កម្ពុជា នឹងបង្ហាញវប្បធម៌ ប្រវត្តិសាស្ត្រ ទៅកាន់អង្គប្រជុំសមាគមកាយឬទ្ធិនារីពិភពលោកដែលកម្ពុជាធ្វើជាម្ចាស់ផ្ទះ

ក្រោយអញ្ជើញមកដល់ប្រទេសកម្ពុជាវិញភ្លាម លោកជំទាវ ពេជ ចន្ទមុន្នី ស្នងការសមាគមកាយឬទ្ធិនារីកម្ពុជា បានអះអាងប្រាប់ក្រុមអ្នកសារព័ត៌មានថា កម្ពុជា នឹងបង្ហាញពីវប្បធម៌ ប្រពៃណី ម្ហូបអារហារ  ប្រវត្តិ​សាស្ត្រ ធនធានមនុស្ស ដល់ប្រទេសជាសមាជិកដែលមកចូលរួមសន្និបាតសមាគមកាយឬទ្ធិនារីពិភពលោកនៅកម្ពុជាឲ្យដឹងថា កម្ពុជា មានវប្បធម៌ សម្បតិ្តបេតិកភណ្ឌ មានធនធានមនុស្សពូកែៗដែលមានសមត្ថភាព រៀបចំព្រឹត្តិការណ៍ធំៗមិនចាញ់ប្រទេសដទៃទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់ក្រុមអ្នកសារព័ត៌មាននៅព្រលានយន្តហោះអន្តរជាតិភ្នំពេញកាលពីល្ងាចថ្ងៃទី០២ ខែសីហា  ក្រោយពីចូលរួមកិច្ចប្រជុំសមាគមកាយឬទ្ធិនារីពិភពលោក លើកទី៣៨នៅប្រទេសសាយប្រឹស លោកជំទាវ ពេជ ចន្ទមុន្នី បានបង្ហាញពីផែនការត្រៀមនាពេលខាងមុខ គឺកម្ពុជា នឹងសិក្សាផែនការ ដើម្បីទទួលសមាជិកដែលមកចូលរួមក្នុងចំណោមសមាជិកសមាគមកាយឬទ្ធិនារីពិភពលោកសរុប១៦៩ប្រទេសឱ្យបានល្អបំផុត។

បន្ថែមពីនេះ សមាគមកាយឬទ្ធិនារីកម្ពុជា នឹងពង្រឹងការបង្ហាត់បង្ហាញ បង្រៀនទៅដល់យុវតីកាយឬទ្ធិបន្ថែមទៀតក្នុងពេលសេសសល់ ដើម្បីឱ្យសមាជិកចូលរួមដឹងថា កម្ពុជាខ្លាំងក្លា បង្ហាញថាកម្ពុជាមានសមត្ថភាពរៀបចំសន្និបាតកិច្ចប្រជុំធំៗ។ បើតាមលោកជំទាវ ពេជ ចន្ទមុន្នី គឺសមាគមកាយឬទ្ធិនារីកម្ពុជានឹងបង្កើតក្រុមការងារ ដើម្បីជំរុញឱ្យការរៀបចំសន្និបាតលើកទី៣៩ ឆ្នាំ២០២៦ នៅកម្ពុជាបញ្ចប់ទៅដោយរលូន និងជោគជ័យជាប្រវត្តិសាស្ត្រ។

សូមជម្រាបថា កាលពីថ្ងៃទី៣០ ខែកក្កដា ឆ្នាំ២០២៣ នៅក្នុងសន្និបាតសមាគមកាយឬទ្ធិនារីពិភពលោកលើកទី៣៨ ឆ្នាំ២០២៣ នាប្រទេសសាយប្រឹស សមាគមកាយឬទ្ធិនារីកម្ពុជាទទួលបានសិទ្ធិរៀបចំសន្និ​បាត​សមាគមកាយឬទ្ធិនារីពិភពលោកលើកទី៣៩ ឆ្នាំ២០២៦។ នេះ គឺជាលើកទីមួយហើយក្នុងប្រវត្តិសាស្ត្រដែលសមាគមកាយឬទ្ធិនារីកម្ពុជាទទួលបានសិទ្ធិធ្វើជាម្ចាស់ផ្ទះ បន្ទាប់ពីកម្ពុជាចូលជាសមាជិកនៃសមាគមកាយឬទ្ធិនារីពិភពលោកអស់រយៈពេលជាង៧០ឆ្នាំមកហើយ។

បើទោះជាលើកទីមួយក៏ពិតមែន ប៉ុន្តែ ស្នងការកាយឬទ្ធិនារីកម្ពុជា លោកជំទាវ ពេជ ចន្ទមុន្នី បានបេជ្ញាថានឹងរៀបចំឱ្យបានល្អជាទីបំផុតក្នុងការទទួលប្រទេសជាង១០០ដែលមកចូលរួម សម្រាប់ទាក់ទាញទឹកចិត្តឱ្យបណ្ដាប្រទេសទាំងនោះផ្សព្វផ្សាយពីកម្ពុជា ដើម្បីជំរុញ និងបង្កើនការទាក់ទាញភ្ញៀវទេសចរមកកាន់កម្ពុជាបន្ថែមទៀត៕

ដោយ៖ ង៉ិល ណារ៉ាត់