ក្រៅពីគ្រាប់បែក, ជនសង្ស័យប៉ុនប៉ងធ្វើឃាតនាយករដ្ឋមន្ត្រី ជប៉ុន ​នៅមាន​អាវុធមួយប្រភេទទៀត

ជនសង្ស័យដែលគប់គ្រាប់បែកផ្សែងចូលក្នុងទីតាំងថ្លែងសុន្ទរកថារបស់លោកនាយករដ្ឋមន្ត្រីជប៉ុន Kishida Fumio នៅទីក្រុង Wakayama កាលពីថ្ងៃសៅរ៍ មិនមែនមានត្រឹមតែគ្រាប់បែកមួយមុខនោះទេ ពោលជនសង្ស័យនៅមានអាវុធផ្សេងទៀតដាក់មកតាមខ្លួន ។

ក្រៅពីគប់គ្រាប់បែកផ្សែងនោះហើយ, ជនសង្ស័យដែលមានឈ្មោះ Kimura Ryuji អាយុ ២៤ ឆ្នាំជាអ្នករស់នៅក្នុងទីក្រុង Kawanishi ខេត្ត Hyogo ត្រូវគេរាយការណ៍ថា ក៏បានដាក់កាំបិទមួយដើមផ្សេងទៀតប្រវែងប្រហែល ១៣ សង់ទីម៉ែត្រនៅក្នុងកាបូបស្ពាយរបស់ខ្លួនផងដែរ ខណៈប៉ូលិសដាក់ការសង្ស័យថា ជនសង្ស័យប្រហែលជាមានបំណងធ្វើការវាយប្រហារផ្សេងៗគ្នា អាស្រ័យទៅលើស្ថានភាពរបស់លោក Kishida Fumio ។

ទោះយ៉ាងណា នៅក្នុងហេតុការណ៍បំផ្ទុះគ្រាប់បែកនោះ លោកនាយករដ្ឋមន្ត្រីត្រូវបានកងអង្គរក្សជម្លៀសចេញដោយមិនមានគ្រោះថ្នាក់អ្វីឡើយ ប៉ុន្តែប៉ូលិសម្នាក់បានរងរបួសស្រាល ខណៈជនសង្ស័យត្រូវបានចាប់ខ្លួននៅនឹងកន្លែងកើតហេតុតែម្ដង ។

ទន្ទឹមនោះ បន្ទាប់ពីចាប់ខ្លួនជនសង្ស័យរួចហើយ ប៉ូលិសជប៉ុនក៏បានចូលឆែកឆែរក្នុងផ្ទះរបស់ Kimura Ryuji និងបានដកហូតប្រអប់ក្រដាសកាតុងជាង ១០ ប្រអប់ដែលគេសង្ស័យថាជាសម្ភារៈផលិតគ្រឿងផ្ទុះ ក៏ដូចជាកុំព្យូរទ័រមួយគ្រឿង ទូរស័ព្ទដៃមួយគ្រឿង និងរំសេវមួយចំនួនផងដែរ ។

គួរបញ្ជាក់ថា លោក Kishida Fumio បានចុះទៅទីក្រុងកំពង់ផែនេសាទ Wakayama ភាគខាងលិច ដើម្បីផ្ដល់សុន្ទរកថាគាំទ្រដល់បេក្ខជនបោះឆ្នោតសភាជាន់ទាបនៅទីនោះ ខណៈជប៉ុននឹងរៀបចំការបោះឆ្នោតនៅថ្ងៃទី២៣ ខែមេសា ឆ្នាំ២០២៣ នេះ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Japan Times

ចុចអាន ៖ នាយករដ្ឋមន្ត្រី ជប៉ុន ឲ្យរឹតបន្តឹងសន្តិសុខខ្លាំងជាងនេះ ព្រោះប្រទេសនឹង រៀបចំព្រឹត្តិការណ៍ធំ ២