ទីបំផុត រដ្ឋាភិបាល និងបក្សប្រឆាំង អ៊ីស្រាអែល អង្គុយតុចរចារកដំណោះ​ស្រាយរឿងរុះរើប្រព័ន្ធតុលាការ

រដ្ឋាភិបាលស្តាំនិយម និងគណបក្សប្រឆាំងរបស់អ៊ីស្រាអែល បានចាប់ផ្ដើមអង្គុយប្រជុំទល់មុខគ្នាជាលើកដំបូង អំពីកំណែទម្រង់ប្រព័ន្ធតុលាការដ៏ចម្រូងចម្រាស ដែលកំពុងបង្កឲ្យមានបាតុកកម្ម និងភាពចលាចលទ្រង់ទ្រាយធំក្នុងប្រទេស ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចរចាដែលរៀបចំឡើងនៅឯគេហដ្ឋានរបស់លោកប្រធានាធិបតី Isaac Herzog ក្នុងទីក្រុងហ្ស៊េរុយសាឡិមកាលពីល្ងាចថ្ងៃអង្គារ បានកើតឡើង បន្ទាប់ពីនាយករដ្ឋមន្ត្រី Benjamin Netanyahu កាលពីថ្ងៃចន្ទបានយល់ព្រមផ្អាកច្បាប់រុះរើប្រព័ន្ធយុត្តិធម៌ដែលដាក់ចេញកាលពីខែមករា ដោយរដ្ឋមន្ត្រីយុត្តិធម៌ Yariv Levin ដើម្បីផ្តល់ឱកាសឲ្យមានការសន្ទនា ក៏ដូចជារកដំណោះស្រាយបញ្ឈប់រលកបាតុកម្មជាដើម ។

ទន្ទឹមនោះ សេចក្តីថ្លែងការណ៍របស់ការិយាល័យប្រធានាធិបតីដែលបានចេញផ្សាយ បន្ទាប់ពីកិច្ចប្រជុំរយៈពេល ៩០ នាទីបាននិយាយថា ការពិភាក្សាត្រូវបានធ្វើឡើងនៅក្នុង “បរិយាកាសវិជ្ជមាន” ហើយបានឯកភាពនឹងមានកិច្ចប្រជុំបន្ថែមទៀតនៅពេលក្រោយផងដែរ ។

ការតវ៉ាទ្រង់ទ្រាយធំបានចាប់ផ្តើមផ្ទុះឡើងកាលពីថ្ងៃអាទិត្យ បន្ទាប់ពីលោក Netanyahu បានបណ្តេញរដ្ឋមន្ត្រីការពារជាតិ លោក Yoav Gallant ដោយសារតែប្រឆាំង​នឹង​ផែនការ​ដ៏ចម្រូងចម្រាស​ក្នុង​ការ​រុះរើ​ប្រព័ន្ធ​យុត្តិធម៌ ហើយលោកក៏បានក្លាយជារដ្ឋមន្ត្រីដំបូងគេរបស់អ៊ីស្រាអែល ដែលត្រូវចាកចេញពីជួររដ្ឋាភិ​បាល ។

គួរបញ្ជាក់ថា ការ​តវ៉ា​ទ្រង់ទ្រាយ​ធំ​ប្រឆាំង​នឹង​កំណែ​ទម្រង់​ប្រព័ន្ធ​តុលាការរបស់ប្រទេសអ៊ីស្រាអែល ​ត្រូវ​បាន​ធ្វើ​ឡើង​អស់​រយៈពេល ១២ សប្តាហ៍​ជាប់​គ្នាមកហើយ ពោលវាបានកើតឡើងតាំងពីដើមឆ្នាំ ២០២៣ មកម្ល៉េះ ៕

ប្រែសម្រួលដោយ ៖ ជីវ័ន្ត

ប្រភព ៖ Times of Israel

ចុចអាន ៖ ហេតុអ្វីបានជា អ៊ីស្រាអែល ចង់កែទម្រង់ប្រព័ន្ធយុត្តិធម៌ ដែលកំពុងធ្វើឲ្យផ្ទុះ បាតុកម្មក្នុងប្រទេស?