ព័ត៌មានអន្ដរជាតិ

មេទ័ពថៃ ធានាថា គ្មានរដ្ឋប្រហារ ក្រោយការបោះឆ្នោត

បានផុស

៣ years មុន

នៅ

ថ្ងៃសុក្រ ១២ ឧសភា ២០២៣

ដោយ

មេទ័ពថៃនិយាយថា មិនអាចទៅរួចទេដែលប្រជាជាតិអាស៊ីអាគ្នេយ៍មួយនេះ វិលត្រលប់ទៅការគ្រប់គ្រងដោយយោធាវិញ នៅក្នុងករណីមានភាពចលាចលក្រោយការបោះឆ្នោត។

លោក Narongpan Jittkaewtae ដែលអាណត្តិជាមេទ័ពថៃរបស់គាត់នឹងត្រូវបញ្ចប់ក្នុងរយៈពេលប្រាំខែទៀត បានធានាថា នឹងមិនមានរដ្ឋប្រហារឡើយក្រោមការដឹកនាំររបស់លោកឡើយ ហើយថា យោធានឹងរក្សាអព្យាក្រឹតភាព។

នៅពេលសួរថាតើនឹងមានរដ្ឋប្រហារមួយទៀតដែរឬទេ? លោកអះអាងថា “ខ្ញុំមិនអាចបញ្ជាក់ថាតើប្រទេសជាតិនឹងមានស្ថិរភាពឬយ៉ាងណាទេ តទៅមុខ។ នេះជាអ្វីដែលគ្រប់ភាគីត្រូវតែធ្វើការរួមគ្នា។ ប៉ុន្តែអ្វីដែលខ្ញុំអាចបញ្ជាក់បានច្បាស់នោះគឺថា គ្មានឱកាសដែលរឿងកាលពីអតីត កើតឡើងម្តងទៀតនោះទេ”។

ការអត្ថាធិប្បាយរបស់លោក Narongpan នៅថ្ងៃសុក្រទី១២ខែឧសភា អាចនឹងធ្វើឲ្យប្រជាជនថៃ លែងសូវព្រួយបារម្ភអំពីការចូលលូកដៃរបស់យោធាជាថ្មីម្តងទៀត នៅក្នុងករណីគណបក្សប្រឆាំងដែលគាំទ្រលទ្ធិប្រជាធិបតេយ្យ ទទួលបានជ័យជម្នះក្នុងការបោះឆ្នោត។

គួរបញ្ជាក់ថា ថៃបានជួបរដ្ឋប្រហារយោធាជោគជ័យចំនួន១២ដង ចាប់តាំងពីប្រទេសនេះ ប្តូរទៅជារបបរាជាធិបតេយ្យអាស្រ័យរដ្ឋធម្មនុញ្ញក្នុងឆ្នាំ១៩៣២។

រដ្ឋប្រហារចុងក្រោយ គឺដឹកនាំដោយនាយករដ្ឋមន្ត្រីដែលកំពុងកាន់អំណាចលោក ប្រាយុទ្ធ ចាន់អូចា ប្រឆាំងនឹងរដ្ឋាភិបាលរបស់លោកស្រី យីងឡាក់ ស៊ីណាវ៉ាត្រា ដែលត្រូវជាប្អូនស្រីរបស់លោកថាក់ស៊ីន កាលពីឆ្នាំ២០១៤៕

ប្រែសម្រួល៖ Vann Vann

ប្រភព៖ Straits Times

ចុចអាន៖ លោក ប្រាយុទ្ធ ប្រកាសឈប់ធ្វើនយោបាយ បើចាញ់ឆ្នោត