្តែនៅពេលប្រកួត រួបគេសុភាពរៀបរាបសារ និងគោរព សំពះឱនលំទោនគួរឲ្យគោរព។

ជារឿយៗ នៅលើបណ្តាញទំនាក់ទំនងសង្គម Thiago តែងតែតាមដាន់សកម្មភាពប្រដាល់គុនខ្មែរ និងសរសេរខ្លឹមជាបន្តបន្ទាប់ពីការចូលចិត្ត និងស្រឡាញ់គុនខ្មែរ។ ក្រៅពីការ Share និងនិយាយពីការស្រឡាញ់គុនខ្មែរ រូបគេក៏បានឆ្លើយឆ្លងជាមួយអ្នកគាំទ្រទៀតផង។

ជាក់ស្តែងរូបគេបានសរសេរឆ្លើយនឹងគណនី Facebook មួយថា ៖«តែងតែស្រឡាញ់កម្ពុជាជានិច្ច។ គុនខ្មែរត្រូវតែនាំទៅកាន់ពិភពលោក»។

ការប្រកួតរបស់ Thiago ជាមួយ ធឿន ធារ៉ា បានធ្វើឲ្យអ្នកគាំទ្រចាប់អារម្មណ៍ខ្លាំងបំផុតទាំងក្នុង និងក្រៅប្រទេស។ តាមការផ្សាយផ្ទាល់លើផេកមានអ្នកទស្សនារហូតដល់៣០០K ក្នុងនោះក៏មានអ្នកទស្សនានៅក្រៅប្រទេសច្រើនដែរ។ គេក៏សង្កេតឃើញថា មានកីឡាករប្រដាល់ថៃជាច្រើនបានទស្សនា ដូចជាកំពូលអ្នកប្រដាល់ថៃ Buakaw ជាដើម ដោយសាររូបគេធ្លាប់ប្រកួតនៅ Thai Fight ជាច្រើនលើក។

ចុងក្រោយបំផុតនេះ រូបគេបានសរសេរថា ៖«ស្រឡាញ់ក្រុមការងារគុនខ្មែរកម្ពុជាខ្លាំងណាស់។ វាពិតជាល្អដែលបានជួបដៃគូចាស់របស់ខ្ញុំ និងជាមិត្តភក្តិគឺកីឡាករ សេន ប៊ុនថេន»។

Thiago ធ្លាប់ប្រកួតប្រកួតជាមួយកីឡាករកម្ពុជាជាច្រើនរូបដូចជាធ្លាប់ប្រកួតជាមួយ សេន ប៊ុនថេន ៣ដង ក្នុងឈ្នះ១ដង ធ្លាប់ឈ្នះ ធន់ សុភា និងឈ្នះ ឡៅ ចន្ទ្រា ប៉ុន្តែប្រកួតចុងក្រោយចាញ់កីឡាករ ធឿន ធារ៉ា ហើយមុនពេលចេញទៅប្រទេសកំណើតវិញ រូបគេក៏បានធ្វើសកម្មភាពមនុស្សធម៌។

ប្រសិនបើសហព័ន្ធកីឡាគុនខ្មែរ និងសង្វៀនប្រដាល់គុនខ្មែរនាំយកកីឡាករបរទេសផ្សេងៗមកប្រកួតឲ្យបានច្រើន ហើយរៀបចំឲ្យកីឡាករបរទេសប្រកួតដណ្តើមខ្សែក្រវាត់គុនខ្មែរ នោះពួកគាត់មានឈ្មោះជាជើងឯកគុនខ្មែរពិភពលោក ដូច្នេះពួកគេយកប្រើប្រាស់ខ្សែក្រវាត់គុនខ្មែរ ដោយផ្សព្វផ្សាយពាក្យ«គុនខ្មែរ»ទាំងមិនបាច់បង្ខំ៕