ជីវិតកម្សាន្ដ

តាមពិតមុនស្លាប់ Coco Lee កើតជំងឺមហារីកសុដន់ ៦ខែហើយ

បានផុស

៣ years មុន

នៅ

ថ្ងៃព្រហស្បតិ៍ ៦ កក្កដា ២០២៣

ដោយ

Sonya

តារាចម្រៀងប៉ុបជនជាតិអាមេរិកដើមកំណើតចិន អ្នកស្រី Coco Lee មុនពេលស្លាប់បានប្រយុទ្ធនឹងជំងឺមហារីកសុដន់យ៉ាងសម្ងាត់ អស់រយៈពេល ៦ខែ ដោយមិនបានបង្ហើបប្រាប់ម្ដាយ ឬអ្នកគាំទ្ររបស់នាងឡើយ។ បញ្ហានេះត្រូវគេសង្ស័យថា អាចមូលហេតុមួយដែលនាំឱ្យអតីតតារាចម្រៀងរូបនេះរងសម្ពាធ រហូតដល់ធ្វើអត្តឃាត។

តាមរយៈការបង្ហោះសារនៅលើគណនី Instagram របស់ផលិតករតន្ត្រី Jae Chong ដែលជាមិត្តភក្តិ Coco Lee បានបង្ហាញពីស្ថានភាពសុខភាពរបស់នាង កាលពីថ្ងៃទី៥ ខែកក្កដា ថា “ខ្ញុំចាំបានពេលដែលនាងប្រាប់ខ្ញុំអំពីជំងឺរបស់នាង កាលពីប៉ុន្មានខែមុន។ ខ្ញុំបានអង្គុយក្នុងឡាន ហើយយំមិនឈប់។ នាងទទួលរងបញ្ហាជាច្រើន រួមទាំងការប្រយុទ្ធនឹងជំងឺមហារីកដោយសម្ងាត់។ នាងខំតតាំងជាមួយវាណាស់។ នាងមិនចង់ឲ្យអ្នកគាំទ្រ និងក្រុមគ្រួសារព្រួយបារម្ភនោះទេ” ។ នៅក្នុងការបង្ហោះលោក Jae Chong បានបញ្ចប់ខ្លឹមសារថា «ខ្ញុំសូមឲ្យនាងបាននៅស្ថានសួគ៌ដែលជាកន្លែងគ្មានការឈឺចាប់តទៅទៀត» ។

យោងតាមរបាយការណ៍មួយរបស់កាសែតហុងកុង ST Headline បានឱ្យដឹងថា Coco ត្រូវបានគេធ្វើរោគវិនិច្ឆ័យឃើញមានជំងឺមហារីកសុដន់ដំណាក់កាលដំបូង កាលពីចុងឆ្នាំមុន។ នាងបានទទួលការវះកាត់ដើម្បីយកដុំសាច់ចេញ ហើយបន្ទាប់ពីនោះនាងមិនបានទទួលការព្យាបាលដោយគីមីទេ។

តាំងពីនាងឈឺរហូតដល់វះកាត់រួច តារាស្រីវ័យ ៤៨ឆ្នាំរូបនេះ បានលាក់បាំងស្ថានភាពរបស់នាងពីម្តាយ ដោយសារមិនចង់ឱ្យគាត់ព្រួយបារម្ភ។ នាងបានត្រឹមតែប្រាប់បងស្រីពីរនាក់របស់នាងប៉ុណ្ណោះ ហើយបានប្រយុទ្ធនឹងជំងឺរបស់នាងដោយស្ងៀមស្ងាត់។ មកទល់នឹងថ្ងៃដែល Coco ស្លាប់ មិនមាននរណាបញ្ជាក់ថា ជំងឺមហារីករបស់នាងបានជាសះស្បើយឬអត់នោះទេ៕

ប្រែសម្រួល៖ សន្យា

ចុចអាន៖ បញ្ហា ២ នេះ អាចជាហេតុផលជំរុញឲ្យ Coco Lee ធ្វើអត្តឃាត