ទ្រព្យសម្បត្តិ Yaya ឆ្នាំនេះ កើនឡើងវាល់លានដុល្លារ មិនចាញ់តារាស្រីរួមជំនាន់ឡើយ

ឆ្នាំ២០២៣នេះ តារាសម្ដែង Yaya Urassaya កើនឡើងទ្រព្យសម្បត្តិជាង ៤៤លានដុល្លារ ក្លាយជាកំពូលអ្នកមានមួយរូបក្នុងរង្វង់សិល្បៈថៃ ក៏ជាសេដ្ឋីនីលាក់មុខលំដាប់ប្រទេស មិនចាញ់មិត្តរួមជំនាន់ដូចជា Kimberly, Baifern ឬ Bella ឡើយ។

ប្រភពពី Networthspot រាយការណ៍ថា ទ្រព្យសម្បត្តិរបស់ Yaya នាឆ្នាំនេះកើនឡើងសរុប ៤៤.២២លានដុល្លារ ខណៈទ្រព្យសម្បត្តិជាក់លាក់របស់នាងអាចមានចំនួនលើសពីនេះ ព្រោះទិន្នន័យដែលបានរាយការណ៍ត្រឹមតែជាការសន្និដ្ឋាន មិនលម្អិតគ្រប់ជ្រុងជ្រោយនោះទេ។

យោងតាមប្រភពដដែល បានឱ្យដឹងដែរថា ប្រភពចំណូលដ៏មហាសាលដែលនាំឱ្យទ្រព្យសម្បត្តិរបស់ Yaya កើនឡើងខ្ពស់បែបនេះគឺបានមកពីការងារផ្សាយផលិតផលរបស់នាងតាមរយៈគណនី Instagram ផ្ទាល់ខ្លួន បូករួមនឹងចំណូលផ្សេងទៀតដូចជា ថតកុន តំណាងម៉ាកយីហោទាំងក្នុងស្រុក និងអន្តរជាតិ ផ្សាយពាណិជ្ជកម្មធំតូច និងជាភ្ញៀវកិត្តិយសក្នុងកម្មវិធីលំដាប់អភិជនជាច្រើនថែមទៀត។ ការងារទាំងនេះហើយដែលអាចជួយឱ្យតារាស្រីវ័យ ២៩ឆ្នាំរូបនេះ រកចំណូលបានយ៉ាងហោច ៨,៨៤លានដុល្លារ ក្នុងមួយឆ្នាំ៕

ប្រែសម្រួល៖ សន្យា

ចុចអាន៖ ឆ្នាំ២០២៣ Kimberley កើនទ្រព្យសុទ្ធមិនធម្មតា និងកំពុងត្រៀមទទួលមរតករាប់លានដុល្លារ

ចុចអាន៖ Margie ទទួលបានកាដូដ៏មានតម្លៃពីស្វាមី ហើយថាខ្លួនជានារីសំណាងជាងគេ