ចិន ​កាត់ទោស​ពលរដ្ឋ​អាមេរិក​ ​ឲ្យ​ជាប់ពន្ធនាគារ​អស់​មួយជីវិត ​ពីបទ​ចារកម្ម​

តុលាការ​ចិន​ បាន​កាត់ទោស​ពលរដ្ឋ​អាមេរិក​អាយុ៧៨ឆ្នាំ​ម្នាក់ ​ឲ្យ​ជាប់​ពន្ធនាគារ​អស់​មួយ​ជីវិត​ពី​បទ​ចារកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក John Shing-Wan Leung ដែលជាអ្នករស់នៅអចិន្ត្រៃយ៍ក្នុងទីក្រុងហុងកុង ត្រូវបានដាក់ពន្ធនាគារនៅថ្ងៃចន្ទទី១៥ខែឧសភា។

ទោះបីជាយ៉ាងណាក៏ដោយ តុលាការនៅទីក្រុង ស៊ូចូវ មិនបានផ្តល់ព័ត៌មានលម្អិតបន្ថែម អំពីការចោទប្រកាន់លើរូបគាត់ទេ។

លោក Leung ត្រូវបានការិយាល័យក្នុងតំបន់នៃទីភ្នាក់ងារប្រឆាំងចារកម្មចិន ចាប់ខ្លួននៅក្នុងទីក្រុងនេះ កាលពី២ឆ្នាំមុន។ គាត់ត្រូវបានគេរកឃើញថាមានពិរុទ្ធពីបទចារកម្ម, កាត់ទោសឲ្យជាប់ពន្ធនាគារអស់មួយជីវិត និង ដកហូតសិទ្ធិនយោបាយអស់មួយជីវិត។ នេះបើយោងតាមសេចក្តីថ្លែងការណ៍របស់តុលាការប្រជាជនកម្រិតមធ្យម។

គួរបញ្ជាក់ថា ការដាក់ពន្ធនាគារនេះ ទំនងជាធ្វើឲ្យទំនាក់ទំនងរវាងចិន និងអាមេរិក កាន់តែល្អក់កករ បន្ទាប់ពីទំនាក់ទំនងរវាងទីក្រុងប៉េកាំង និងវ៉ាស៊ីនតោន បានធ្លាក់ដល់កម្រិតយ៉ាប់យ៉ឺនបំផុត ក្នុងអំឡុងរដ្ឋបាលរបស់អតីតប្រធានាធិបតីអាមេរិក លោក ដូណាល់ ត្រាំ បន្ទាប់ពីលោកបានចាប់ផ្តើមសង្គ្រាមពាណិជ្ជកម្មប្រឆាំងនឹងប្រទេសចិនក្នុងឆ្នាំ២០១៨។

ក្រោយមក មហាអំណាចទាំងពីរ នៅតែបន្តប៉ះទង្គិចគ្នាលើបញ្ហាផ្សេងៗ រួមទាំងតៃវ៉ាន់ ការធ្វើទំនើបកម្មយោធារបស់ចិននៅសមុទ្រចិនខាងត្បូង និងប្រភពដើមនៃជំងឺកូវីដ១៩ ផងដែរ។

ភាព​តានតឹង​ក៏​បាន​កើនឡើងខ្លាំង​ផងដែរកាលពី​ខែកុម្ភៈ នៅពេល​​អាមេរិក ​បាញ់​ទម្លាក់បាឡុង​ចារកម្ម​របស់​ចិន ដែល​ក្រុង​ប៉េកាំង​ទទូចហើយទទូចទៀតថា ​ជា​ឧបករណ៍​តាមដាន​អាកាសធាតុ៕

ប្រែសម្រួល៖ Vann Vann

ប្រភព៖ BBC

ចុចអាន៖ ចិន អនុម័ត ពង្រីក ច្បាប់ ប្រឆាំង ចារកម្ម