មីយ៉ាន់ម៉ា ប្រើប្រាក់យ័ន ចិន ដើម្បីទិញផលិតផលប្រេងរបស់ រុស្ស៊ី

រដ្ឋមន្ត្រីក្រសួងវិនិយោគ និងទំនាក់ទំនងសេដ្ឋកិច្ចបរទេសរបស់មីយ៉ាន់ម៉ា លោក Kan Zaw បានប្រាប់សារព័ត៌មាន Sputnik ថា ប្រទេសមីយ៉ាន់ម៉ាបានប្រើប្រាស់ប្រាក់យ័នចិនដើម្បីចំណាយលើការផ្គត់ផ្គង់ផលិតផលប្រេងរបស់រុស្ស៊ី ហើយភាគីនានាក៏កំពុងរៀបចំកិច្ចព្រមព្រៀងស្តីពីការបំប្លែងរូបិយប័ណ្ណជាតិទៅវិញទៅមកផងដែរ ។

លោក Kan Zaw បាននិយាយនៅខាងក្រៅវេទិកាសេដ្ឋកិច្ចបូព៌ា (EEF) ក្នុងទីក្រុង Vladivostok ប្រទេសរុស្ស៊ីថា “បច្ចុប្បន្នយើងមិនប្រើប្រាក់រូប្លិ៍របស់រុស្ស៊ីនោះទេ យើងកំពុងប្រើប្រាក់យ័នចិនលើការចំណាយនានាដើម្បីទិញផលិតផលប្រេងរបស់រុស្ស៊ី ។

ទោះយ៉ាងណា មីយ៉ាន់ម៉ាក៏កំពុងព្យាយាមរៀបចំការទូទាត់ប្រាក់ គីយ៉ាត់-រូប្លិ៍ លើកិច្ចព្រមព្រៀងទិញដូរប្រេងរបស់រុស្ស៊ីផងដែរ ហើយអាចនឹងត្រូវបានចុះហត្ថលេខាក្នុងពេលឆាប់ៗនេះ ។

រឿងរ៉ាវនេះកើតមានឡើង បន្ទាប់ពីមេដឹកនាំយោធាមីយ៉ាន់ម៉ា លោក Min Aung Hlaing បានប្រាប់សារព័ត៌មាន Sputnik កាលពីខែកញ្ញាកន្លងទៅថា ប្រទេសមីយ៉ាន់ម៉ាបានចាប់ផ្តើមទិញផលិតផលប្រេងពីរុស្ស៊ីរួចទៅហើយ។

គួរបញ្ជាក់ថា វេទិកាសេដ្ឋកិច្ចបូព៌ា (EEF) លើកទី ៨ នឹងប្រព្រឹត្តទៅនៅបរិវេណនៃសាកលវិទ្យាល័យ Far Eastern Federal ក្នុងទីក្រុង Vladivostok នៃប្រទេសរុស្ស៊ី ចាប់ពីថ្ងៃទី ១០ ដល់ថ្ងៃទី ១៣ ខែកញ្ញា ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក Modi លែងប្រើឈ្មោះប្រទេស “ឥណ្ឌា” ក្នុងកិច្ចប្រជុំកំពូល G20