ធនាគារជាតិនៃកម្ពុជា និងអាជ្ញាធររូបិយវត្ថុសិង្ហបុរី បង្កើតហេដ្ឋារចនាសម្ព័ន្ធឌីជីថល​

ធនាគារជាតិនៃកម្ពុជា និងអាជ្ញាធររូបិយវត្ថុសិង្ហបុរី បានចុះហត្ថលេខាលើអនុស្សរណៈយោគយល់ទៅលើគម្រោង Financial Transparency Corridor (FTC) បង្កើតហេដ្ឋារចនាសម្ព័ន្ធឌីជីថលថ្មីមួយ ដែលជួយសម្រួល​ដល់ពាណិជ្ជកម្ម និងសេវាហិរញ្ញវត្ថុឆ្លងដែនសម្រាប់សហគ្រាសធុនតូច និងមធ្យម (SMEs) នៅពីថ្ងៃទី ១១ ខែកក្កដា ឆ្នាំ ២០២៣។

គម្រោងអភិវឌ្ឍ FTC អាចធ្វើការវាយតម្លៃហិរញ្ញប្បទានលើអាជីវកម្មឆ្លងដែនរបស់សហគ្រាសធុនតូច និងមធ្យមរវាង​ប្រទេសទាំងពីរ។ ទន្ទឹមនឹងនេះ គ្រឹះស្ថានធនាគារ និងហិរញ្ញវត្ថុដែលផ្តល់សេវាដល់សហគ្រាសធុនតូច និងមធ្យម​នៅកម្ពុជា ក៏អាចធ្វើការវាយតម្លៃហិរញ្ញប្បទាន ដោយប្រើប្រាស់ព័ត៌មានទទួលបានពីគ្រឹះស្ថានធនាគារ និងហិរញ្ញវត្ថុ​នៅសិង្ហបុរីតាមរយៈផ្លេតហ្វម FTC ផងដែរ។

ការប្រើប្រាស់ផ្លេតហ្វម FTC នេះនឹងជួយសម្រួលដល់សហគ្រាសធុនតូច និងមធ្យមនៅប្រទេសទាំងពីរ ដើម្បីពង្រីក​បណ្តាញពាណិជ្ជកម្មឌីជីថលកាន់តែទូលំទូលាយ តាមរយៈបណ្ដាញ Business Sans Border Proxtera និងផ្ដល់ឱកាសដល់ការភ្ជាប់ទំនាក់ទំនងពាណិជ្ជកម្មកាន់តែប្រសើរក្នុងតំបន់អាស៊ាន និងតំបន់ផ្សេងៗទៀត។

លោកស្រី ជា សិរី ទេសាភិបាលរង ធនាគារជាតិនៃកម្ពុជា បានលើកឡើងថា នាពេលថ្មីៗនេះ ប្រទេសសិង្ហបុរី និងប្រទេសកម្ពុជា បានសហការលើការចែករំលែកព័ត៌មានឥណទានរបស់អតិថិជនឆ្លងដែន ដែលធ្វើឱ្យប្រជាជន​នៃប្រទេសទាំងពីរកាន់តែមានភាពងាយស្រួលក្នុងការទទួលបានសេវាហិរញ្ញវត្ថុពីប្រទេសនីមួយៗ។ ការអភិវឌ្ឍគម្រោង FTC នេះកាន់តែធ្វើឱ្យមានភាពងាយស្រួលសម្រាប់ពាណិជ្ជកម្ម និងសហគ្រាសធុនតូច និងមធ្យម ព្រោះថាវាគឺជាឆ្អឹង​ខ្នងនៃសេដ្ឋកិច្ចកម្ពុជា និងសិង្ហបុរី។ ជាងនេះទៅទៀត លទ្ធភាពក្នុងការទទួលបានហិរញ្ញប្បទានឆ្លងដែនរបស់សហគ្រាស នឹងជួយដល់ប្រតិបត្តិការរបស់អាជីវកម្ម និងរួមចំណែកក្នុងការអភិវឌ្ឍសេដ្ឋកិច្ចរបស់ប្រទេសទាំងពីរឱ្យកាន់តែរីកចម្រើន។

លោក Sopnendu Mohanty អគ្គនាយកប្រតិបត្តិបច្ចេកវិទ្យាហិរញ្ញវត្ថុនៃអាជ្ញាធររូបិយវត្ថុសិង្ហបុរី បានសង្កត់ធ្ងន់ថា ^«គម្រោង FTC នឹងគាំទ្រដល់លំហូរពាណិជ្ជកម្មបើកចំហសម្រាប់អាជីវកម្ម ជាពិសេសសហគ្រាសធុនតូច និងមធ្យមតាមរយៈការពង្រឹងគុណភាពទិន្នន័យសម្រាប់ការផ្តល់សេវាហិរញ្ញវត្ថុរវាងប្រទេសសិង្ហបុរី និងកម្ពុជា។ លើសពីនេះទៅទៀត នឹងនាំឱ្យមានភាពជាដៃគូកាន់តែជិតស្និទ្ធ រវាងគ្រឹះស្ថានហិរញ្ញវត្ថុ​របស់ប្រទេសទាំងពីរទៅ​លើការអភិវឌ្ឍផលិតផល និងសេវាប្រកបដោយនវានុវត្តន៍ និងការអភិវឌ្ឍសេដ្ឋកិច្ចឱ្យកាន់​តែរឹងមាំក្នុង​សកល​ភាវូបនីយកម្មសេដ្ឋកិច្ចឌីជីថល^»។

បើតាមធនាគារជាតិកម្ពុជា គោលបំណងសំខាន់នៃផ្លេតហ្វម FTC នេះ គឺបង្កើតហេដ្ឋារចនាសម្ព័ន្ធឌីធីថល ដើម្បី​សម្រួល​ដល់ការដោះដូរព័ត៌មានរវាងគ្រឹះស្ថានធនាគារ និងហិរញ្ញវត្ថុដែលចូលរួមក្នុងផ្លេតហ្វមនៅក្នុងប្រទេសទ្វេភាគី ហើយនឹងគាំទ្រទៅលើការវាយតម្លៃឥណទានរបស់គ្រឹះស្ថានហិរញ្ញវត្ថុក្នុងការផ្តល់ហិរញ្ញប្បទានពាណិជ្ជកម្ម ដែលអនុលោម​តាមបទប្បញ្ញត្តិស្តីពី ការប្រឆាំងការសម្អាតប្រាក់ ដើម្បីកាត់បន្ថយវិវាទពាណិជ្ជកម្ម និងហានិភ័យ។

អត្ថបទ៖ ផល ធារិត