កងទ័ពជើងទឹក​អាមេរិក​ពីរ​នាក់ ​ត្រូវ​ចាប់ខ្លួន​ពី​បទយកការណ៍ឲ្យចិន

នាវិកកងទ័ពជើងទឹកអាមេរិកពីរនាក់ នៅរដ្ឋកាលីហ្វ័រញ៉ា ត្រូវបានចាប់ខ្លួនដោយចោទប្រកាន់ពីបទ ផ្តល់ព័ត៌មានយោធាដ៏រសើបដល់ប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាវិកសញ្ជាតិអាមេរិកទាំង២ រូប ទី១ មានឈ្មោះ Jinchao Wei អាយុ២២ឆ្នាំ ត្រូវបានចោទប្រកាន់ពីបទសមគំនិត ក្នុងការបញ្ជូនព័ត៌មានការពារជាតិទៅឲ្យភ្នាក់ងារចិន រីឯអ្នកទី២ឈ្មោះ Wenheng Zhao អាយុ២៦ឆ្នាំ ត្រូវបានចាប់ខ្លួន ដោយចោទប្រកាន់ពីបទដោះដូររូបថត និងវីដេអូរសើប ដើម្បីប្រាក់។

រដ្ឋអាជ្ញា​អាមេរិក បាន​ប្រកាស​ពី​ការ​ចោទ​ប្រកាន់​នេះ ​ក្នុង​អំឡុង​សន្និសីទ​សារព័ត៌មាន​នៅ​ទីក្រុង San Diego កាល​ពី​ថ្ងៃ​ព្រហស្បតិ៍ទី៣ខែសីហា។

ពួកគេនិយាយថា លោក Wei ដែលជាជាងម៉ាស៊ីននៅលើនាវាចម្បាំង USS Essex បានរក្សាទុកព័ត៌មានសន្តិសុខ និងទទួលបានព័ត៌មានរសើបអំពីនាវានេះ។ គាត់រងការចោទប្រកាន់ថា ត្រូវបានទាក់ទងដោយភ្នាក់ងារចិនកាលពីខែកុម្ភៈឆ្នាំ២០២២ ខណៈពេលគាត់កំពុងរៀបចំឯកសារដើម្បីចូលសញ្ជាតិអាមេរិក។

មន្ត្រីក្រសួងយុត្តិធម៌និយាយថា លោក Wei ក៏បានផ្តល់ព័ត៌មានលម្អិតអំពីភ្នាក់ងាររបស់កងម៉ារីនអាមេរិក ដែលកំពុងធ្វើលំហាត់ហ្វឹកហ្វឺនតាមសមុទ្រផងដែរ។

ចំណែកលោក Zhao ធ្វើការនៅមូលដ្ឋានទ័ពជើងទឹក Ventura County ក្បែរទីក្រុង Los Angeles។ ក្នុងឆ្នាំ២០២១ គាត់ត្រូវបានគេចោទប្រកាន់ថា ទាក់ទងដោយភ្នាក់ងារចិនដែលបន្លំខ្លួនជាអ្នកស្រាវជ្រាវ។ ភ្នាក់ងារនេះបានបង់ប្រាក់ឲ្យលោក Zhao ជិត១៥០០០ដុល្លារ សម្រាប់រូបថតនិងវីដេអូ រួមជាមួយដ្យាក្រាមនិងប្លង់មេ សម្រាប់ប្រព័ន្ធរ៉ាដាដែលឈរជើងនៅមូលដ្ឋានយោធាអាមេរិក លើកោះអូគីណាវ៉ា នៃប្រទេសជប៉ុន។

ប្រសិនបើត្រូវបានផ្តន្ទាទោសមែននោះ លោក Wei ប្រឈមមុខនឹងការជាប់ពន្ធនាគាររយៈពេល ២០ ឆ្នាំ ឬមួយជីវិត ខណៈលោក Zhao នឹងមានទោសជាប់ពន្ធនាគារអតិបរមា ២០ ឆ្នាំ ៕

ប្រែសម្រួល៖ Vann Vann

ប្រភព៖ BBC

ចុចអាន៖ ចិន ​កាត់ទោស​ពលរដ្ឋ​អាមេរិក​ ​ឲ្យ​ជាប់ពន្ធនាគារ​អស់​មួយជីវិត ​ពីបទ​ចារកម្ម​