ព័ត៌មានអន្ដរជាតិ

លោកស្រី យីងឡាក់ និយាយយ៉ាងណាខ្លះ ក្រោយបោះឆ្នោត?

បានផុស

៣ years មុន

នៅ

ថ្ងៃអង្គារ ២៣ ឧសភា ២០២៣

ដោយ

នៅក្នុងការអត្ថាធិប្បាយរំលឹកខួបលើកទី ៩ នៃរដ្ឋប្រហារទម្លាក់រដ្ឋាភិបាលស្របច្បាប់របស់ថៃ, អតីតនាយករដ្ឋមន្ត្រីលោកស្រី យីងឡាក់ ស៊ីណាវ៉ាត់ត្រា បន់ស្រន់កុំឲ្យមានរដ្ឋប្រហារបែបនេះតទៅទៀត ហើយបានចាត់ទុកថា ព្រឹត្តិការណ៍ដ៏អាក្រក់កាលពីឆ្នាំ២០១៤ នោះគឺជារដ្ឋប្រហារលើកចុងក្រោយហើយនៅក្នុងប្រទេសមួយនេះ ។

ក្នុងការបង្ហោះតាមហ្វេសប៊ុក បន្ទាប់ពីបោះឆ្នោតសកលរួចហើយ, លោកស្រី យីងឡាក់ បាននិយាយថា “អារម្មណ៍របស់ខ្ញុំកាលពីរដ្ឋប្រហារឆ្នាំ២០១៤ និងអំឡុងពេលនេះ គឺខុសគ្នាស្រឡះ ដោយសារតែលទ្ធផលបោះឆ្នោតកាលពីថ្ងៃទី១៤ ខែឧសភា ឆ្នាំ២០២៣ នេះបង្ហាញយ៉ាងច្បាស់ថា ប្រជាពលរដ្ឋថៃមិនអាចរក្សាជំហរគាំទ្ររដ្ឋាភិបាលដែលឡើងកាន់អំណាចដោយមិនមានលទ្ធិប្រជាធិបតេយ្យបានទៀតនោះទេ” ។

លោកស្រីបានបន្តថា “ប្រជាជនថៃបាននិងកំពុងរស់នៅក្រោមការគ្រប់គ្រងបែបផ្តាច់ការ ហើយកំពុងរស់នៅយ៉ាងអស់សង្ឃឹម ដោយសារតែពួកគេបានជួបបញ្ហាប្រឈមទាំងខាងសង្គម និងសេដ្ឋកិច្ច” ។

គួរបញ្ជាក់ថា រដ្ឋាភិបាលរបស់លោកស្រី យីងឡាក់ ត្រូវបានទម្លាក់ដោយរដ្ឋប្រហារយោធានៅថ្ងៃទី២២ ខែឧសភា ឆ្នាំ ២០១៤ ដែលដឹកនាំដោយប្រមុខកងទ័ពនៅពេលនោះ គឺលោក ប្រាយុទ្ធ ចាន់អូចា ហើយក្រោយមកលោកស្រីបានភៀសខ្លួនចេញពីប្រទេសកាលពីខែកញ្ញា ឆ្នាំ២០១៧ និងរស់នៅនិរទេស ចាប់តាំងពីពេលនោះមក ។

ក្នុងអំឡុងពេលនោះ លោកស្រីក៏ត្រូវបានគេរកឃើញផងដែរថា មានទោសកំហុសជុំវិញការចោទប្រកាន់ពីបទរំលោភអំណាច និងត្រូវបានកាត់ទោសឲ្យជាប់ពន្ធនាគាររយៈពេល ៥ ឆ្នាំ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ លោក Pita នឹងបំបែកកំណត់ត្រាថ្មីមួយ បើក្លាយជានាយករដ្ឋមន្ត្រីថ្មីរបស់ ថៃ