គិតត្រឹមព្រឹកថ្ងៃទី ២៦ មេសានេះ មានគណបក្ស ៧ហើយ បានចុះបញ្ជីគណបក្ស និងបញ្ជីបេក្ខជនឈរឈ្មោះបោះឆ្នោត

គិតត្រឹមព្រឹកថ្ងៃទី ២៦ ខែមេសា ឆ្នាំ ២០២៣នេះ មានគណបក្សនយោបាយចំនួន ៧ហើយ បានចុះបញ្ជីគណបក្ស និងចុះបញ្ជីបេក្ខជនឈរឈ្មោះបោះឆ្នោត ក្នុងការបោះឆ្នោត ជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣។ នេះបើតាមការឲ្យដឹងពីលោក សោម សូរីដា អ្នកនាំពាក្យ គ.ជ.ប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សោម សូរីដា មានប្រសាសន៍ប្រាប់កម្ពុជាថ្មីថា គិតត្រឹមព្រឹកថ្ងៃពុធនេះ មានគណបក្សនយោបាយចំនួន ៧ បាន មកដាក់ពាក្យនៅ គ.ជ.ប ស្នើសុំចុះបញ្ជីគណបក្ស និងបញ្ជីបេក្ខជនឈរឈ្មោះបោះឆ្នោត។

គណបក្សទាំង ៧នោះ រួមមាន៖ គណបក្សប្រជាជនកម្ពុជា, គណបក្សយុវជនកម្ពុជា, គណបក្សខ្មែររួបរួមជាតិ, គណបក្សធម្មាធិបតេយ្យ, គណបក្សកម្លាំងប្រជាធិបតេយ្យ, គណបក្សសញ្ជាតិកម្ពុជា, និងគណបក្សខ្មែរតែមួយ។

អ្នកនាំពាក្យ គ.ជ.ប លោក សោម សូរីដា មានប្រសាសន៍បន្តថា គ.ជ.ប សង្ឃឹមថា នឹងមានគណបក្សនយោបាយច្រើន នឹងចូលរួមប្រកួតប្រជែងក្នុងការបោះឆ្នោត ជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣ ខណៈត្រឹមតែរយៈពេលជិត ៣ថ្ងៃប៉ុណ្ណោះ មានគណបក្សនយោបាយចំនួន ៧បានពាក្យចូលរួមហើយ។

សូមជម្រាបថា តាមប្រតិទិននៃការបោះឆ្នោតជ្រើសតាំងតំណាងរាស្ត្រ នីតិកាលទី ៧ ឆ្នាំ ២០២៣ គឺការចុះបញ្ជីគណ បក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ មានរយៈពេល ១៥ថ្ងៃ ដោយចាប់ផ្តើមពីថ្ងៃទី ២៤ ខែមេសា រហូតដល់ថ្ងៃទី ៨ ខែឧសភា ឆ្នាំ ២០២៣៕

អត្ថបទ៖ ឃួន សុភ័ក្រ