គណបក្សប្រជាជនកម្ពុជាខេត្តកំពត បន្តចុះជួបពលរដ្ឋតាមខ្នងផ្ទះ និងបង្រៀនពី​របៀប​គូសសន្លឹកឆ្នោតឲ្យបានត្រឹមត្រូវ

នាថ្ងៃទី១៦ ខែកក្កដា ឆ្នាំ២០២៣នេះ ឯកឧត្តម ញ៉ូវ សាឯម ជាអនុប្រធានគណបក្សប្រជាជនកម្ពុជាខេត្តកំពត បានបន្តដឹកនាំសមាជិកសមាជិកាគណបក្សប្រជាជនកម្ពុជាចុះឃោសនាស្វែងរកសំឡេងឆ្នោតនៅតាមខ្នងផ្ទះរបស់ប្រជាពលរដ្ឋចុះចំនួន៣ឃុំ នៅក្នុងស្រុកដងទង់-ទី១ឃុំខ្នាយខាងជើង-ទី២ឃុំខ្នាយខាងត្បូង ទី៣ឃុំទទុង ស្រុកដងទង់ ខេត្តកំពត។

ឱកាសធ្វើយុទ្ធនាការឃោសនាបោះឆ្នោតជ្រើសរើសតំណាងរាស្ត្រនីតិកាលទី៧ ឆ្នាំ២០២៣ កាន់តែខើចទៅៗហើយ សម្រាប់ខេត្តកំពត រយៈពេល១៦ថ្ងៃកន្លងមកនេះ គេឃើញគណបក្សប្រជាជនកម្ពុជានៅតែបន្តធ្វើសកម្មភាពយ៉ាងក្លៀវក្លា ពិសេសការចុះទៅឃោសនាស្វែងរកសំឡេងគាំទ្រនៅតាមខ្នងផ្ទះប្រជាពលរដ្ឋតាមមូលដ្ឋាននានា។

ជួបជាមួយប្រជាពលរដ្ឋជាច្រើនគ្រួសារនៅតាមខ្នងផ្ទះ ឯកឧត្តម ញ៉ូវ សាឯម បានរំលឹកអំពីគុណបំណាច់ និងសមិទ្ធផលនានារបស់គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធាន និងជានាយករដ្ឋមន្ត្រីដឹកនាំប្រទេស​នាពេលបច្ចុប្បន្ន។

ឯកឧត្តម ញ៉ូវ សាឯម ជាអនុប្រធានគណបក្សប្រជាជនកម្ពុជាខេត្តកំពត ក៏បានពន្យល់អំពីគោលនយោបាយទាំង៩​ចំ​ណុច​របស់បក្ស និងពន្យល់បន្ថែមអំពីសារប្រយោជន៍នៃការបោះឆ្នោត និងរបៀបគូសលើស្លឹកឆ្នោតឲ្យបានត្រឹមត្រូវផងដែរ។

ឯកឧត្តម ញ៉ូវ សាឯម អនុប្រធានគណបក្សខេត្ត បានសង្កត់ធ្ងន់ថា គណបក្សប្រជាជនកម្ពុជា របស់ប្រជាជនដោយសារប្រជាជន និងដើម្បីប្រជាជន រួមសុខរួមទុក្ខជាមួយប្រជាជននៅគ្រប់កាលៈទេសៈ ការពារសន្តិភាព បន្តការអភិវឌ្ឍន៍ និងលើកកម្ពស់ជីវភាពរបស់ប្រជាជនឲ្យកាន់តែប្រសើរ។

ឯកឧត្តម ញ៉ូវ សាឯម ជាអនុប្រធានគណបក្សប្រជាជនកម្ពុជាខេត្តកំពត បានស្នើសុំឲ្យប្រជាពលរដ្ឋទាំងអស់សូមជួយបន្តបោះឆ្នោតគាំទ្រគណបក្សប្រជាជនប្រជាពលរដ្ឋបន្តទៅទៀត ដើម្បីផ្តល់ឱកាសឲ្យសម្តេចតោជោ បន្តធ្វើជានាយករដ្ឋមន្ត្រី ដឹកនាំប្រទេស ឆ្ពោះទៅរកភាពរីកចម្រើនរុងរឿងបន្តទៀត។

បើតាមការបញ្ជាក់របស់មន្ត្រីរៀបចំការបោះឆ្នោតខេត្តកំពត ថាសកម្មភាពឃោសនារកសំឡេងឆ្នោតរបស់គណបក្សនយោបាយទាំង១២ ក្នុងរយៈពេល១៦ថ្ងៃកន្លងមកនេះ មានភាពល្អប្រសើរគ្រប់បែបយ៉ាង ហើយជាការកត់សំគាល់ គណបក្សប្រជាជនកម្ពុជាធ្វើសកម្មភាពឃោសនាបានផុលផុសជាងគេនៅគ្រប់មូលដ្ឋាននៃក្នុងភូមិសាស្ត្រខេត្តកំពត៕

អត្ថបទ៖ សឹង រ៉ាត់