ព័ត៌មានជាតិ

ការដ្ឋានពង្រីកផ្លូវជាតិលេខ ៧ ស្គន់-កំពង់ចាម បើកការដ្ឋានរួច យឺតយ៉ាវមិនទាន់សាងសង់

បានផុស

៣ years មុន

នៅ

ថ្ងៃសុក្រ ២៨ កក្កដា ២០២៣

ដោយ

លោក គង់ វិមាន អនុរដ្ឋលេខាធិការនៃក្រសួងសាធារណការ និងដឹកជញ្ជូន នារសៀលថ្ងៃទី២៧ ខែកក្កដា នេះ បានគូសបញ្ជាក់ថា ការដ្ឋានពង្រីកផ្លូវជាតិលេខ ៧ ពីស្គន់ទៅក្រុងកំពង់ចាម មានភាពរាំងស្ទះនៃការសាងសង់ដោយសារកំពុងដោះស្រាយផលប៉ះពាល់មួយចំនួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយតបការសាកសួរពី «កម្ពុជាថ្មី» កាលពីម្សិលមិញនេះ លោក គង់ វិមាន បានពន្យល់ថា ភាពរអាក់រអួលគម្រោងសាងសង់ផ្លូវជាតិលេខ ៧ ពីស្គន់ទៅកំពង់ចាម ដោយហេតុបច្ចុប្បន្នកំពុងរង់ចាំថវិកាដោះស្រាយផលប៉ះពាល់មួយចំនួន ដូច្នេះនៅពេលថវិកាធ្លាក់មកពេលណា ក្រុមការងារនឹងចាប់ផ្តើមការសាងសង់វិញភ្លាមៗ។

អនុរដ្ឋលេខាធិការរូបនេះបញ្ជាក់ថា «យើងបានដឹងហើយថា ផ្លូវជាតិលេខ ៧ ពីស្គន់ ទៅកំពង់ចាមជាផ្លូវចាស់ ដូច្នេះហើយទើបបង្កឱ្យមានបញ្ហាប្រឈមមួយចំនួន ហើយផ្លូវចាស់នេះត្រូវសាងសង់និងពង្រីកជាផ្លូវធំថ្មី ដែលមានប្រវែងសរុបជាង ៤៥ គីឡូម៉ែត្រ ដោយស្តារនិងពង្រីកពី ២ គន្លង ទៅ ៤ គន្លង»។

តែទោះជាបែបនេះក្តី លោក គង់ វិមាន អះអាងថា បច្ចុប្បន្នគណៈកម្មាធិការនិងក្រុមការងារកំពុងធ្វើការសម្របសម្រួល និងដោះស្រាយផលប៉ះពាល់ឲ្យបានចប់ ហើយនៅពេលរួចរាល់នឹងចាប់ផ្តើមបន្តការសាងសង់វិញភ្លាមៗផងដែរ។

គួររំលឹកថា ផ្លូវជាតិលេខ ៧ ពីស្គន់ ទៅកំពង់ចាមមានប្រវែងសរុបជាង ៤៥ គីឡូម៉ែត្រ ចាប់ពីរង្វង់មូលស្គន់ទីរួមស្រុកជើងព្រៃ ទៅដល់រង្វង់មូលគល់ស្ពានគីហ្សូណាក្រុងកំពង់ចាម ដែលបានបើកការដ្ឋានស្តារនិងពង្រីកពី ២ គន្លង ទៅ ៤ គន្លង កាលពីថ្ងៃទី ៩ ខែមករា ឆ្នាំ២០២៣។ កំណាត់ផ្លូវនេះសាងសង់ដោយក្រុមហ៊ុមសាជីវកម្មស្ពាននិងថ្នល់ចិនដោយចំណាយថវិកាសរុបជាង ១១៧ លានដុល្លារអាមេរិក ហើយបើតាមផែនការគ្រោងបញ្ចប់នៅក្នុងឆ្នាំ ២០២៦៕