កម្មករនិយោជិតវិស័យឯកជន អាចមានប្រាក់សោធន​និវត្តន៍ ​ក្រោយអាយុ ៦០ឆ្នាំ

រាជរដ្ឋាភិបាល បានសម្រេចដាក់ឱ្យដំណើរការនូវរបបសន្តិសុខសង្គមផ្នែកប្រាក់សោធន កាលពីខែ តុលា ឆ្នាំ ២០២២ ដោយបេឡាជាតិរបបសន្តិសុខសង្គម (ប.ស.ស) មានកាតព្វកិច្ចក្នុងការគ្រប់គ្រង និងចាត់ចែងរបបសន្តិសុខសង្គម​ផ្នែកប្រាក់សោធននេះ ព្រមទាំងមានកាតព្វកិច្ចប្រមូលភាគទានផ្នែកប្រាក់សោធន សម្រាប់ជាប្រយោជន៍ដល់​កម្មករ​និយោជិតនៅពេលចាស់ទៅ ចាប់ពីអាយុ ៦០ឆ្នាំឡើង ឱ្យមានប្រាក់ចូលនិវត្តន៍។

លោក​ សុក បូរ៉ា ប្រធាននាយកដ្ឋាតាវកាលិកនៃបេឡាសន្តិសុខសង្គម (ប.ស.ស) បានឱ្យដឹងថា ប.ស.ស ទើបតែដាក់ឱ្យដំណើរការប្រាក់សោធនកាលពីខែ តុលា ឆ្នាំ ២០២២ សម្រាប់កម្មករនិយោជិត ឬបុគ្គលិកក្រុម​ហ៊ុនវិស័យឯកជន ទទួលអត្ថបទប្រយោជន៍ក្រោយអាយុ ៦០ឆ្នាំ។

លោកបន្តដូច្នេះថា« បើបង់បាន ២៤ខែ ស្មើនឹង ២ឆ្នាំ អាចចូលនិវត្តន៍យកលុយពី ប.ស.ស បានហើយ, នៅពេល​បងចូលនិវត្តន៍ ប.ស.ស ថែមជូនបង ១៥ឆ្នាំពីលើ, មានន័យថា ពេលចូលនិវត្តន៍មិនមែនប្រាក់អតីតភាព ២ឆ្នាំទេ, គឺអតីតភាពបង់ភាគទានគេសន្មត់ថា បង់បាន ១៧ឆ្នាំ»។

បើតាមលោក សុក ប៉ូរ៉ា ដើម្បីដឹងពីប្រាក់ចូលនិវត្តន៍ដែលទទួលបាន គឺត្រូវយកចំនួនឆ្នាំដែលបានបង់ភាគទាន(គិតជា%, ១ឆ្នាំស្មើ ១,៧៥%) គុណនឹងប្រាក់ខែ ១លាន ២សែន(ប.ស.​ស កំណត់ត្រឹម ១លាន២សែន ខ្ពស់បំផុត) ចែកនឹង ១០០ នឹងឃើញចំនួនទឹកប្រាក់ដែលទទួលបានក្រោយចូលនិវត្តន៍អាយុ ៦០ឆ្នាំ។ លោក សុក ប៉ូរ៉ា បញ្ជាក់ថា ប្រាក់សោធននេះ​នឹងកើនឡើងពីមួយឆ្នាំទៅមួយឆ្នាំ តាមអតិផរណានៃថ្លៃសន្ទទស្សទំនិញ។

ដោយឡែកសម្រាប់ការបង់ភាគទានផ្នែកប្រាក់សោធន គឺជាកាតព្វកិច្ចរួមរបស់និយោជក ឬម្ចាស់សហគ្រាស គ្រឹះស្ថាន និងកម្មករនិយោជិត។ ភាគទាននេះ ត្រូវបង់ជាប្រចាំខែកំណត់ជាអត្រា ៤% នៃប្រាក់ឈ្នួលជាប់ភាគទាន​របស់កម្មករ​និយោជិតម្នាក់ៗ ក្នុងអំឡុង ៥ឆ្នាំដំបូង ដោយនិយោជកមានកាតព្វកិច្ចទទួលបន្ទុក ២% ហើយនិយោជិត មាន​កាតព្វកិច្ចទទួលបន្ទុក ២%។

សូមបញ្ជាក់ថាបេឡាជាតិសន្តិសុខសង្គម នឹងផ្ដល់ប្រាក់សោធននិវត្តន៍ផ្នែកប្រាក់សោធនជរា និងប្រាក់សោធនទុព្វលភាព ដែលត្រូវទទួលបានជាអតិបរមាស្មើនឹង ១.៧៥ ភាគរយៈ នៃប្រាក់ឈ្នួលមធ្យមក្នុងឆ្នាំទី១ ហើយកើនឡើងរហូតដល់ ៣០% ក្នុងឆ្នាំទី១៨។ ដោយឡែកចំពោះ ប្រាក់សោធនឧត្តរជីវីស្មើ ៤៥% នៃសោធនជរា ឬ៤៥% នៃសោធនទុព្វលភាព ឬទុព្ធភាពរបស់សាមីជន៕

អត្ថបទ៖ ផល ធារិត