វប្បធម៌ ជំនឿ

រូបសំណាក “សិវស្កន្ទ” សិល្បៈខ្មែរកម្របំផុត បង្ហាញក្ដីស្រឡាញ់ឪពុកចំពោះកូន

បានផុស

៣ years មុន

នៅ

ថ្ងៃសុក្រ ១៧ មីនា ២០២៣

ដោយ

នៅថ្ងៃទី១៧ ខែមីនា ឆ្នាំ២០២៣ នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់នៅក្នុងពិធីទទួលវត្ថុបុរាណខ្មែរដែលបានប្រគល់ជូនព្រះរាជាណាចក្រកម្ពុជាវិញ។ ពិធីនេះបានប្រព្រឹត្តទៅនៅវិមានសន្តិភាព នៃទីស្ដីការនាយករដ្ឋមន្ត្រី។

ក្នុងចំណោម រតនវត្ថុបុរាណខ្មែរដែលបានប្រគល់ជូនព្រះរាជាណាចក្រកម្ពុជាវិញនេះ រូបសំណាក សិវស្កន្ទ គឺជាសំណាក របស់ព្រះសិវៈ ឬឥសូរ ប្រលែងលេងជាមួយកូនប្រុសជាទីស្រឡាញ់គឺ ព្រះស្កន្ទ ដែលរូបនេះមានអត្ថន័យខ្លាំងបំផុត ដែលដូនតាខ្មែរសម័យអង្គរឆ្លាក់តំណាងឱ្យក្ដីស្រឡាញ់របស់ឪពុកចំពោះកូនប្រុស។

រូបសំណាក សិវស្កន្ទ ស្ថិតនៅក្នុងរចនាបថកោះកេរ្តិ៍ សម័យអង្គរដ៏រុងរឿង នាពាក់កណ្ដាលទី១ នៃសតវត្សទី១០ ត្រូវបានដូនតាខ្មែរតម្កល់ទុកនៅប្រាសាទក្រចាប់ ក្នុងក្រុមប្រាសាទកោះកេរ្តិ៍ ស្ថិតក្នុងខេត្តព្រះវិហារ។ ព្រះស្កន្ទ គឺជាទេពនៃព្រហ្មញ្ញសាសនា ជាបុត្រព្រះឥសូរ និងព្រះម៉ែឧមា ហើយក៏ជាបងប្អូនព្រះគណេស។

ព្រះអង្គទ្រង់មានព្រះមហេសី ២ព្រះអង្គ ហើយមានសត្វក្ងោកជាព្រះទីនាំងយានជំនិះ។ រូបសំណាក សិវស្កន្ទ ត្រូវបានឈ្មួញទុច្ចរិត ដឹកជញ្ជូនយកពីប្រាសាទក្រចាប់ នៅអំឡុងសម័យសង្គ្រាម ត្រូវឃ្លាតឆ្ងាយពីដែនកម្ពុជរដ្ឋ ជាប្រទេសកំណើតប្រមាណ ៤ទសវត្សរ៍។

យ៉ាងណាក្រោមកិច្ចសហការរវាងកម្ពុជា និងអាមេរិក និងកិច្ចខិតខំប្រឹងប្រែងរបស់ក្រសួងវប្បធម៌ និងអាជ្ញាធរពាក់ព័ន្ធ រូបសំណាក សិវស្កន្ទ កំពុងត្រូវបានរៀបចំបញ្ជូនមកកម្ពុជាវិញពីសហរដ្ឋអាមេរិក រួមជាមួយវត្ថុបុរាណជាង១០០ ផ្សេងទៀតធ្វើពីថ្ម និងសំរឹទ្ធ។ នេះគឺជាដំណឹងដ៏រីករាយបំផុតសម្រាប់កម្ពុជា ដែលព្រលឹងបុព្វបុរសខ្មែរបានវិលមកមាតុប្រទេសវិញ៕