ផ្ទុះបាតុកម្មក្នុងប្រទេសមួយនៅ អឺរ៉ុប ប្រឆាំងការផ្ដល់ជំនួយយោធាឲ្យ អ៊ុយក្រែន

មនុស្សរាប់ពាន់នាក់បានដើរតាមដងផ្លូវនៅក្នុងទីក្រុង Prague កាលពីថ្ងៃសៅរ៍ដើម្បីធ្វើការតវ៉ាប្រឆាំងនឹងរដ្ឋាភិបាលនៃសាធារណរដ្ឋឆែក ពាក់ព័ន្ធនឹងអតិផរណាឡើងខ្ពស់ ជាពិសេសទាមទារឲ្យបញ្ចប់ការគាំទ្រផ្នែកយោធារបស់ប្រទេសសម្រាប់អ៊ុយក្រែន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សាធារណរដ្ឋឆែកបាននិងកំពុងប្រយុទ្ធប្រឆាំងកម្រិតអតិផរណាឡើងខ្ពស់ជាកំណត់ត្រាមិនធ្លាប់មានក្នុងរយៈពេល ១ ឆ្នាំ ដោយសារតែការកើនឡើងនៃតម្លៃថាមពល ដែលបណ្តាលមកពីសង្គ្រាមនៅអ៊ុយក្រែន ខណៈនៅក្នុងខែកុម្ភៈ អតិផរណាប្រចាំឆ្នាំនៅក្នុងសហភាពអឺរ៉ុប និងរដ្ឋជាសមាជិកអង្គការណាតូដែលមានប្រជាជន ១០.៥ លាននាក់មួយនេះ បានឈានដល់ ១៦.៧ ភាគរយ ។

លោក Jindrich Rajchl មេដឹកនាំគណបក្ស PRO និងជាអ្នករៀបចំបាតុកម្មបានប្រាប់ហ្វូងមនុស្សនៅកណ្តាលទីលាន Wenceslas Square ថា “យើងបានប្រមូលផ្តុំគ្នានៅទីនេះ ដើម្បីប្រកាន់ជំហរប្រឆាំងនឹងភាពក្រីក្រ ដែលធ្វើឡើងដោយរដ្ឋាភិបាលរបស់សាធារណរដ្ឋឆែក” ។

ក្នុងនោះក្រុមអ្នកតវ៉ាបានអំពាវនាវឲ្យរដ្ឋាភិបាលស្តាំនិយមរបស់លោកនាយករដ្ឋមន្ត្រី Petr Fiala លាលែងពីតំណែង ស្របពេលដែលលោក Rajchl បានលើកឡើងថា ក្រុមបាតុករចង់បានមេដឹកនាំដែលយកចិត្តទុកដាក់ចំពោះផលប្រយោជន៍របស់ពលរដ្ឋឆែកជាមុនសិន ជាជាងគិតដល់ប្រទេសដទៃ ។

ទន្ទឹមនោះ អ្នករិះគន់បានចោទប្រកាន់រដ្ឋាភិបាលរបស់លោក Fiala ថា បានយកចិត្តទុកដាក់ដល់អ៊ុយក្រែនខ្លាំងជាងពលរដ្ឋខ្លួនឯងទៅទៀត ជាពិសេសការផ្ដល់ជំនួយផ្នែកយោធា និងមនុស្សធម៌យ៉ាងច្រើនទៅឲ្យប្រទេសដែលកំពុងហែកហួរដោយសង្រ្គាម ចាប់តាំងពីប្រតិបត្តិការសឹករបស់រុស្ស៊ីបានចាប់ផ្តើមកាលពីខែកុម្ភៈ ឆ្នាំ ២០២២ ។

ស្របពេលជាមួយគ្នានេះ ក្រុមអ្នកតវ៉ាក៏បានរិះគន់ដល់អង្គការណាតូផងដែរ ដោយពួកគេបានស្រែកឮៗដាក់ឧបករណ៍បំពងសំឡេងឲ្យហ្វូងមនុស្សហែកទង់ជាតិអ៊ុយក្រែនចេញអគារសារមន្ទីរជាតិនៅលើកំពូលនៃទីលាន Wenceslas Square ។

គួរបញ្ជាក់ថា រហូតមកដល់ពេលនេះ ប្រតិបត្តិការសឹករបស់រុស្ស៊ីលើអ៊ុយក្រែន បានអូសបន្លាយពេលជាង ១ ឆ្នាំមកហើយ ខណៈក៏មិនទាន់មានសញ្ញាថមថយណាមួយនៅឡើយផងដែរ ស្របពេលដែលបណ្ដាប្រទេសលោកខាងលិច ក៏ដូចជាសហរដ្ឋអាមេរិក នៅតែបន្តផ្គត់ផ្គង់សព្វាវុធដល់រដ្ឋាភិបាលទីក្រុងកៀវ ៕

ប្រែសម្រួលដោយ ៖ ជីវ័ន្ត

ប្រភព ៖ France 24

ចុចអាន ៖ អ៊ុយក្រែន សុំឲ្យ អាមេរិក ជួយអាប់ដេតប្រព័ន្ធខែលការពារដែនអាកាស