លោក Pita នឹងបំបែកកំណត់ត្រាថ្មីមួយ បើក្លាយជានាយករដ្ឋមន្ត្រីថ្មីរបស់ ថៃ

មេដឹកនាំគណបក្សចលនាឆ្ពោះទៅមុខ (MFP) លោក Pita Limjaroenrat កំពុងស្ថិតនៅលើផ្លូវឆ្ពោះទៅកាន់តំណែងនាយករដ្ឋមន្ត្រីបន្ទាប់របស់ប្រទេសថៃ ក្រោយជ័យជម្នះដ៏គួរឲ្យភ្ញាក់ផ្អើលរបស់គណបក្សនៅក្នុងការបោះឆ្នោតសកលកាលពីថ្ងៃទី១៤ ខែឧសភាកន្លងទៅ ។

ទន្ទឹមនោះ ប្រសិនបើលោក Pita ដែលបច្ចុប្បន្នមានវ័យ ៤២ ឆ្នាំក្លាយជានាយករដ្ឋមន្ត្រីទី៣០ របស់ប្រទេសថៃមែននោះ, លោកនឹងបំបែកកំណត់ត្រាថ្មីមួយក្នុងរយៈពេល ៧៧ ឆ្នាំ ជានាយករដ្ឋមន្ត្រីវ័យក្មេងជាងគេ ចាប់តាំងពីលោក Seni Pramoj ដែលក្លាយជានាយករដ្ឋមន្ត្រីទី៦ របស់ប្រទេសក្នុងខែកញ្ញា ឆ្នាំ១៩៤៥ មានវ័យត្រឹម ៤០ ឆ្នាំ ។

ប៉ុន្តែទោះជាយ៉ាងណា លទ្ធផលបោះឆ្នោតចំនួន ១៥២ អាសនៈដែលគណបក្សរបស់លោក Pita ទទួលបាននៅពេលនេះ គឺមិនទាន់គ្រប់គ្រាន់នៅឡើយទេសម្រាប់តំណែងជានាយករដ្ឋមន្ត្រី ដោយតម្រូវឲ្យគណបក្សមួយនេះកៀរគរ រកអាសនៈសភាឲ្យបានយ៉ាងតិច ៣៧៦ ។

រហូតមកដល់ពេលនេះ គណបក្សចលនាឆ្ពោះទៅមុខ កំពុងធ្វើការលើការបង្កើតរដ្ឋាភិបាលចម្រុះថ្មីមួយជាមួយនឹងគណបក្សនយោបាយចំនួន ៨ ផ្សេងទៀតដែលរំពឹងនឹងប្រមូលបានអាសនៈចំនួន ៣១៤ ដើម្បីឲ្យកាន់តែកៀកនឹងអាសនៈដែលសភាចង់បាន ។

គួរបញ្ជាក់ថា ដើម្បីក្លាយជានាយករដ្ឋមន្ត្រីថៃ, បេក្ខជនរបស់គណបក្សដែលឈ្នះឆ្នោត ត្រូវការសំឡេងគាំទ្រភាគច្រើននៅក្នុងការបោះឆ្នោតរួមគ្នាដោយសភាទាំងពីរ ដោយមានសំឡេងយ៉ាងតិច ៣៧៦ ពីសមាជិកសភាចំនួន ៥០០ រូប និងសមាជិកព្រឹទ្ធសភា ២៥០ រូប ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ ដំណើរការឈានទៅបង្កើតរដ្ឋាភិបាលចម្រុះ ថៃ កាន់តែពិបាក ក្រោយមាន​គណបក្សប្រកាសដកខ្លួន